¹ Enyuma z'okufa kwa mwami Ahaba. Aba Moabu bagomera Israeli. ² Mwami Ahazia aber'ali omunju yage ye Gorofa e'Samariya, arhog'omu dirisha avunika; arhum'entumwa emwa Bali-Zebubu nyamuzinda w'Ekuroni, bamubaze akaba anachifuma. ³ Aliko Malayika wa Nahano ayinja abwira Eliya we Tisibe mpu: Bangula obwir'entumwa mwami Ahaziya arhumire, ka Nyamuzinda arhachiri omu Israeli obo mwajaga dosa emana Bali-Zebubu ye Ekuroni? ⁴ Lero Nyamuzinda aderhere okorhazuka kw'eyo nchingo, s'aliko wafa. ⁵ Ezo ntumwa zachigalukira, mwami abadosa: Bichi birhumire mwagaluka? ⁶ Bamubwira mpu rhwamabugana muntu muguma, amarhubwira mpu rhugaluke rhujikubwira mwami warhurhumaga oku Nyamuzinda aderhere ntya: Ka Nyamuzinda arhachib'omu Israeli obo wajidosa Bali-Zebubu, enama y'Ekuroni? Enyanya z'oko, orhachizuka kw'eyo nchingo, alik'okuli wafa. ⁷ Mwami abadosa; oyo muntu mwa shimanag'omunjira waba bwiraga eyi myazi, gur'aliri? ⁸ Bamushuza: Waliha, aliyambere emyenda y'oluhu n'omukaba g'oluhu omu chibuno. Mwami aderha: Mpu Egoo ola Eliya oyo, we Tisibe. ⁹ Honaho mwami arhuma omukulu w'enfola miherho na nfola miherho makumi marhano mpu bajilonza Eliya. Bazamuk'oku ntondo, bashimana Eliya ayiker'oku busoso bw'entondo. Oyo mukulu w'enfola miherho amubwira: W'oyo muntu wa Nyamuzinda, mwami aderhere mpu oyinje. ¹⁰ Eliya amubwira, akaba ndi muntu wa Nyamuzinda, omuliro gurhog'enyanya gukusireze n'enfola miherho zawe. Okuliguma omuliro gwarheng'enyanya gwabasireza boshi. ¹¹ Oyo mwami ashubi rhuma kandi mukulu w'enfola miherho, na nfola miherho makumi marhano. Oyo mukulu amubwira, w'oyo muntu wa Nyamuzinda, mwami aderhere mpu yinja bona buno. ¹² Eliya amubwira, akaba ndi muntu a Nyamuzinda, omuliro gurhog'enyanya gubasireze n'enfola miherho zawe. Okuliguma omuliro gwarheng'enyanya gwabasireza boshi. ¹³ Oyo mwami ashubi rhuma owakasharhu n'enfola miherho makumi marhano bazamuk'oku ntondo. Aber'alangira Eliya, afukama embere zage amushigirira amubwira: Mulebi wa Nyamuzinda, akalamo kani n'akaba bambali bawe, eyi ngabo ya makumi marhano, okolamire mani waliha. ¹⁴ Menyere bwinja ok'omuliro gwarhoga g'enyanya gwasireza aberhu babiri n'engabo egana. Aliko wekalama we olamire akalamo kani. ¹⁵ Malayika wa Nahano abwira Eliya mpu: Orhayubahaga, chima haguma naye. Eliya achima haguma naye emunda mwami ali. ¹⁶ Amubwira mpu: Nyamuzinda aderhere mpu buno wagendaga kudos'emana Bali-Zebubu y'eEkuroni, mpu ka nta Nyamuzinda w'okuli ochiba omu Israeli bankadosa! Aderhere ok'orhachifuma wafa! ¹⁷ Ahaziya afa, nk'oku Nahano anarhumaga Eliya. Mwami Ahaziya arhaliburhire murhabana, mulumuna wage Yoramu ayima ahali hage. Ogo go gwali mwaka gwa kabiri owabo Yoramu naye mwene Yosafati aliyimire omu Yuda. ¹⁸ ebindi bijiro mwami Ahaziya ajirire biyandikirwe omu chitabu ch'ebyakazagi jirika ch'abami b'omu Israeli.