¹ Ichuli-chuli yanyi ya mwego ili hummemba Abetcha gee buchima wa pii, Uhogononywa wanyi uli huhuma weli. ² Gee ka noo liwe lyanyi lya lyata na uhogononywa wanyi, Mmao bwanyi nishidigila ata. ³ Ata mengo nai mwimsumbilila mtu, Muoshe uumaga benywe bose hamwechi? Nahi ibambacha yigimanyu, Nahi mgumbo gusili alibu na uungwa. ⁴ Basuhunga mmungo gumgwisha umunya witi ya buosobu; Balihuseelela lulimi. Wa tunywa twabo balihuhala mihaa na wa mitima gyabo bali luloga. ⁵ Ichuli-chuli yanyi ya mwego, Uhembe Abetcha gee buchima wa pii. Maudagilo manyi malihuhuma wage. ⁶ Gee ka noo liwe lyanyi lya lyata na uhugononywa wanyi. Mmao gwanyi nishidigila ata. ⁷ Wa Abetcha uhogononywa wanyi na ugengeda wanyi; Liwe lyanyi lya lyata lya uoma wanyi, Na businino bwanyi ii wa Abetcha. ⁸ Benywe batu, mumudagile masugu mose, Ununywe mitima gyenyu weli; Abetcha noo businino bwetu. ⁹ Winene mtu itu bunene, Na bene bali na unyemiwa ii lulimi, Mnda mwa ulingilila uginyuwa; Bose hamwechi ii hasi uhima itu bunene. ¹⁰ Mushiudagile umonenana, Na mushiudgile usapana; Bumona habusuugichili mushibulole abisa mmitima. ¹¹ Lwendo lumwechi wagana Abetcha; Nyendo chibili nahulicha bino, Bululi uoma uli na Abetcha, ¹² Na yano ili oli Ee Mlume; Yulu gogwe noo usumma kila mtu ulamana na kiine gyage.