¹ Ee Mlume, yulu yaii wagimana koo? Yulu yaii ulibisa mengo ma asusu? ² Wa yulu ya ulimona wa guya gushi na kiine alema alihumwa wa buhuchi; na bawaswe wa buhulihuli boka bubo bwabali hulanga. ³ Bululi ndogya bitu gusulitona yulu ya ubenja wa ichuli-chuli yage ya mwego, Na gwa bushimbi gusuhanya Mlume na um'bedula. ⁴ Ndokya bitu wa ulimona wa yenyi yage Gwagana,Gushibechiwa. Malanga mage mose ii, ugana Hashi Abetcha; ⁵ Madila mage mose mmagolobu mengo mose. Uonona obe uli hegulu gashiumone, Tumangu twage tose gwituhina ⁶ Gulihugana mnda mtima gwage, Nishihumiwa, Ibushi hanyuma ha ibushi nishibimo mmasusu. ⁷ Anywa age agilula buliga, na bweenge na umonenana. Hasi ha lulimi lwage hali unenunana na buubi, ⁸ Ushama na uhembela batu u mikoba. Ihana ya mabiso na ummaga guya gushi na abachi, Meso mage masuuhiba mtu guya gushi na atu. ⁹ Ushama umabiso nahi biya tambwe mmiutu, ubisama bululi gam'bwate mtu alema. Ehe, um'bwata mtu alema, Um'bulila m'bwila bwage. ¹⁰ Uliumbata na uginama; Batu batulema basugwa wa uoma wage. ¹¹ Gusugana mnda mtima gwage, Abetcha agibilila, Abisa yenyi yage, ashi humona ata. ¹² Mlume, uhume, Ee Abetcha, uginune uboo obe, ushigibilishi tulema. ¹³ Bululi ngila bibii gisunenuna Abetcha. Gusugana mnda mwage, Ushionona? ¹⁴ Wamona, yulu walingamina mnenunana na ulihulicha, Ubiguhe mmaboo mobe. Mtu alema gusuuha ichuli-chuli yage ya mwego, Bululi usuuba m'bwatilicha gwa mashige. ¹⁵ Uunoge uboo wa ngila biibi, Na mtu m'bii, uhanye usapana wage na ushiumone. ¹⁶ Mlume noo Oolo milumbu na milumbu; Mioga gyashimina uhuma msii gyage. ¹⁷ Mlume, wahulicha itima ya tulema, Wigilongya mitima gyabo, wilitega litu lyobe uhuliche usaba wabo. ¹⁸ Yulu ya uonona shige na guya gwamonenywa, Mtu guligidi gee ii bitete gashigilile umonenana.