¹ Mbali na kotoka, wa sumboka ko motanga ande Baeki bande na koonda we. ² Botu ya sabato na ko engama, waika na konangola mo lumba ya bosonganeo. Iboka ya bato si baa ba n'ngbanga we bo na ko sangala ke ba ena:"Ono ya luleyaki we kokoni? Eno m'ngbengbele ya eselekaki we na nani, eke mano maondi ma manii-nii moota-we ikai tchei?" ³ Abuwa moto si owa wa mekambo ya m'mbao, mana Maliya, mana nina Yakobo, na yose, na Yuda, na Simona? Bena batamba bande babuwa n'nkati ito aabono-i?" Aikangi kowa kabo namuna wa ko kandekesa-we. ⁴ N'ndi Mbali na koéna nabo : "Molondoi wo ophendekangai wo ophendekangai ko motanga ande, n'nkati ya baboti bande bena n'nkati ya lumba yande". ⁵ Ko motanga yande, utatanga ande maondi ma manii-nii n'ndi wa tangi maako ko metchwe ya bato bamo ba n'so ke baonda. ⁶ Eke wa sangala bondiya bita-akowanga ande we. Mbali na ko eta eta ko metanga ya kaowa kaowa ambe wo ofundisha bato. ⁷ Eke wa eta baa ikomi na babe, we na kotoma bo babe babe, wa esa bo tchekamba tcha ko longeya mesombo ya beya beya. ⁸ Wa ekesa bo mbe bitebiyangi ango tchesima mo ondo yabo, kosakolo lofimbo ya koenda nayo; buwa ango mokati, ango katunga, ango beeya mo iteke; ⁹ n'ndi ba bate mapapa lika ko mao, babuwa kobiya n'tulu ibe. ¹⁰ EKe wa ena na bo : "Ko malumba mamo maa mo ko n'ngeya bane, tchumanai moo bena kowa ekatoka bane moo. ¹¹ Aika m'mba asima amo bato bitepokee bane ama bite m'mgbe bane, tokai noo, eke tchitchai ibunge ya mao mino, ambe yaike n'nembe mbe baetangi moo". ¹² Bo na kiya, eke bo na ko nangola ambe bato ba kalanganye. ¹³ Bo na ko benga mesombo ya beya beya ya buwa, eke ba isela abto ba n'so makuta bo na ko onda. ¹⁴ Mokota Erodi na ko m'mgba okuku ya Mbali, bowa ya lombeselekanga lina ande, eke wa ena mbe: "Yoani mon'nyi wa kato wa fufukakei, mo bowa yoota we maondi ma manii-nii". ¹⁵ Baphe ba ikangai na ko ena, ikai Eliya. Baphe ba ena: "Ukai. molondoi m'mba omo wabo". ¹⁶ N'ndi Erodi, a mgbanga we maondi si ke wa ena mbe:"Ikai Yoani owa na bukanga we ikoti. Wei wa imokakei". ¹⁷ Bondiya Erodi omunei wa kandesanga Yoani, wa kanda kanda we ko mo ololo bondia Erodiade, mokala nduku wande, bondiya wa songangai-we, ¹⁸ Bondiya Yoani wa enangai nande mbe : Itefoe ande kosonga mokala nduku wabe". ¹⁹ Erodiade wa soma na Yoani, eke wa ema ko iyesesa we. ²⁰ Eke uta ko kolanga ande bondia Erodi wa tinangai Yoani, wa ebakangai mbe uki moto omo wa tchaa na mopheneni; wa langangai we, bena maili ya komgba we, wa ikangai na bowa, wa ikangai na komgba we na ome. ²¹ Maili si osu omo osaali na kula, Erodi mo ko tumanya osu ya koboteka kande wata tchembe tcha ema wa eta mekota ya ba sola na melombiya ya Galilaya. ²² Moseka ya Erodia wa n'ngeya mo tcheombe ke wa sambowa, n'sambo yande ya lengesa Erodi bena baa boose ba etekanga mo tcheombe. Mokota wa ena na moseka: Omba noo tchoose si tchea tcho ko ema owe, no ko esai owe tcho". ²³ Eke wa ena na ko kobesa maoki mande:"Tchesima tchoose si tchokoomba owe no ko esai owe tcho, ango aika botuku ya bokota yane, no ko esai owe yo. ²⁴ Moseka na ko omoka koanya, wa ena na nina:"Neombe tchei?" Eke nina wa ena :Omba motchwe ya Yoani Monyei. ²⁵ Moseka na koololoka mo ko sumboka kowa ka mokota, na ko moesa we n'kasa yande moseka si oono: "Neemei mbe weese noo mo eneeke motchwe ya Yoani Monyei kiyo saani". ²⁶ Mokota yaika na obaba; n'ndi bondiya kilapo tchete-we boso na baeteki, uta engamanga kae na ko lingoleya we. ²⁷ We na ko toma aowo aowo sola omo kiya ko buka motchwe ya Yaoni Monyei. ²⁸ Sola si ooyo na kiya ko buka motchwe ya Yoani mo lumba moololo, na kota yo mo kiyo na saani. Eke wa esa yo ka moseka si oowo, ke moseka si oowo waa kiya kosiya yo ka nina. ²⁹ Baeki ba Yoani, aabowa am'mgbanga bo bondi si, ke baya kobiya mobe mo kiya kolkea yo. ³⁰ Baeki, na kiya ka Mbali, ko saoleya we maa mete-we na maa mefundishe-we. ³¹ Mbali na ko ena na bo : "Tiyei kaowa asima a bii, m'mba to ko omona kambu. Bondia aikangi na bato ba kiya na bato ba kula, eke n'nyanga ya koanga ita ikanga kae". ³² Bo na kiya mo waato mo kiya asima a bii. ³³ Bato ba buwa ba mona buwa okiya bo, eke baeba bo, eke metanga yoose yaya obeyo ba eteya bo mo mboka ba koma boso nabo mo boikaneo si owa yokiya bo. ³⁴ Mo ko kimeya ase, Mbali wa mona motuka ya bato, eke wa m'ngbeya bo tchombo, bondia ba ikangi m'mba mekoko eya yo buwa na motchungi wabo; eke wa ika mo ko nangoleya bo maondi ma buwa. ³⁵ Bowa a etanga n'nyanga, baeki na ko bakameya we, ke ba ena:"Boikaneo si oono ikai tchebandjala, n'nyanga ya etake sino; ³⁶ sumbola, m'mba bokiya mo bakambi na metanga ya aiye iye, mo koowa ango kasima ka koanga". ³⁷ Mbali na koena nabo: "Bane nine a esai bo melali". Eke ba ena nande: "Teengamei na koowa mekati ya miya ibe-i, ambe baange-i?" ³⁸ Ke wa ena nabo:"Bika na mekati inga? Komonei. Baakowa, eke ba ebesa we:"Mekati itano na m'fe ibe".' ³⁹ Wa ena mbe tai bo metuka metuka baike ase ko maangala, ⁴⁰ bata iki bo motuka ya miya na motuka ya n'kama itano. ⁴¹ Wa bunda mekati si eeyo itano na m'fe ibe wa m'mbola kabei na kiyo, we na ko kombowa Ise. Eke, we na ko buka mokati, ke wa esa yo ko baeki ambe ba baanye yo ko bato. Ke wa baanya kae m'fe si eyo ibe ko bato boose. ⁴² Boose ba angangai na baikotangai, ⁴³ ba biya totunga ikomi na tobe ta mekati na m'fe eya ya sianga . ⁴⁴ Baa baanganga n'nkati ya bo aikanga baome elfu itano. ⁴⁵ Maili na aowo wa ena na baeki bande mbe kalai oso okonge ya ibe, ko motanga Betesaida, ambe omune oobalanganesa bato. ⁴⁶ Maili wa ko balanganesa bato, ke wa linya ko mokondi mo kiya kosombola. ⁴⁷ Iyo ko engama, waato ika n'nkati ya iyaba, Mbali wa siangi mo okonge. ⁴⁸ Wa monangai mbe ba ikangi na n'tale; mo koisa waato na boso bondiya mophopho na n'ngumba yo sumbolangai waato na maili. Ko matcheleo ma botu, ke waonda bo, ambe o koenda kiyo na maale, waphana ko etanea bo. ⁴⁹ Abowa amonanga bo mbe wo ko enda kiyo na maale, baisa m'mba ikai ikiyo, ke bo na koakaya. ⁵⁰ Aabowa amonanga boose bamoni-we, ba teka teka na kotina. Aowo aowo Mbali na koena nabo mbe:"Ebai mbe, ikai noo, buwai kotina!" ⁵¹ Wa onda bo ke wa kimeya mo waato, mophopho na ko tunga. Baika mo bemine na bowa, ba ika na kosangala. ⁵² Bondia bitaebanga ande bondi ya ko buwa ka mekati mo isina ya metema yabo ya talala. ⁵³ Maili wa kokala iyaba, ke ba sumboka ko motanga ya Genezaleti, ba sekangi moo. ⁵⁴ Mo ko kimeya kabo ase, bato baeba Mbali, ⁵⁵ mo ko enda kande mo beikaneo boose, ke balulea we na bato ba n'so ambe bebiye bo ko motanda asima yoose aabowa aikanga we. ⁵⁶ Asima yoose aabowa akomanga we, ko metanga n'nyango n'nyango, metanga ya ema ema, metanga ya n'konda, bala na bato ba n'so bata bo mo obanja, ke ba ena nabo ambe babunde ango iphophu ya n'tulu yande, boose si baa boose kae ba bundanga iphaphu ya n'tulu yand, boose na koonda.