¹ Omwazi gwa Nahano gwa gerera Yoweli, mwene Petueli. ² Yunv'ebila, bashaja ! Rheg'amarhwiri, mweshi, mulam'omu chihugo ! Emyazi eri ntya ya bagerer'omu mango genyu, chang'omu mango ga bayisho ? ³ Muyibwir'abana benyu, n'abana benyu ba bwir'abana babo, n'abana babo nji babwir'abana babo nji bakulikiraho ! ⁴ Eby'amahanzi galekaga, emiguku ya bilire; Eby'emiguku yalekaga, orhumogo rhwabilire; eby'orhumogo rhwalekaga, byalibirwe na madumadu. ⁵ Muzuke, balalu, n'oku laka ! Mweshi, balalu b'edivayi, muyame endulu, enyanya y'edivayi mpyahya bulala ga kulirw'oku bunu bwenyu ! ⁶ Bulala lubaga luguma lwa yinjir'oku chihugo chani, luherh'emisi na lunene lurhakaganjwa. Luherh'amenyo nka shosho, ebihangasi bya shosho w'echikazi. ⁷ Abihiz'omuzabibu gwani; Avunir'omutini gwani, agulekere mushugunu, achago; Amarhabi gw'omuzabibu gabere mweru. ⁸ Olake, nka munyerenkana ochishukir'eshah'omu busole ! ⁹ Entulo y'eshano n'entulo y'oku nywebwa bya lahirw'omu nju ya Nahano; Abadahwa, abakozi ba Nahano, bali omu chiriyo. ¹⁰ Amashwa ga bihizwe, egulu yilya rhindibuka; Bulala engano za bihizwe, edivayi lihyahya lya kehere, amavurha gayumire. ¹¹ Abahinzi balubire, abakwizi be mizabibu mulake; enyanya w'engano n'eshayiri, bulala ebishalulo by'omu mashwa byaherere. ¹² Omuzabibu gwa yumire, omutini gwa kehere; mukomamanga n'omutende n'omutofaa; emirhi yoshi y'omushwa ya yumire...Obushagaluke bwahwer'omu bene abantu ! ¹³ Badahwa, murheng'eshagama n'okulaka ! Muband'endulu, bakozi bw'oku lurhamba ! Muyinje, mulal'obudufu boshi muyamber'eshaho ( mbwega), bakozi ba Nyamuzinda wani ! Bulal'entulo z'eshano n'entulo z'oku nywebwa za herer'omu nju ya Nyamuzinda wenyu. ¹⁴ Muyalagaz'oku rhalya n'oku rhanywa, empamagazi oku bantu boshi ! Mulund'abashaja, abantu boshi bw'omu chihugo, omu nju ya Nahano, Nyamuzinda wenyu, n'oku lakirira Nahano ! ¹⁵ Buhanya bw'olo lusiku ! Bulal'olusiku lwa Nahano luli hofu : Nji lwayinja nka kubihya kw'oherh'obuhashe. ¹⁶ Ebiryo birhakulwag'oku mesho gerhu ? Obushagaluke n'okusheka birharhengag'omu nju ya Nyamuzinda werhu ? ¹⁷ Emburho za yumir'omudaho; Enguli zili busha, enju z'oku bikiramo za bihire, bulala nta ngano. ¹⁸ Nk'ebirhungano birhindibukire ! Ebigusho by'enkavu birhagalukire, bulala birhaherh'erango; na ntyo ebigusho by'ebibuzi bili omu burhindibuke. ¹⁹ Nahano, yi nalakir'emund'oli ! Bulal'omuliro gwa yosez'orhubanda rhw'empinga, n'ebirimi by'omuliro bya yosez'emirhi yoshi y'omu mashwa. ²⁰ Ebirhungano by'omu mashwa yi byalaka na byo emund'oli; Bulal'eshoko za yumire, n'omuliro gwa yosez'orhubanda rw'empinga.