¹ Erhi kugera hisanzi hisungunu, Yezu atwikanya omu mashwa g'engano, lwali lusiku lwa kurhamuka. Abaganda bage bali bashalisire; baja bavuna emihuliy'engano n'okukugurha emmogomogo. ² Erhi Abafarizayo babona ntyo babwira Yezu mpu: Lola oku abaganda bawe bali bajira oku amarhegeko girhu gahanzize okujira omu lusiku lokurhamuka. ³ Yezu abashuza erhi, kmurhasomaga oku Daudi ajiraga lusiku luguma erhhi boshi n'abantu bage bashalisire? ⁴ Ye boshi n'abantu bage baja omu ka-Nyamuzinda, balya m'emigati Nnamahanga alirhuzirwe, cikone barhali bayemerirwe okuyilya: amarhegeko girhu gayemerire abajinji bone okuyirya . ⁵ Nisi kamurha somaga omu marhegeko ga Musa okw'omu lusiku lw'okurhamuka abajinji bakaloga omu ka Nyamuzinda barhakulikiraga olusiku lw'okurhamuka n'okwo kurhali kugoma? ⁶ N'obwo mbabwizire nti hano hali akantu kalulu kulusha aka-Nyamuzinda. ⁷ Mucimanyaga okunali birya binwa Amandiko gadesire mpu: Nnonza minja carhali nterekero, murhankatwire olw'aba beru kweru. ⁸ Bulya nie Mwene muntu nie nnahano w'olusiku lw'okurhamuka. ⁹ Yezu arhenga eyo munda, aja muli sinagogi nguma. ¹⁰ Mwali omuntu ohozire okuboko. Abafarizeyi, balonza igwarhiro kuli Yezu mpu anajijire kubi, bamudosa mpu: "K'amarhegeko girhu gadesire oku omuntu anafumya omu lusiku lw'okurhamuka. ¹¹ Yezu abashuza erhi: "Nka muguma muli mwe ankaba agwerhe cibuzi ciguma cone, lero cirhogerage emusima olusiku lw'okurhamuka, k'arhakagendi cigwarha acikule yo? ¹² Omuntu ye mukulu kulusha ecibuzi! amarhegeko gayemerire omuntu okujir'aminja omu lusiku lukulu lw'okurhamuka. ¹³ Ago mango Yezu abwira oyo muntu erhi: lambula okuboko kwawe, akulambula kwashubiba lumenge nk'okwabo. ¹⁴ Abafarizayo bagendi jira ihano mpu batwe oku bankayirha mwo Yezu. ¹⁵ Erhi Yezu amanya okwo, arhenga eyo munda, na bantu banji bamukulikira. Afumya abalwala bwoshi, ¹⁶ cikone abakomereza mpu barhaderhaga ye nndi. ¹⁷ Ajijirer ntyo lyo akanwa omulebi Isaya aderhaga: ¹⁸ Nnamahanga adesire erhi: Oyu ye mwambali wani nacishogaga, Ye muzigirwa wani, kusimisa ansimisa. Namuhira kwo Muka gwabo Abwira n'embaga oku ntwa enyanja ¹⁹ Arhajise ndi byaka, arhanayakuze Nantaye wamuyunva ayigiriza omu njira. ²⁰ Arhahumanule olushekesheke lugombire, Arhakanazimya akamole kali hofi kazime, ajira ntyo kuhika obushinganyanya buhime. ²¹ N'embaga zoshi zamulangalira ²² Ago mango baldrhera muntumuguma wali muhûrha, kâli na kaduma, bulyq kali na kaduma, bulya ali kw'omusimu. Yezu afumya oyo muntu, akaderha n'okukâbona. ²³ Abantu boshi basômerwa bwenene, bakâderha mpu: "K'arhali olya Mwene Daudi oyu?." ²⁴ Ci'one erhi Abafarizayo babayunva, baddrha mpu: "Oyu muntu arhahîva abazimu okurhali oku buhashe bwa Belzebuli omurhambo w'abo bazimu!" ²⁵ Cikwone Yezu amanya engerêrezo zabo. Ago mango ababwira erhi: Ngasi bwami abantu bali balwisanya mwo, obuzinda bwabwo kuba kusherera. Ngasi cishagala nisi erhi ngasi mulala abantu bamwo bali balwa bone na nnene, eco cishagala nisi erhi ogwo mulala gerhaka genderera okuhaba. ²⁶ Erhi Shetani ankahîva ebya shetani, erhi yene aali acilwisa; kurhigi obwami bwage bwankacigenderera okuhaba? ²⁷ Munaderhe mpu nampîveabazimu bulya Belzebuli ampire obwo buhashe, nndigi oha bambali binyu obw'okubahiva? Bambali binyu bone bayerekane oku muyazire. ²⁸ Okunali, Mûka gwa Nnamahanga ye mpiva mwo abazimu, ko kuderha oku Obwami bwa Nnâmahanga mira bwabayishiraga. ²⁹ "Ntamuntu wankaja omu nyumpa y'ow'emisi n'okumunyaga ebyage nk'arharhanzir'imushweka; aba amâyusa amushweka, lyo akahashaga okunyaga ngasi hiri omu mwage. ³⁰ "Oyu rhurhali rweshi naye erhi mushombanyi wani, n'orhantabala omukuja ashubûza erhi kushandaza ali ashadaza. ³¹ Co cirhumire namubwira nti abantu bahasha okubabalirwa ngasi caha na ngasi kanwa kabi baderha, cikone olog,orhera Mûka gwa Nnâmahanga arhâbabalirwe. ³² Onderher nie Mwene Muntu akanwa kabi ababalirwa, cikone ologorhera Mûka Mwimana arhababalirwe, oli muli gano mango oli omu mango, gayisha." ³³ Nka mulonzize mube n'ilehe linja, mugwawirwe mube n'omurhi mwinja, erhi ankaba mugwerhe omurhi mubi, ilehe libi mwankabona. ³⁴ Bulya omurhi gumanyirwa okw'ilehe gulehesire. ³⁵ Eri burha ly'enjoka, kurhigi mwankahasha okuderha ebinja n'obwo muli bantu babi? bulya akanwa kaderha ebi hagirine omu murhima. Omuntu mwinja omu muhako mwinja gw'omurhima gwqge arhenza aminja, n'omuntu mubi, omu muhako mubi gw'omurhima gwage arhenza amabi. ³⁶ Mmubwizire nti omu lusiku lw'okutwa olubanja, abantu banârhondobole ngasi kanwa ka bushabusha baderha. ³⁷ Bulya ebinwa byawe byo byatwa olwawe, biderhe erhi oyazire nisi erhi oyazize. ³⁸ Ago mango bashamuka baguma b'ihano na Bafarizaho baguma babwira Yezu mpu: "Mwigiriza , rhwankalonzize rhubone wajira ecisomerine." ³⁹ Yezu abashuza erhi: Iburha libi n'ely'endalya, lidwirhe lyalonza ecimanyiso, lirhanabone ecimanyisocirhali c'omulebi Yona. ⁴⁰ Nka kulya Yona ajiraga miregerege isharhu na madufu asharhu omu nda y'enfi, ntyo mwene muntu ashijira miregerege isharhu na madufu asharhu omu nshinda. ⁴¹ Abantu b'Eninawi bayishi ja mulubanja n'er'iburha, banaliyagirize, bulya baciyunjuziza erhi Yona abayigiriza, na olushire Yona yono oli hano. ⁴² Omwamikazi w'e Saba ashija lubanja n'ogu mulala, agubonese nshonyi bulya arhenzire e mwage kuli mpu agendi yunva obushinganyanya bwa Sa!omoni, n'olushiee Salomoni yono oli hano ⁴³ Nka omuzimu mubi arhenga omu muntu, anaje ageragera ahantu hayumire, aje alonza aharhamukira ahabule. ⁴⁴ 1Anaderha obwo, erhi: "nacishubirira omu nyumpa yani, omu narhenganga". Nerhi aciyisha anarhigane murhali ndi, ehyajirwe enabambirwe bwinja. ⁴⁵ Anagenda obwo arhole bandi bazimu nda babi kumulusha, n'erhi bayija mwo, banacilambuliremwo, n'oborhere bw'oyo muntu bwnaba bubi kulusha obw'oburhanzi. Kwo lyabe ntyo eri burha lirhajira lugero omu bubi". ⁴⁶ Oku arhajiyus'abwira abantu nnina na bene wabo erhi bakola bayimanzire embuga, balonza oku muganiza. ⁴⁷ Lero omuntu muguma anacimubwira erhi : "Nyoko na bene winyu bayimanzire embuga, badwirhe bakulonza." ⁴⁸ Obwo naye Yezu anacibashuza owamubwiraga erhi: " Nyama ye ndi na bene wirhu bwo bahi? ⁴⁹ Anacilambula okuboko oluhande abaganda bage bâli, aderha erhi, "Lola nyama na bene wirhu. ⁵⁰ Bulya ngasi yeshi ojira oku Larha oli omu mpingu alonza, ye mwene wirhu, ye na mwali wirhu, ye na nyama".