¹ Ee Abetcha, twahulicha wa matu metu Bamasetu batusambile, Bihisho byoligilile masugu mabo, masugu ma aala. ² Gogwe wa uboo obe ubachingile bamioga, Ubashaminye boo. Gogwe ubasusule batu ba ibaloo, ubaeneche boo. ³ Yulu ushi wa ahilu abo byabashamine mgiya sii, Na ushi wa umoo wabo ubahogonine; Ii yulu ya uboo wa ulume, ehe, umoo obe, Na lwenge lwa yenyi yobe, bululi ubahele. ⁴ Ee Abetcha, Gogwe noo oolo lyanyi, Ulage bihisho bya uhogononywa wa Yakobo. ⁵ Wa uoma obe wigwisha basusuchi betu; Wa china lyobe twigyatila bene bali hutuhanya. ⁶ Bululi nishiudagila buta bwanyi, Na ata ahilu anyi ashipogonona. ⁷ Yulu Gogwe noo utuhogonone na basusuchi betu; Na bene bali hutuonywa wabamonya abule. ⁸ Tulihulitonena Abetcha chuba lyose, Na china lyobe twilitona milumbu. ⁹ Bibyo watutela, watudambya mmee, Ata bibyo ushihugya na balwi betu ba bita. ¹⁰ Watugiwicha unyuma twamma msusuchi kungu, Na bebe balihutuonywa bawata kole. ¹¹ Watuhana nahi miyoo tube iliwa, Na utusala hawingi ha mioga. ¹² Babagucha batu bobe hashi uhana bumona, Na usahewa alambwe a ugulwa wabo, ¹³ Watumanya buubi bwetu u babinji netu, Wenja na useya ubaya bali bachungulubu. ¹⁴ Watuita uba mihingu u mioga, Yulu ya udigicha miswe gya batu ba ibaloo. ¹⁵ Chuba lyose udamba mmee wanyi uli umbele wanyi, Na abule a meeso manyi wambwila, ¹⁶ Wa lidi lya usambila buubi na busebulula, Wa yuluya amangu na gugiwidicha buubi. ¹⁷ Bibyo byose byatupata, na tushibaugibilile, Na tushibadogye alago obe. ¹⁸ Tushibagileye mitima gyetu ugiwila unyuma, Na ata matamba metu mashileile ndila gyobe. ¹⁹ Ata utuswage ubushamo bwa mibwabwa, Na utwila wa ichuli-chuli ya lubu. ²⁰ Na uba twligibilila china lya Abetcha etu,Nuba twagololele abetcha a agenyimaboo metu; ²¹ Wi wii! Abetcha ashilola iyo unywa? Yulu Gee noo gusumona lubisagulu lwa mtima. ²² Naangu! Wa yulu yobe tulihuhagwa chuba lyose; Twaiswa miyoo gilihugya ushinjiwa. ²³ Byuwa, Mlume, mbona walala? Gimana ushitutele abisa. ²⁴ Yulu yai watubisa yenyi yobe, Na ugibilila umonenywa na uhyililwa wetu? ²⁵ Bululi ichuli-chuli yetu ya mwego yaginama mmihwili, Magumo metu mawatana na bitete. ²⁶ Ugimane ube bwatilicho gyetu, Utuhogononye wa yulu ya yano yobe.