¹ Ee Mlume, oolo lyiseelela uoma obe, Na uhogonona obe gwiuitila sumbilo lya saso liingi abisa. ² Gwamma byelihubenja mnda mtima gwage, Na usammaninya byelihubenja udogoma na milomo gyage. ³ Yulu wamshenenya mihaa gya luhanga lusoga, Wamchiya sala lya nolo mswe mwage. ⁴ Guusabile mwego, gogwe noo umma, Mengo malahu na masugu meengi, milumbu na milumbu. ⁵ Ugengeda wage ii wata u uhogononywa obe, Bunyemu na bugengeda wabiya hegulu hage. ⁶ Bululi wammita uba mihaa gya milumbu, Wamseelecha wa saso lya yenyi yobe. ⁷ Yulu oolo lisuudagila Mlume, Na wa yulu ya yano nage Gee guli hegulu gushuhumiwa. ⁸ Uboo obe wituwata tumangu tobe tose, Uboo obe wa ulume wibawata bose bene bali huuonywa. ⁹ Wibaita uba nahi lulindi lwa ahyaa, Mengo ma buhuchi bobe. Mlume gwibwmina yulu ya buhuchi bwage, Na ahyaa ibachigya. ¹⁰ Biguma byabo wibidigya na ubuhumya mmibaloo, Na babuswa babo ubahunya ubatu. ¹¹ Wa yulu banunine na uugila biibi, Balangila buubi na bashibuwiliche. ¹² Bululi wibaita buteye kungu, Wa lulemo lwa buta bobe ubatele migwii. ¹³ Ee Mlume, uginunywe yulu ya uoma obe, Beswe twigimba na uutona uosha obe.