¹ Petelo,ntumwa sa Yesu Kilishitu,kweli babo bagheni nu basandabanile mu Ponto mu Galatia,mu Kapadokia,mu Asia nu mu Bitinia, ² nu basombolwa bamanilwe kalai na Ghongo Tata, mu busanana bwa Muusa,kubuno bamongwilile,nu basangile kusansilwa mikila sa Yesu Kilishitu;Mpanga inene nu boolo bibe kwinu bingi! ³ Ghongo akasanilwe Ise wa Mukota witu Yesu Kilishitu,we ,kuyangana na lukogho lunene lwaghe,atubutile lingo mu malelamilo meli gho,kutingila kutuchwa kwa Yesu ku bakui, ⁴ ku mwandu utana bola,utana bigha ali kushimisha busogha bwagho,umwabikindwe mw'ighulu, ⁵ ku benywe,kutingila bwangato bwa Ghongo, mwalangilwe na lukatisho ku lulo lonio lukamoneka ko ku bindi bishinda! ⁶ Agho u gheli mboghombogho sinu bunaba lelo,bwatunganana mube na bongwa mu mitima sinu mu bindi bikeke kutingila malingiko ningi . ⁷ Kubuno kulingikwa kwa lukatisho lwinu lwaghimba nolo sinashimila(sikulingikwa mu kaya),sikila mu kutata Ghongo lukumbu nu lwanso,busi bwakamoneka ko Yesu Kilishitu, ⁸ u numwashima nu ta mukumulola ko,u mwakatisha nu tamukumulola ko neshi,u mwaboghelaboghela na chelele kinene, ⁹ buno mutima sinu sikona ku lukatisho lwinu. ¹⁰ Balenganya babo bababulagha mpanga inene simwabikindwe,ulo lonio u lwabinde kitondo chabo cha kulondelesha nu cha kumanilila, ¹¹ mu kulonda bindi ki nu mu nsila ki sabikilwe na Muusa wa Kilishitu wabagha mubo,u walingagha kulosha minubo sa Kilishitu,nu lukumbu lukashwa kumbusa kwa so. ¹² Balimbulilwagha buno talwabagha lwabo binene,tondo lwinu,bo bashwagha kusambala ibyo bitondo,bi mwabulwa lelo na babo bashwagha kusansa musaghu musogha ku mweli kutingila Musaghu Musogha watukagha kw'ighulu,nu baghenshi bakushima babilole ko. ¹³ Uchasula ,mukokomeshe mulenganya winu ,mube benge,nu mube na malelamilo mu mpanga inene si mukeleshibwa mu kwika kwa Yesu Kilishitu. ¹⁴ Anga bana bakumana kwongwilila,muyangaghe lingo na nkasa simwabagha naso kalai,ghamwabagha tamwite mulenganya. ¹⁵ Tondo,olya wabamanagha asanana, nu benywe nubo mube basanana mu myanya sinu,anga bubo bubwatililwe: ¹⁶ Mukaba basanana,buno nine nili wa sanana. ¹⁷ Nu mukumana Tata olya ukwaya kuyangana na mikolo sa mutu , mu ku ta kutobolola bantu,mwende mu nsila ghamoi na boba mu lughendo lwinu lwa ghano gha kisi, ¹⁸ Mukumana buno ta kutingila bikai bikabola, kutingila bikulo ali nolo u mwatuchwagha mu nsila mbi sayangagha ba so, ¹⁹ tondo na mikila nsogha sa Kilishitu anga sa mbuli sitabigha nu senga, ²⁰ sabikwagha nu kisi takibumbwa nu sa monekile ko ku bindi bishinda,kubushi bwinu, ²¹ nu kuwe mwakatisha Ghongo,we wamutuchagha ku bakui nu amweleshishe lukumbu,kubuno lukatisho lwinu nu malelamilo lwinu mikale mu Ghongo. ²² Mu kusughuka mitima sinu mu kwikala mu bulili,buno mube na lutundo lwa bulili kweli mibuto,mushimane bubibu gha musambana,na mutima winu unsai. ²³ Kubuno mwabutilwe lingo ta kutingila mbuto sabigha,tondo kutingila mbuto nsogha,kutingila kitondo cha Ghongo cheli gho bindi binsai. ²⁴ Kubuno mubili unsai weli anga kisughu, nu lukumbu lwagho luli anga malubha ma kisughu.Kisughu kukama nu malubha kukoloka; ²⁵ tondo,kitondo cha Mukota cheli gho bindi binsai .Nw'icho kitondo u kicho kimwasambalilwagha kutingila musaghu musogha.