¹ Nahi hala ha bagechi bamilandu, ndala gibele m'mibalo. Mtu gumwechi gwa Betelehemu gya Yuda guhumine, gugile ushama msi gya Moabu, gee na mmachage na baana bage babili. ² China lya gugo mtu bamgitile Elemeleki, china lya mmachage Naomi, na machina ma baana bage babili Maloni na Kilioni, Baeflahimu ba Betelehemu gya Yuda. Bahiile msi gya Moabu bashamine ubo. ³ Elemeleki gee noo uwa, lmume gwa Naomi; gugo mmachana gushigele na baana babge babili. ⁴ Nabo bagonjile baachana ba Moabu; na china lya gumwe gugitilwe Olpa na china lya gwa bubili Luti. Bashamine uya alibu miyaa umi. ⁵ Boo noo uwa Maloni na Kilioni bose babili; na gugo macha guwililwe na baana bage babili hamwechi na mlumyage. ⁶ Haho noo byechuwile gee na bamnage buo, ugiwila uhuma msi gya Moabu; bululi ubo mmibaloo ya Moabu guhuliche ugana Mlume gwabamwena kene na ubaha biliwa batu bage. ⁷ Guchuwile haya halibele gee na ba mnage buo babili hamwechi nage. Bagile mndila gya ugya msi gya Yuda ⁸ Haho noo Naomi gusambile baya bao bage babili, Giwe na ugiwila kila gumwechi mndu gya mnage; Mlume na gwimgilila benywe bisoga , nahi byine byamubagilile baya bene bawile hamwechi na nene. Mlume na ga mmale miha na kila gumwechi mndu mwa mmnage. Gee noo ubaumbatila; nabo noo ulila wa lidilyata. ¹⁰ Bamsambile, Nangu, bishibyo,; bino twigya hamwechi noobe u batu bobe. ¹¹ Nage Naomi noo ugana, Benywe baana babnyi , giwilwe,; yulu ya ii undama? Wii ! Nene nina bange baana ba balumyana iyaka mnda mwanyi, na babe balume benyu? ¹² Benywe baana banyi, giwilwe, mligile lwenyu; bululi nene nisili mmungu, nishi naba iyaka na mlume. Mndi nabagana, nuhuudagila; nambo nababa na mlume ata buno busugu, na ubuta baana ba balumyana; ¹³ Wii ! Mwabahemba ata byabioma uba batu baumu? Mwabalichibila nangu uba na babge balume? Nango,bishi bibyo baana baanyi; yulu ibigumagachu wandi uli wamli benywe, yulu uboo wa Mlume wahuma hegulu hanyi. ¹⁴ Nabo noo ulungumiya madi mabo, balilile iyaka, haho Olpa guumbatile mnage buo, Luti gulamene na mnage buo. ¹⁵ Nage guganine, Lola mmachi nobe gwagiwila u ubashiwabo, na wa abetcha age; ubegiwila na gogwe umlame mmachi nobe. ¹⁶ Nage Luti guganine, Ushitongelele nuuleye, Nagiwile nashilamane noobe; Bululi gogwe oligya niigya, Na gogwe olishama nishama. Batu bobe babi batu banyi, Na Abetcha obe abi Abetcha anyi; ¹⁷ Haya hene holiwila na nene niiwa, Na haho niichiwa; Mlume gangilile bibyo na ugililila, Lubu ka lwatusambuanye gogwe na nene. ¹⁸ Haho helimonine gwaomenenye malanga mage ulamana nage, guleile udugoma nage. ¹⁹ Haho bagililile bose babili na byabahiile Betelehemu, Na habahiile Betelehemu, mbuga gyose gigingile alugiyulu ya mwano gwabo. Na baachana gaganine, Ola! guno ii Naomi ? ²⁰ Gubasambile mushi ngite Naomi mungite Mara yulu Abetcha Pungu apisha bihisho bya bululu abisa. ²¹ Nene nuhumine uno nili gwa mgiluchu, nage Mlume gwangiwicha nishi na itu, yulu ya ii ungita Naomi, uba Mlume gwalisambayoyose yulu yanyi. na Abetcha Pungu asusula nene ii? ²² Haho Naomi nuugiwila; hamwechi na Luti Gwamoabu, mnage buo, gugiwile nage uhuma msi gya Moabu, nabo noo uhiya Betelehemu umwanjo gwa uesa ngano.