¹ Mokota na ko ebesa Mose, na ko ena nandé : ² "Ena na bana ba Isalaele : Owa wika woose maana wa ba Isalaele ama moeni we tchumane mo Isalaele, owa weeme koabea Moleli omo wa bana bandé weengami ko kpa: Bato ba motanga bo olubeyai we mawe. ³ Noo nootimbokeyai moto si ko beya na ko ekanesa we na bato bandé, bondiya mo ko abeleya Moeleki mana andé woo ko iki m’mba mosei wa asima yane ya phenena na lina ane kae ; ⁴ A ika mbe bato ba motanga bata maiso ka moto si oyo wa abeyaka Moleli mana andé, biteiyangi – we, ⁵ n’ndi noomunei noo lubeya we na abotekeya nandé. Noo phangesai we na bato bandé, we na bano boose batanga ilemba m’mba we mo ko esa moleli okuku. ⁶ Moto si owa wo ko eleya baa bika na mesombo na meiya mo kota ilemba asima amo nabo, noo noo timbokeyai we na bato bandé. ⁷ Langai ko ika kino m’mba bo ko ika bapheneni, bondiya nooi Mokolo Mokonga wino ; ⁸ Litesai ba angile bane na ko ondeya bo, bondiya nooi Mokolo owa noota bane bapheneni. ⁹ N’ndi, owa woose wo ko ayea ise ama nina, mokiya yandé yo ko itekeyai omune. ¹⁰ Bena moto si owa woota ilemba (ko lamesana) na mokala ophe moto : moto wa enda na mokala munakande wa bo ikaneyo, we engami ko kpa, we na amokali si. ¹¹ Bena moto si owa woolama na mokala ise wa feliyake mokanga ya ise. Boose bo babe bakpe, mekiya yabo. ¹² Bena moto wa lama na mokala nandé. Bemine ba seamake, mekiya yabo yo ko itekeyai bemine. ¹³ Eke moto yo ko itekeyai bo si owa wo olamesana na ophe moto m’mba ko lamesana na amokali : Eeyo iki masomeyi matake bobabe, beengami ko kpa, mekiya yabo yo ko itekeyai bo. ¹⁴ Na moto wa songa amokali asima amo na nina : Iki ilemba ya beya. Bo olelekanesa we asima amo na bamokali bo babé – si, bondiya mbe ko beya si oko kite-ikangi akati wino. ¹⁵ Bena moto wa ema n’nyama na ko enda nayo : we engami ko kpa, na n’nyama si eyo bo ko iayai. ¹⁶ Amokali wa ema mbe n’nyama ni n’nyama yoose yalame nandé ; bo ko iayai amokali – si na n’nyama kaé. Mekiya yabo yo ko itekai kowa kabo. ¹⁷ Moto wa songi wa songa motamba yandé, moseka ya ise, ao moseka ya nina : wa mona mokanga yandé bena oyo amokali wa mona mokanga ya amoome – si, eeyo iki ko ayeleka bena bootoesai – bo na ko mona bo bule ko maiso ma okita, bondiya ko eba mokanga ya motumba yandé, benandé amokali ko mona mokanga ya amoome woobiyai ko beya kande womune. ¹⁸ Moto wa lama na amokali n’nyanga ya tcheili na ko eba mokanga yandé ; wa ebaki liiso ya mokiya ; boose bobabe bo olingolekai na ko toeseleka kpaaya na bato babo. ¹⁹ Welongangi mokanga ya motamba ya n’tchoko ama mokanga ya motamba ya so. Mo isina mbe wa monaki mokanga yandé oune ; boose bo babé boobiyai ko beya kabo bemine. ²⁰ Moto wa lama na mokala ise mokolo moto ama mamuke : wa monake mokanga si owo ya ise mokolo moto ama manuke, bo obiyai kumbo wa ko beya kabo, beekpai buwa ko bota baana. ²¹ Moto wa songa mokala mana nina ; eeyo iki ko seyama, wa monake mokanga ya mana nina, bookpai buwa ko bota baana. ²² N’ndi litesai ba angile bane boose, liti wane woose, na ko ondeya bo ; bondiya mbe owa motanga mo ko isa bane mo ko ika ko iteokangi bane. ²³ Be litesangi beteleli ba n’kita si eeya nebenge yo bosowino, bondiya bo batangai maondi mbe bo batangai mano moose, noo na ko soma namo. ²⁴ Mo boobo noo na enake nino :"Bootombai tchese tchabo, noo mune no ko esi tchaike tchino, tchese si tcheya tcho kooka maziba na asali. Iki noo Mokolo Mokonga wino na ekanesake bane na bese si ebo. ²⁵ N’ndi boomonai na ko eba n’nyama ya tondana na eya ya beya, toyoni tosaali na teya tabeya. Betangi m’mba banei beli bo na kota mo bane mine, n’ndi mo bowa noo neebese bane, mo kila tchesima tchoose si tcheya tcho olanda mo tchese, na moesake bane ko ekanesa bo m’mba baebi ba tchoose. ²⁶ Bo ko ikai bapheneni, bondiya noo Mokolo nooi mopheni, benane na ekanesake bane na bese si ebo boose, ambe beike bane. ²⁷ Moto woose akati wino, amoome ama amokali, owa wika na mesombo ama kota boiya : Bosiya bo kogba boogbai, boolubekai mawe, mekiya yabo yo ko itekayi bo bemine".