¹ Zedekiya abere ajira myaka ekumi ali oku burhwali, omu siku ekumi z'omwezi gw'ekumi, Nebukadeneza ayinja ahulumwir'engabo zage. ² Agorh'echishagala ch'e Yerusalema, ashing'echilalo omu muhanda gw'acho. ³ Omu siku mwenda z'omwezi, eshali lidarhi lyazuk'omu chishagala, abantu bashalika bwenene. ⁴ Enfola miherho z'e Babeli bashand'olugurhu lw'e chishagala lwarhoger'oku daho, enfola miherho zamo zayaka, zager'omunjira ebwa lunvi luli ahagarhigarhi k'ebizimbero bibiri ebwa shwa lya mwami. Bagerer'omu lubanda lw'e Yorodani chiro akaba engabo z'e Babeli bali gorhere echishagala. ⁵ Aliko enfola miherho z'e Babeli zashimbulira mwami Zedekiya zamugwarhira omu lubanda lwe Yeriko, engabo zage zamuleka bachiyakira. ⁶ Bagwarha Zedekiya bamushweka, bamuhekera mwami Nebukadeneza w'e Babeli e Ribula, bamushweka. ⁷ Bayirhira bene Zedekiya embere z'eshe, enyuma zaho Nebukadeneza arhula Zedekiya amasu, amushweka mo lukoba bamuhek'e Babeli. ⁸ Nebukadeneza aber'ajira myaka ekumi ayimire, omu siku mushanvu z'omwezi gwa garhano, Nebuzaradani yi wali chilongozi ch'engabo y'abalalizi n'omurhonyi wage aj'omu Yerusalema. ⁹ Ayos'aka Nyamuzinda, ayosa n'oburhwali n'ezindi nju zoshi z'e Yerusalema; bahir'omuliro okunju ziguma zigwerhe akachiro. ¹⁰ Entwaro zoshi z'aba Kalidayo zaliri haguma n'omukulu w'abalanzi, bashandaz'olugo lwalijirire omukaba gw'e Yerusalema. ¹¹ Nebuzaradani mukulu w'enfola miherho aheka abanya lubaga bali lamire omu chizungu, abali bajire emwa mwami w'e Babeli bali bayorhere b'olubaga boshi. ¹² Obola, omukulu mulanzi w'enfola miherho aleka ab'okulanga emburho n'abahinzi, baguma baguma bakene b'echihugo. ¹³ Aba Chalideniya bachagulanga enkingi z'ebyuma zaliri omunju ya Nyamuzinda n'omurhonderho Ereni yaliri omunju Ereni yabo yoshi e Babeli. ¹⁴ Barhola amasahani, efuka, orhwere, engumbu n'ebikoleso byoshi by'ereni bakazaga kolesa. ¹⁵ Omukulu mulanzi w'enfola miherho, ashubirhola, amabakuli n'engumbu, ebualiri by'ehoro n'efuranga. ¹⁶ Ezola nkingi ebiri, enyanja n'omurhondero Sulemani ali ajirire enju ya Nyamuzinda, ebyo bikoleso byoshi byaligwerhe obulemere burhamenyikene. ¹⁷ Obule bule by'eyola nkingi bwaliri makoro ekumi na munane, haliri enyanya erhwe ly'ereni, obulebule bwalyo bwaliri makoro masharhu, oku muzunguluko gw'elyola rhwe haliri omulaga n'egerenadi, byoshi by'ereni, hanaliri kona kuguma, oku nkingi ya kabiri haliri omulaga. ¹⁸ Omukulu w'abalanzi arhola Seraja, mudahwa mukulu; Sofoniya, mudahwa mukulu wa kabiri, n'abalanzi basharhu b'entebe ya mwami. ¹⁹ N'omu chizungu arhola musongozi muguma walirhegekerwe n'abantu b'entambala, balume ba rhano b'omu bahanuzi ba mwami b'omola chizungu, omwandisi w'abakulu w'enfola miherho, wali rhegekerwe okuganja olubaga lw'echihugo, abliri omu chizungu. ²⁰ Nebuzaradani, mukulu w'abalanzi abarhola abaherekeza emwa mwami we Babeli e Ribula. ²¹ Mwami w'e Babeli abashurha kuhika oku bayirha e Ribula, omu chihugo cha Hamati. ²² Nantyo Yuda ahekwa nka mushwekwa hale n'echihugo chage. Na Nebukandenezari, mwami w'e Babeli, ahiraho abayorhaga bw'olubaga, abaheka omu chihugo cha Yuda barhegekerwe na Guyedaliya, mugala w'Achikama, mwene Shafani. ²³ Amango abakulu boshi b'ebigusho bachiyunva, bowe n'abantu babo, oku mwami w'e Babeli ajirire Guyedaliya kuba murhegesi, bashimba Guyedaliya e Mitisipa bamenye Isimaheli, mugala we Netamiya,Yokamani mugala wa Kareyaka, Seraja, mugala Tinumati we Netofa, na Yazaniya, mugala wa Nakatiyeni bowe n'abantu babo. ²⁴ Guyedaliya ababwira n'obwalagale bowe n'abantu babo eri : Murhayubahaga chichi okulunda lw'abakozi baba Kalidayo, mugorh'omu chihugo, mukolere mwami w'e Babeli mwabona oku mwaba bwinja. ²⁵ Aliko omu mwezi gwa mushanvu, Isimaeli, mugala wa Netaniya, mwene Elishama, w'omubuko bwa mwami, ayinja aherekezwe na balume ekumi, ye shurhe omu bwemere Guyedaliya n'aba Yahudi, n'aba Kalideyo baliri haguma naye e Mitisipa. ²⁶ Obola, olubaga loshi kurhenga oku mudorho kuhik'oku mukulu, n'abakulu boshi b'ebigusho, ba yumuka, baj'e Misiri, bulala bali yubahire aba Kalideyo. ²⁷ Omwaka gwa makumi masharhu na mushanvu, g'okufarhwa kwa Yoyakimu, mwami we Yuda olusiku lwa makumyabiri na mushanvu mwezi gw'ekumi na kabiri, Avile-Merodake, mwami we Babeli, omu mwaka gwage gurhanzig'obwimo, ayumanza erhwe lya Yoyakini, mwami w'e Yuda, amukula omu mpamikwa. ²⁸ Amuderhesa n'obushagaluke, ahira oburhegesi bwage enyanya w'oburhegesi bw'abami baliri haguma naye e Babeli, ²⁹ Bamuhindamulira emyambalo yage y'omu mpamikwa, na Yoyakimu alira haguma naye oku Lwibo lwage esiku zoshi z'akalamo kage. ³⁰ Mwami amuherez'oluhembo lumushinganene ngasi lusiku, amango goshi g'akalamo kage.