¹ Amango omwambali wa Nyamuzinda Musa amafa,Nyamuzinda abwira Yoshuwa mwene Nuni,murhabazi wa Musa mpu : ² Mwambali wani Musa oyu wamafa,oyumukage oshabuke olu lwinchi lw'e Yorodani n'olu lubaga,muje omu chihugo mpereze aba Izraeli. ³ Ngasi hoshi nji mwaja mbahereho,nka kulala nalaganyaga Musa. ⁴ Olubibi lwenyu lwagera oku mpinga,lugendekerere olunda lw'enyanya oku ntondo y'e Lebanoni,lugere eshiriza y'olwinchi lwe Efurata,lugendekerere emw'Abahiti,lwahika oku nyanja y'e Mediterane ebuzikiro bw'ezuba che chaba chihugo chenyu echola. ⁵ Ntaye nji wakuhima amango goshi njiwaba ozene,nabera haguma nawe nk'oku naliri haguma na Musa,ntakulekerera ntanakurhenga mwo. ⁶ Ochizene ona chizibuhire,bulala we wagabira ab'abantu echihugo nalaganyaga bashokulu babo. ⁷ Ochiseze ona zibuhe bwenene,okenge amarhegeko goshi,ojire kulala kw'omwambali wani MUsa akurhegekaga. Orhajaga eyi n'eyi ly'oku wajira kwoshi kuhikirira. ⁸ Okazi soma echitabu ch'amarhegeko burhahusa,okaziyibuka ezuba n'obudufu,ololereze n'okujira byoshi biyandikirwe mwo,na ntyo,wajirira enjira yawe njira y'emigisho n'okuba na ngasi kantu kinja. ⁹ Na kubwirire bulal'ochizene ona chizibuhire,orhayobohaga,orhanalubaga,nyono nye Nyamuzinda,Nnamahanga wawe,indi haguma nawe ngasi hoshi waja. ¹⁰ Yoshuwa abwira abali barongozi bw'olubaga mpu : ¹¹ Mugere omu kampi kwoshi,mulalik'abantu barheganye ebiryo bulala enyuma ly'esiku esharhu,mwashabuka olwinchi lw'e Yorodani kujirhola echihugo Nyamuzinda Nnamahanga wenyu abahere. ¹² Ago mango Yoshuwa abwira bene Rubeni na bene Gadi,n'echichira ch'omulala gwa bene Manase mpu : ¹³ Muyibuke kulala mwambali wa Nyamuzinda Musa amubwiraga,gala mango aderha oku Nyamuzinda Nnamahanga wenyu amuhere oluhumuko l'okubera omu chihugo abahere eshiriza ly'e Yorodani. ¹⁴ Bakenyu n'abana benyu,n'ebintu byenyu bibere hano Musa abahere oku lunda lw'e Yorodani,S'aliko abalume boshi n'abashaja,nji bager'embere za bene benyu balasha omu kushabuk'olwinji n'okubagwasa. ¹⁵ Kuhika amango Nyamuzinda abaha oluhumuko nk'oku nenyu nji mwamuha olw'okugwarha echihugo abahere. Enyuma ly'aho,mwagaluka mushubire omu chihugo chenyu mwambali wa Nyamuzinda Musa amuhaga oku shiriza lw'e Yorodani oku lunda ezuba lihulukira kwo. ¹⁶ Bashubiza Yoshuwa mpu : Rhwajira ngasi kwoshi orhubwirire,rhuje na ngasi hoshi wakarhurhuma. ¹⁷ Rhwakukenga nk'oku rhwakazigikenga Musa. Nyamuzinda Nnamahanga werhu abe haguma nawe,nkw'analiri haguma na Musa ! ¹⁸ Ngasi yeshi walahira oku arhakayunva oku waderha,n'okurhakenga okwarhegekere,bihemere ayirhwe.Ochiseze ona zibuhe.