¹ Nimginuna Mlume wa mtima gwanyi gose; Nibidogoma bigilanywa byage bya bisaga; ² Nibi na saso na useelela Gogwe; Niligimbila china lyobe, Gogwe nine uli hegulu. ³ Wa yulu ya tumangu twanyi tulihugiwila hanyuma; Tuli huhyatala na uchima mbele gyobe. ⁴ Bululi wangitila uononywa wa kiine Ushamine wiiti ya buolo ulihuonona wa kiine. ⁵ Wahugumbila mioga; Na ubachimya babii; Umachiminye machina mabo milumbu na milumbu; ⁶ Tumangu twaonowa na ushigwa mmauwa milumbu. Na mabuga mabo gwamabulula ; Na uengeleshiwa wabo washimina. ⁷ Bibyo Mlume gwishama milumbu, Gwabiya iti yage ya uonona tayali. ⁸ Nage gwionona sii wa kiine chage; Na gwigeda milandu gya batu ushi wa uhengamina lubi lumwechi. ⁹ Mlume gubi mmao gwage wa mine gwamonenywa, Ehe, mmao mengo ma asusu. ¹⁰ Nabo bene bali balimane china lyobe bali huudagila Gogwe, Bululi Gogwe, Mlume ushibaleile bene balihuenga. ¹¹ Mumgimbile Mlume gulihushma Sayuni, Lisambwe hawingi ha batu bigilanywa byage. ¹² Bululi gugiwidicha buubi wa buubi bwa mashi guli hubaengelecha, Gushiigibilile lilo lya tulema. ¹³ Gogwe, Mlume, undeelele, Loola asusu andi hususulwa na bene bali hukonywa; Gogwe ulihunginuna ha mchango gwa lubu, ¹⁴ Yulu nalisambe punda chobe chose; U michango gya bawa misiha gya Sayuni Niseelela uhogononywa obe, ¹⁵ Mioga gyachinda mnda inaa yabadabile; Wa bwila bwababisile bwabawata u magulu mabo. ¹⁶ Mlume gwalimonya na uwilicha uonona; Gwam'bwata m'bii wa mgilo gwa maboo mage. ¹⁷ Babii bigiwila usinda, Ehe, mioga gyose gyine gilihumgibilila Abetcha. ¹⁸ Yulu msabi gushigibililwa abisa; Maudagilo ma tulema mashichimina milumbu. ¹⁹ Mlume, ugimane, mtu gashibe na uoma, Mioga giononywe umbele obe. ²⁰ Mlume, ubabiile bichundo, Mioga na balimane ugana uba ii batu.