¹ Ebibonekezi bya Yesu Kiristu, ahabwaga na Nyamuzinda abiyereke abakozi bage oku hali ebintu birhalegama kuyinja jubajuba, naye yewe abirhuma oku maboko ga malayika, abiyereka omukozi wage Yohana. ² Yohana ahamiriza omwazi gwa Nyamuzinda, nobuhamiriza bwa Yesu Kiristu, kubilala byoshi abwene. ³ Ragi lya balala basoma noku yunviriza emyazi yobula bulebi, nokufarha ebiyandikirwe mo, bulala akasanzi kali hofi. ⁴ Yohana, kugalala makanyamuzinda mushanvu ge Azia, olukogo n'omurhula bibe emwenyu, birhengerera emolala oliho, kandi analiri ho kandi yinjo wana baho, zinarhenga emyuka mushanvu eli emalanga mbere gekichumbi chage chobwami, ⁵ kandi birhengerera emwa Yesu Kiristu, muhamiriza mwemezi, luburho lurhanzi lwaba fire, anali mukulu wabami begulu, yewe arhusima noku rhushuka ebyaha byerhu omu kagarhi keshagama yage, ⁶ n'oku rhuha obwami, nabagingi ba Nyamuzinda n'eshe, obukuze n'obukulu bugwerhwe naye emyaka neyindi. Amen. ⁷ Lola, njo ayinja omu bichu, nankasi su njo lyamubona, nabala bamushingaga echumu nemilala yoshi yegulu njo ya siririzwa enyanya zage. Nechi, Amen. ⁸ Nyono ndi Alufa na Omega, murhangiro n'obuzinda, aderhere Nahano Nyamuzinda, olala oliho kandi ana liri ho, yinjo wana yinja ogala byoshi. ⁹ Nyono, Yohana mwene wenyu nolala oshangira haguma nenyu obulibuze n'obwami nokulembera kwa Yesu Kiristu, naliri oku kirwa kihamagalwa Patmos enyanya yo mwazi gwa Nyamuzinda n'obuhamiriza bwa Yesu. ¹⁰ Naliri omu muka olusiku lwa Nahano, nayunva omulenge gunene enyuma zani, nka gw'empanda. ¹¹ Gwa derha, ebila oherhe wabona obiyandikeomu chitabu, obihekere gala makanyamuzinda mushanvu: oku Efeso, haguma na Simirna, haguma na Pergamum, na Thiatira, haguma ma Sardi, haguma na Filadelfia, haguma na Laodikia. ¹² Nahindamuka omu kulola ogo mulenge guli gwa derha haguma nani, nchi yusi hindamuka nabona binara mushanvu bikolerere nka oro. ¹³ Aha kagarhi kebyola binara, nabona mo muntu lwiganyo lwa mwene omuntu, ali yambere emyambaro egerere oku magulu gage, ashwekere n'omukaba gwe oro omu chifuba. ¹⁴ Erhwe n'enviri zage zaliri zo mweru, nka lubula namasu gage nka lwenge lomuliro. ¹⁵ Amagulu gage galishushire nka mulinga gukwizizwe omu chibeyi, n'omulenge gwage gwaliri nka mulenge gwa menji ganene. ¹⁶ Naye alifarhire nyenyezi mushanvu omu kuboko kwage kwe kulyo, n'omupanga gukalihire gwa mogi mabiri guhulukire omu bunu bwage, namalanga gage galiri nka zuba lichanire oku misi yage. ¹⁷ Nyono nabere namubona, nachikuba omu magulu gage nka muntu ofire. Ampeba kokuboko kwage kwe kulyo, aderha, orha yubahaga, nyono ndi woburhanzi nowobuzinda, ¹⁸ nolala mulamu, nyono nali fire, jaga walola, ndi mulamu emyaka neyindi. Na ngwerhe enyigizo zolufu nezomu shinda. ¹⁹ Lero, oyandike ebyola wabwene, nebila binaliho, nabilala njo byabaho enyanya webila. ²⁰ Ehwe lyezola nyenyezi mushanvu wabwene omukuboko kwani kwe kulyo, nabilala binara mushanvu bye oro: ezo nyenyezi mushanvu bali bamalayika mushanvu bagalala makanyamuzinda, nebyola binara mushanvu gali makanyamuzinda mushanvu.