¹ Bululi madi mahiya ndaa na m'michuli-chuli yanyi ya mwego. ² Nachinda mnda biswswa biingi, Hashinaoshiwa ugimana. Nahiya hene hali madi ma uchinda. Mgechi gwa madi gwahila madi meengi wandi. ³ Naima na ulila wanyi, Mmino gwanyi gwaguma. Meso manyi maima na um'memba Abetcha anyi. ⁴ Bene balihukonywa bunene ii bengi uhima njuli cha mswe gwanyi. Bene balihubenja usinya koo nali na uoma, Ata nene nigiwidichiwe wa uoma. Bibya byene byandishiguhile. ⁵ Ee Abetcha ugidi buhugi bwanyi, Na ushibishilwe buubi bwanyi. ⁶ Bene balihuuhemba Gogwe bashidambiwe mme, Bululi bwanyi, Mlume, Abetcha a bilume pambwa. Bene baluhuenga Gogwe basimone abule, Yulu yanyi, Ee Abetcha a Isilaeli. ⁷ Wa yulu yobe nilihuhemba usambilwa buubi bwanyi, Abule ambwila yenyi yanyi. ⁸ Nisili mgenyi u bashiwetu, na ata u bana ba mago nilimgenyi. ⁹ Bululi buwa bwa ndu gyobe bwanja, Na uambila wabalihuambila wapyila nene. ¹⁰ Handilile na ususula mtima gwanyi wa uhamba nangu uya iliwa, uchile uambila yulu yanyi. ¹¹ Handilongiche bilembelembe uba bichwalaganywa byanyi, Nibele mihingu wabali. ¹² Bene balibashame hamchango balihungana, Na ng'imbo cha baolwa chili husebulula. ¹³ Nene usaba wanyi nilihuusabaGogwe, Mlume, Mengo mulihubenja; Ee Abetcha, Bululi bwa yanoyobe ungae, Wa winene wa uhogonona obe. ¹⁴ Uponye wa upumya m'biswaswa, Na ushindee nachinde. Na uponye na bebe balihukonywa, Mnda mabenga ma madi. ¹⁶ Ee Mlume, yulu yano yobe ii isoga, Na wa uleelela obe wingi unjwilile. ¹⁷ Bibyo ushimbise yenyi yobe, nene mgichi gobe, Yulu nene nili mnda asusu ungae abilo. Uihyile ichuli-chuli yanyi ya mwego, uihogonone,Wa yulu ya amangu anyi uibise. ¹⁹ Gogwe ugidi uambilwa wnyi, umona abule na udamba mme wanyi, Umbele oba Gogwe uli basusuchi banyi bose. ²⁰ Uambilwa wanoga mtima, Na nene nasumwa abisa. Nihembile gachwe gwa umbwena keene, na hashi ata; Na gwa upungya, na nisamona mtu. ²¹ Bapele abululu uba noo iliwa yanyi; Na nene handibele na yuma bapele bya bululu. ²² Meza nabo umbele wabo mabe gochi; Ehe, mengo ma talala na mabe tandetande. ²³ Meso mabo mabiwe mdo na mashimone, Na munda chabo uchidanje masugu mose. ²⁴ Ubagesele buhuchi bobe wa bali, Na buhuchi bwa sungu chobe ubaambile. ²⁵ Bushamo bwabo na bube mauwa, Hashibe mtu gushama mmahema mabo. ²⁶ Bululi balihummimya mtu golihulile Gogwe, Balihulisamba usuma wa baya bene bolibiile malase. ²⁷ Ubalibiile usona hegulu ha usona, Ushibaleye ugingila mnda kiine gyobe. ²⁸ Na bachimwe mnda itabo ya mwego, Na bashigolwe hamwechi na batu ba kiine. ²⁹ Nene mine nili mbuchu na mtu gwa unyogwa, Abetcha, uhogonona obe winginuna. ³⁰ Nilitona china lwa Abetcha wa lwimbo, Na nene nimginuna wa buswachi. ³¹ Nabyo Mlume gwibibenja uhima ng'ombe, Na mwana ng'ombe mine gwina meega na tudibi. ³² Bamonenywe habimona saso; Benywe balihummenga Abetcha, mitima gyenyu gibiwe na mwego. ³³ Bululi Mlume gusuhulicha basabi, Na gushihunenuna bahambwa bage. ³⁴ Gulu na sii bimtone, Bahali na byose byina bili mnda mwage. ³⁵ Bululi Abetcha gwihogonona Sayuni , na umagubaa mabuga ma Yuda, Na batu bishama mnda mwage na ubihyilila. ³⁶ Babuswa ba bagichi bobe bigihyana, Nabo bene balihubenja china lyage bishama mo.