¹ Bene wirhu, erhi muguma ankagwarhwa ali jira okubi, mwe mugwerhe mûka Mwimana munamushubize omu njira nyinja. cikwone ayerekane okw'ali mutûdu. Nshubir'iderha ntyala, n'okwo nkubwizire ngasi muguma muli mwe, nti ocîlange wene. ² Murhwazanye emizigo. Ntyo kwo mwayumva mwo oku amarhegeko ga Kristu gadesire. ³ Erhi muguma ankagerêreza oku hali okw'ali n'obwo arhali kwo, erhi kurheba acîrhebire. ⁴ Mâshi ngasi muntu alole okw'ebijiro byage biyosire. Erhi ankacîkungira okwo, acîkunge,c'arhali kucîgerera oku bandi. ⁵ Bulya ngasi muntu agwasirwe okubarhula omushoko gwage yene. ⁶ Oli wayigirizibwa Emyanzi y'Akalembe agwasirwe agabane ebyage byoshi boshi n'oli wamuyigiriza. ⁷ Murhacîrhebaga muli ebyo, Nnâmahanga arhahalîzibwa. Ebi omuntu arhwera byo ananasarule. ⁸ Erhi ankarhwera ebisîmîsize omubiri gwage, og'omubiri gwamusarulisa olufu. Cikwone erhi ankarhwera ebisîmîsize Mûka mwimana, Mûka mwimana amusarulisa obuzine bw'ensiku n'amango. ⁹ Rhurharhamaga okujira aminja; Bulya erhi ankaba rhurharhamiri, rhwasarula hano amango gahika. ¹⁰ Co cirhumire amango rhunacigwerhe akasanzi, rhujirire abantu boshi aminja, ci kulusha rhugajirire bene wirhu omu bwemere. ¹¹ Mubonage emyandiko mirhunu njijire, kuboko kwani okwo mmuyandikire mwo niene! ¹² Abalonza okumuseza mpu mukembûlwe* lyo muja omu idini ly'abayahudi, bali bala balonza okucîyerekana bwinja oku biyerekire eby'omubiri . Cikwone bajijire ntyo kwone mpu lyo barhag'ishimbululwa erhi musalaba gwa Kristu gurhuma. ¹³ Abo baba bacîshwekire oku gw'okukembûlwa, bone bone barhayumva okw'amarhegeko* gadesire. Balonzize mukembûlwe mpu lyo bahasha okucîkunga erhi okwo kumuseza mpu mube n'eco cimanyiso c'okukembûlwa ko kurhuma. ¹⁴ Niehe, ntalonzizi okucîkungira ogurhali musalaba gwa nyakasane Yezu kristu, bulya kuli gwo kwo ebibi by'en'igulu nkola mbibona bya busha, birhankacînjira iga bulya nkola ndi nk'ofîre. ¹⁵ okukembûlwa* n'okurhâkembulwa byo na biguma. Okuba ciremwa cihyahya kwone kwo kukulu. ¹⁶ Bala boshi bashimbûlira eryo irhegeko omu bulamu bwabo, mbabwizire nti mâshi omurhûla gwa Nnâmahanga n'obwinja bwage bibe haguma nabo, na haguma n'ab'omu lubaga lwa Nnâmahanga boshi. ¹⁷ Mâshi omu mango gayisha ntaye wacindibuzagya, bulya enzigo zindi kwo, ziyerekine oku mba muja wa Kristu. ¹⁸ Bene wirhu, mâshi olukogo lwa Nyakasane Yezu lube haguma na nyinyu mweshi. bibe ntyo!