¹ Muband'omu holere omu sayuni, mubandir'oku ntondo yani echesezwe ! abantu boshi bw'omu chihugo badirhimane ! Bulal'olusiku lwa Nahano lwa yinjire, bulala luli hofu. ² Lusiku lw'omwizimya n'omukara, lusiku lw'olwakungu n'omwizimya gunene, lwa yinja nka misek'eshander'oku ntondo. Talag'olubaga lunene n'obuhashe, na nta bandi bashwirigiba nka bowe omu bakulu. ³ Emalanga gage omuliro gulya, n'enyuma zage echirimbiko chikolerere; echihugo chali burhanzi nka busani bw'Edeni, na kurhenga mira, yaliri mpinga eli butambara : Ntacho cha mufumire. ⁴ Oku bonekana kwabo, kuli nka ndogomi, n'oku libirha kwabo nk'abashon'oku ndogomi. ⁵ Omu kubayunva, wanamenya nka lwamo lwa mituga y'entambala oku buchunjugurho bw'entondo ahabali bagera, wanamenya nka lwamo lwa muliro, amango guli gwayos'obukere. Kuli nka lusasa l'obuhashe lu chirheganyiz'oku ntambala. ⁶ Emalanga gabo abantu bana dirhimana, amalanga goshi gahindamukire mweru. ⁷ Bana jira duba nka balwi b'entambala, banashona oku lugurhu nk'abantu bantamabala, ngasi muguma eyage njira, buzira kurheng'omu barabara (muharuro ). ⁸ Barhana sukumana bonine oku bonine, ngasi muguma analang'omu sitari gwage; Banachilonzez'enjira dubaduba omu masasa, buzira kuyimanz'olugendo. ⁹ Banaj'omu chizungu, banalibirhir'oku lugurhu, banashon'oku nju, banagerer'omu madirisha nka chishambo. ¹⁰ Emalangambere gabo egulu lyana dirhimana, empingu za na dirhimamana, ezuba n'omwezi byanaj'omu mwizimya, n'enyenyezi zana lek'oku moleka. ¹¹ Nahano ayunvisikany'omulenge gwage embere z'enfola miherho; Bulal'akambi kage kali kanene, n'oku shinganyis'omwazi gwage oku buhashe; Bulal'olusiku lwa Nahano luli lukulu, lunali ludarhi : Nde nji wakagala lulinga ? ¹² Na kandi ntyo, ku Nahano aderhere, mugaluk'emwani n'omurhima gwenyu goshi, haguma n'okurhalya n'oku rhanywa, haguma n'oku laka n'oku rhimanya ! ¹³ Muber'emirhima yenyu s'arhali enyambalo yenyu,n'okugalukira Nahano,Nyamuzinda wenyu; Bulal'aba wa bonjo n'olukogo, mwirhonzi omu burhe na mugale omu bwinja, ana hungama oku mabi anarhuma. ¹⁴ Nde wa kamenya akaba arhaka chiyinja n'oku hungama, n'oku lek'emigisho, entulo z'eshano n'ezo kunywa enyanya wa Nahano, Nyamuzinda wenyu ? ¹⁵ Muband'omu holere e Sinayi ! Muyalagaz'oku rhalya n'oku rhanywa, n'empamagazi y'abantu boshi ! ¹⁶ Mugush'abantu haguma, mujir'endeko echesibwe ! Mugush'abashaja, mugush'abana, chiro n'abana bali bayonka ! N'omulume arheng'ahalama, n'omukazi omu ndalo yage ! ¹⁷ Abadahwa, abakozi ba Nahano balake aha kagarhi kw'olurhamba n'obululi, n'oku derha : Nahano, oyas'olubaga lwawe ! Orhanahanag'omwandu gwawe oku balibaderhwa, n'abarhambuzi bw'olubaga ! chakarhuma baderh'omu bantu : Nyamuzinda wabo aba ngahe ? ¹⁸ Nahano ajir'obongwa enyanya w'e chihugo chage, n'oku yas'abantu bage. ¹⁹ Nahano anashuza, ana derha n'abantu bage : Talaga, nji na barhumira engano, edivayi lihyahya n'amavurha, n'oku yuguswa nabyo, nta kana chibahana oku baderhaderha omu lubaga. ²⁰ Nji nabayasa n'omu shombanyi w'e karhongo, nji na balibisizy'ewa daho lirhayera n'omu mpinga, n'emalanga mbere gage ewa nyanja nkulu y'obushoshokero bw'ezuba, n'enyuma zage ewa nyanja nkulu y'ewa kulylama kw'ezuba; n'okubaya kwage nji kwaba elugulu, n'esimbu lyage libi nji lya shona elugulu, bula'ajirir'ebintu binene. ²¹ Gulu, orhayubahaga, obe omu bushagaluke n'oku chisimisa, bulala Nahano ajirire bintu binene ! ²² Nyama z'omushwa, mu rhayumbahaga, bulal'orhubanda rhw'empinga rhwamera dubadubd, bulal'emirhi yaba n'amalehe, omutini n'omuzabibu byahan'obugale bwabbyo. ²³ Nenyu, bana be Sayuni, mube omu bushagaluke n'oku chisimisa omu Nahano, Nyamuzinda wenyu, bulala nj'aba nvula omu mango gayo, nj'abarhumir'envula ntanzi y'oku hinga n'enzinda omu kushalula, nk'amandi mango. ²⁴ Enguli nji zabumba ngano, n'orhubindi nji rhwabumb'edivayi lihyahya n'amavurha. ²⁵ nji na bahinganir'emyaka yalibwaga n'emiguku, n'orhumogo, n'ebidudu, n'amahanzi, enfola miherho yani nkulu na rhumaga enyanya zenyu. ²⁶ Nji mwalya n'oku yuguswa, n'oku kuz'ezino lya Nahano, Nyamuzinda wenyu, wa bajirirag'ebisomezo; n'abantu bani barhaka chiba omu buhwinja. ²⁷ Nji mwana meny'oku ndi omu kagarhi ka Israeli, oku ndi Nahano, Nyamuzindda wenyu, na nta windi, n'abantu bani barha kachiba omu buhwinja. ²⁸ Oku buzinda bwe byo, nji na sheshera Muka wani oku bantu boshi, abarhabana benyu n'abanyere benyu nji baleba, n'abashaja benyu nji babona ebilorho, n'emisole yenyu nji bayerekwa. ²⁹ N'oku bakozi n'abajakazi, mwezo siku, nji na shesha Muka wani. ³⁰ Nji na yerekana ebisomezwe omu mpingu n'oku gulu, eshagama, omuliro, n'ebirimbi by'omuliro; ³¹ Ezuba nji lya hindamuka mwizimya, n'omwezi shagama, embere z'okuhik'olusiku lwa Nahano, olo lusiku lukulu na ludarhi. ³² Na nty'owehune ezino lya Nahano nja chunguka; obuchunguke nji bwaba oku ntondo ye Sayuni n'e Yerusalemu, nk'oku Nahano aderhaga, n'oku banji bafuma bana Nahano nja hamagala.