¹ Echanda chahisize myaka esharhu chiri,Nyamuzinda abwira omulebi Eliya ntya : Genda ojichiyerekana emwa mwami Ahaba,bulala nkola na rhoza envula kw'eri daho lya yumukire. ² Eliya agenda ajichiyerekana emunda Ahaba ali.Eshalilikomere lya liri omu Samariya. ³ Ago mango mwami Ahaba ahamagala Obadiya,bulala yi waliyimangire emikolo y'omu bwami.Oyo Obadiya akazagi kenga Nyamuzinda bwenene; ⁴ N'ago mango li Yezebeli ahonjangaga abalebi ba Nyamuzinda boshi,Obadiya arhola balebi egana,alema ababisha makumi marhano,marhano omu lukunda,alema abahebera mw'ebiryo n'amenji. ⁵ Ahaba abwira Obadiya ntya : " Ogende ogeregere omu chihugo choshi,oleme walolereza ahali e firiti chango ahali echijaga;akaba rhurhakabona ahali ebirhi rhubilerhere e farasi n'e punda bilekifa n'eshali,rhwankabaga burhalalira." ⁶ Bagaba gurhe bagenda,Ahaba yenine agera lunda luguma,na Obadia agera olwindi lunda. ⁷ Obadiya abere akola ali omu njira ali agenda,tundu ku Eliya,Obadiya amumenya,afukama emalangambere mage amudosa ntya : " Ka we nawerhu Eliya ? " ⁸ Eliya ashuza ntya : " Nechi nyono,ogende ojibwira nahamwenyu mwami Ahaba oku Eliya ayinjire." ⁹ Obadiya ashuza ntya : " Bichi najirire obola okola wantuma emwa mwami Ahaba mpu ankule m'omuka ? ¹⁰ Ndahire,nk'oku Nyamuzinda Namahanga wawe alamire,oku ntaho mwami arhasagirhuma,omu mashanja n'omu mami moshi mpu balema bakulonza,na nka mwami wa mw'echola chihugo akarhuma okw'orhali emwage,Ahaba anarhuma mpu achigashe akaba kubinali arhakubwene. ¹¹ Bobo okola waja wa mbwira mpu ngende bwira nahamwerhu mwami oku na kubwene ! ¹² Lero hano rhulekana Muka gwa Nyamuzinda akuheke aha ntachimanyere; oku bundi,nji najibwira Ahaba oku wainjire,nka arhachikubwene,anayinji nyirha. N'obo kurhenga omu busole bwani nyorha nyubaha Nyamuzinda. ¹³ Nahamwerhu,ka barhakubwiraga gurhe najiraga amango Yezebeli alemaga ayirha abalebi ba Nyamuzinda ? OKu nabishaga balebi egana,nalema nabisha makumi marhano,marhano omu lukunda,nalema anabalerhera mw'ebiryo n'amenji. ¹⁴ Nawe wamagalimbwira mpu nji bwira nahamwerhu oku Eliya ayinjire ! Ajayinji nyirha. " ¹⁵ Aliko Eliya amushuza ntya : " Nk'oku Namahanga Nyamubaho alamire,ye Nyamuzinda w'engabo nkolera,na chiyereka Ahaba zene. " ¹⁶ Eri Obadiya abona oku Eliya anayemerere,ajibwira mwamiAhaba,Ahaba aja ahola Eliya ali. ¹⁷ Ahaba abona Eliya amubwira ntya : " Ka w'olala oli walerha obuhanya omu Israeli ? " ¹⁸ Eliya amushuza ntya : Ntagwerhe buhanya omu chihugo,s'aliko webuherhe haguma n'obo mumulala gwawe,bulala murhachikenga amarhegeko ga Nyamuzinda,mukola muhera eshushano Baali. ¹⁹ Orhume abaganda bashubuze aba Israeli boshi hano ndi oku ntondo y'e Karemeli,ohamagale na balala balebi magana mane na makumi marhano b'eshushano Baali na balala magana mane b'enama-kazi Ashera,balamire n'okulira haguma na Yezebeli. ²⁰ Ahaba ahamagala emilala yoshi y'aba Israeli,ashubuza n'abalala balebi baja oku ntondo y'e Karemeli. ²¹ Ntyo ku Eliya ajire embere z'abantu boshi,ababwira ntya : " Kuhika mango chi mwagendekera okuba nderhera habiri ? Akaba Nyamuzinda ye Ninamahanga w'okuli,mube yi mulema mwa murherekera,n'akaba Baali yi mubwene oku ye Namahanga w'okuli mulemage mwa murherekera ! " Abantu barhamushuzaga mwazi. ²² Eliya ashubi derha ntya : " nyenine nashiba omu balebi ba Nyamuzinda,s'aliko abalebi ba Baali bali magana mane na makumi marhano. ²³ Barhulerhere mpanzi ebiri hanola, bachishoge mu nguma, bayichochange bihinga bihinga,bayirhabike oku shali,bayihane nterekero,buzira kuchana omuliro;Nani narhola eyindi nyirheganye,nyihire oku shali nyi hane nterekero buzira kuhira mo muliro. ²⁴ Buzinda bw'ahola,muleke abalebi ba Baali babarhangage hema eshushano yabo,nani nji nayinja hema Nyamuzinda,rhulole owankalerha omuliro erhi ye Namahanga w'okuli. Abantu boshi bayemera baderha mpu : Biri binja! ²⁵ Eliya abwira balala balebi ba Baali ntya : Bulala mwe banene,mubage mwaba mwe murhonderage,murhole mpanzi nguma muyirheganye,muheme eshushano yenyu s'aliko murhachanaga omuliro oku shali. ²⁶ Barhola elala mpanzi banabahaga,barheganya oluherero, bahema Baali kurhenga esezi kuhika ahagarhi k'ezuba,eri bali baderha mpu : Baali orhushuze ! S'aliko barhuyunvaga mulenge nta shuzo; Banalema babalala oku luherero lwabo bayumbakaga. ²⁷ Aha garhi k'ezuba,Eliya abachinaguza,aderha ntya : Muleme mwayakuza bwenene,bula Baali namahanga,kwa kanaba eri ali akengera ebindi,chango eri hali emunda ajire,chango eri abalamire,chango eri alyamire,ankanazuka. ²⁸ Balema bayakuza bwenene,bana chicha n'orhwere n'amachumu bulala bobwana liri borhere bwabo nka barherekera,kuhik'eshagama yabadwako. ²⁹ Ezuba lyabere lyamahwa,balema bayakuza n'okuchichagulanga,bagendekera ntyo kuhika omu kasanzi bahana mw'enterekero y'egolo. S'aliko barhabonaga shuzo eri omu nderho eri omu chijiro. ³⁰ Ntyo ku Eliya abwirire olubaga loshi ntya : " Muyinje hano ! " Boshi bamushimba.Eliya ashubi yumbaka oluherero lwa Nyamuzinda babaga bashandazize. ³¹ Arhola mabale ekumi na mabiri nk'okw'emilala ekumi ya bene Yakobo enali,olala Nyamuzinda anashembulaga ezino lya Israeli; ³² Agola mabale g'ayumbakire mw'oluherero omu zino lya Nyamuzinda;Aluzungulusa kw'omufulege gwa kahwera mu milengo ebiri y'emburho eburhambi. ³³ Arhondeka eshali oku luherero,achagulanga elala mpanzi bihinga bihinga,ayihira kw'ezo shali. ³⁴ Buzinda bwaho,abwira abali aho ntya : " Mubumbe rhubindi rhune menji,mu masheshere kw'eyo nyama na kw'ezo shali." Ashubi derha mpu bajire ntyo obwa kabiri n'obwa kasharhu. ³⁵ Ago menji malema mashululira eburhambi b'olo luherero loshi mayunjula mugulala mufulege. ³⁶ Amango g'okuhana enterekero mahikire,Eliya ashegera embere y'oluherero,aderha ntya : " Nyamuzinda Namahanga wa Aburahamu,na Isaka na Yakobo,oyerekane okw'oba Namahanga w'aba Israeli,n'okumba mwambali wawe,n'abantu bamenye oku we wanali nterekere oku njire ebila byoshi. ³⁷ We konkwa Nyamuzinda onshuze,onshuze ly'aba bantu bamanye oku we Nyamuzinda,weba Namahanga w'okuli,n'oku wenyine wamabahindamula emirhima yabo bashubire omu mushingo gwabo gwa mira ! " ³⁸ Ago mango omuliro gwa Nyamuzinda gwa manuka omuchanya,gwa singonyola ayola mpanzi y'enterekero na zilala shali,na galala mabale maliyumbakire oluherero n'edaho,n'amalala menji maliri omu mufulege mayuma. ³⁹ Olubaga loshi lwabere lwabona ntyo,bayinamira amalanga mabo oku daho baderha ntya : Nahano ye Namahanga w'okuli, Nahano ye Namahanga w'okuli ! ⁴⁰ Eliya abwir'abantu mpu : Mufarhe abala balebi ba Baali, ntaye mulekage ! Babafarha boshi babaheka omu chijaga ch'e Kisoni, aba yirhiramo. ⁴¹ Lusiku luguma Eliya abwira mwami Ahaba ntya : " Ogende,olye,onanywe; bulala namayunva nk'envula yamarhondera kukungula . ⁴² Ahaba agenda,alya ananywa,s'aliko Eliya aja oku busoso bw'entondo ye Karemeli,afukamira oku madwi,alema alola oku daho. ⁴³ Abwira omwambali ntya : Ogende olole ebwa mashinji. Oyo mwambali agenda,agaluka aderha ntya : Ntacho mbwene. Eliya amubwira mpu : Ogende kali mushanvu,agaluka. ⁴⁴ Oku bwakali mushanvu,aderha ntya : Nabwene ehyo lwakungu lwarhenga omu nyanja hilehere nka fune y'omuntu.Ago mango Eliya amu bwira ntya : Ogende obwire mwami Ahaba okw'achirhegenye arhole engale yage agende,ly'envula eleke mubuza aha gera. ⁴⁵ Enyuma hityu,echichu chayinjaga n'omuhusi chayiraguza enkuba,envula nene ya rhoga eri na Ahaba ali oku ngale yage,ashubira e Yezereheli. ⁴⁶ Emisi ya Nyamuzinda yaliri haguma na Eliya,akenyera omukaba gwage bwinja,alibirha ashokolera mwami Ahaba omu mahulukiro m'echishsgala ch'e Yezereheli.