¹ Botu ya tchenana, Mose na koeta Alona, ke na bana bande baome, na bakolo bato ba isalaele. ² Waena na Alona : BUndesa n'ngombe eno mondiya koaba yo lifaefi ya ko soola, na mokoko omo ya amoome, yauwa koika na alama ango omo wa beya mo yoose, ke abaiyo boso na Mokolo. ³ Okoini na bana ba isalaele, ke okoeni na bo boobo : Bundesi m'mboli yaamoome, mo koaba yo lifaefi ya ko soola, n'ngombe na maana wa mokoko, ika mo tchemo tchemo, ke yauwa na alama wa beya. ⁴ N'ngombe na mokoko omo ya amoome, koabayo mo mekambo ya n'ngbengbele, mo isina ya koaba yo boso na Mokolo ; ke lifaefi ya ko teleka na makuta. Mondiya moono botu Mokolo we okouleyai bane. ⁵ Ba biya boso ya lumba ya ilonga eeya yoose Mose waenake ; ke bato boose ba songana, ke baimana boso na Mokonga. ⁶ Mose na koena : Booti eeya Mokolo waenake ; Ke okuku ya Mokolo ya monekeya bane. ⁷ Mosewaena na Alona : Susa kookono baka baka na asima ya ko lekanesa : Aba lifaefi yabe yako soola mo eeya yokoaba owe, ke ta mokambo yabe ya lifaefi ya kotoesa ; mondiyabe na bato babe ; ta kae lifaefi mondiya baphfe bato, tayo mondiyande m'mba Mokolo waenake. ⁸ Alona na ko bakama asima ya ko lekanesa, ke wa tchindja n'ngbo motchwe mondiya lifaefi ya ko soola. ⁹ Ke bana ba Alona ba moesa we makiya ; ke wata monywe yande o makiya, na koiteya o maseke mo asima ya ko lekanesa, ke wa balanganesa makiya o mao ma mesa. ¹⁰ Wa lekanesa mo mesa maila, touma ta boloko na befafala ba n'nyama, m'mba bowa Mokolo waenanga nande Mose. ¹¹ N'ndi wa lekanesa yo kaowa na kaya kowa mo kambi okoba namonuku. ¹² Wa tchindja n'nyama ikoti,baana ba Alona nako moesa we makiya, ke waiteyaiteya yo kaowa kaowa na mesa. ¹³ Ba moesa we n'nyama ya lifaefi ye bukeke mela ibe, asima amo na motchwe, ke wa lekanesa yo mo mesa wa masomboli. wa soola mesolosolo ke na malu, wa lekanesa kiyo na mesa na eeya yaeselekake m'mba lifaefi. ¹⁵ Maili ke waaba yo ko bato. Wa biya m'mboli yaamoome mo koaba yo m'mba tchesima tcha kotoesa kobeya ka bato, wa tchindja ikoti, ke waaba yo mondiya bato, m'mba n'nyama ya kokpa bosoboso. ¹⁶ Waesa lifaefi, koondesana na baangile si baa batelekanga. ¹⁷ Waesa lifaefi, ke wa biya emo, ke wa lekanesa mo mesa, ephfe lifaefi na m'mpendu yoose. ¹⁸ Wa tchindja ikoti ya n'ngombe na mokoko ya amoome, mo lifaefi ya mekambo ya n'ngbengbele ya bato. bana ba Alona nako moesa we makiya, na koiteyaiteya yo kaowa kaowa na mesa. ¹⁹ Wa moesa we makuta ma n'ngombe na mokoko ya amoome, mokiyo, makuta ma mesolosolo, towuma ta m'mpondjo, na befafala ; ²⁰ Baisela makuta mo m'mbele, ke wa lekanesa makuta mo mesa wa mafaefi. ²¹ Alona wa nyengesa obalu omo ke baphfe obalu siowa ophfe boso na Mokolo, m'mbele na betuli baimane, m'mba bowa Mose waesanga isosa si. ²² Alona wa yayowa maako mande kiyo ke wa nyolosa mo kowa ika bato, ke waandja ko liphfeya bo, ke maili ya koesa lifaefi ya ko aba mo n'ngbengbele. ²³ Mose na Alona, na kon'ngeya n'kati ya lumba ya ilonga. Mo koomoka kabo, ba liphfeya bato. Ke okuku ya Mokolo ya moneka boso na bato. ²⁴ Kaya na koomoka boso na Mokolo, ke ya lekanesa mesa wa mafaefi na eeya ya ko aba na makuta. bato boose ba mona we ; ke ba lombesa Mokolo na koakaya na ome, na ko keyakeya boso nande.