Mbukwilo 119
1
Luhanga lusoga uli baya bali bawilile mnda madila mabo. Basugya mnda m'bindo gwa MLUME.
2
Luhanga lusoga uli baya bali huwasha ubangisiwa wage, Balihummenga MLUME wa mtima gose.
3
Ehe, bashigilile bibii, Balihugya mnda madila mage.
4
Gogwe utusambile mmano gobe, Na beswe tuguwashe abisa.
5
Nababenja madila manyi mabe magolobu, Nawashi alago obe.
6
Haho nene nishidamba mmee, Haho nabelanga malagano mobe mose.
7
Niuha buswachi bwa ugolowa wanyi wa mtima, Handihwa uligigya uhogonona wa kiine gyobe.
8
Niwasha alago obe, Ushindechi abisa.
9
Wa bihe mmwalubaga gunaosha ugolola ndila gyage? Wa uwasha, gabelama inywa.
10
Wa mtima gwanyi gose niuengile, Ushindechi uchimina koo na malagano mobe.
11
Mnda mtima gwanyi naibiya inywa yobe, Nashichwe uugila buubi.
12
Ee MLUME, uginunywe, Ungigye alago obe.
13
Wa milomo gyanyi nalisamba Uhugonona ose wa anywa obe.
14
Naseelela ndila gya ubangisiya obe Ugana ii bibya bwingi.
15
Niengecha mmano gobe, Na nene nilola abisa madila mobe.
16
Niseelela abisa mnda alago obe, Nishiigibilila inywa yobe.
17
Ugilile bisoga mgichi gobe, Naoshe ubapoo, niiwasha inywa yobe.
18
Umbulule meso manyi nalingamine Bibagicha bilihuhuma mnda m'bindo gobe.
19
Nene nilimgenyi mnda sii, Ushimbise malagano mobe.
20
Mtima gwanyi gwanyuwiya yulu ya itima yanyi Uonona obe mengo mose.
21
Wabaambila bina buhuluhuli, Balogwa bene bashi huwasha malagano mobe.
22
Upuminye uambilwa na ubadulwa, .Bululi nawasha ubangisiwa obe
23
Bahela nabo bashamine na banganine, Nambo mgichi gobe gwiengecha alago obe.
24
Ubangisiya obe nao noo saso lyanyi, Na bupa mihungo banyi.
25
Ichuli-chuli yanyi ya mwego yawatana na ihwili, Umbiye na mwego ulamana na inywa yobe
26
Nilisambile madila mobe ungaile, Ungigye alagoobe.
27
Umanye ndila gya mmano gobe, Na nene niengelecha bigagicha byobe.
28
Ichuli-chuli yanyi ya mwego yasumbuluwa yulu ya bushito, Umbiye uoma ulamana na inywa yobe.
29
Upuminye ndila gya lulimi, Umonene keene wa m'bindo gobe.
30
Nagisobola ndila gya uwilila obe, Na ubiya uonona ube umbele wanyi.
31
Naunbatilana na ubangisiya obe, Ee MLUME, ushimbiya abule.
32
Nihinga abilo mnda ndila gya malagano mobe, Holimungula mtima.
33
Ee MLUME, ungigye ndila gya alago obe, Nene niawasha ata isula.
34
Umanye na nene niwasha m'bindo gobe, Ehe, nigitabuwa wa mtima gwanyi gose.
35
Ungishe mmahitilo ma malagano mobe, Bululi namabenja.
36
Upishe mtima gwanyi na ubangisiya obe, Na gishiigila itima.
37
Ungalule meso manyi nashibilingamine bishi na atu, Umbiya na mwego mnd madila mobe.
38
Umgimyile mgichi gobe ulaga obe, Ili hulama iuli yobe.
39
Upumunye uambilwa wandisusina, Bululi uonona obe iyusoga.
40
Loola nilihubenja mmano gobe,Upe mwego gwa kiine gyobe.
41
Ee MLUME, yano yobe ipyile na nene, Ehe, uonona ube ulamana na ulaga obe.
42
Nene nimsambila inywa guya gulihukambila, Yulu naudagila inywa yobe.
43
Ushiihunye inywa ya kiine mmanywa anyi ata, Bululi nilihuuhemba uononywa obe.
44
Nene niwasha m'buimdo gobe masugu mose,Ehe, milumbu na milumbu.
45
Nene nigya wine uli ihana, Bululi naligigya mmanao gobe.
46
Nilisamba ubangisiya obe umbele wa maoolo, Na nishimona abule.
47
Na nene niliseelecha abisa wa malagano mobe, Mene mandihubenja.
48
Na maboo manyi nigaginunina malagano mobe mene mandi bendiche, Na nene niengelecha alago obe.
49
Uiengeleche inywa yolimsambile mgichi gobe, Wa yulu wakudagicha.
50
Guno noo mmungyo gwanyi mnda asusu anyi, Ugana ulaga obe wapa mwego.
51
Ba buhulihuli banenuna abisa, Nishilibagule na m'bindo gobe.
52
Nauengelecha uonona obe wa aala, Ee MLUME, nilihungiche.
53
Uchigililwa wambwata yulu ya bene bashi na kiine, Balihuleya m'bindo gobe.
54
Alago obe asili ng'imbo chanyi, Mnda ndu gya bugenyi.
55
Mengo ma busugu naliengelecha china lyobe, Ee MLUME, niwashiche m'bindo bobe.
56
Bibyo noo byandibele nabyo , Bululi niwashiche mmano gobe.
57
MLUME noo guli iba yanyi, Niganine niwasha binywa byobe.
58
Nuusaba ibumbu wa mtima gwanyi gose, Umbwene keene ulamana na ulaga obe.
59
Nimaengile madila mobe, Na magulu manyi nimahugulwile ubangisiya obe.
60
Niitile abilo na nishisingile, Umagila malagano mobe.
61
Migochi gya bene bashi na kiine gyapamba, Nishigibilile m'bindo gobe.
62
M'bwingi na busugu nibyuwa na uutona, Wa yulu ya uonona obe wa kiine.
63
Nene nili miinabo gwa batu bali huunyemya, Na baya bali huwasha mmano gobe.
64
MLUME, sii gyagilula yano yobe, Ungigye alago obe.
65
Umgilile bisoga mgichi gobe, Ee MLUME, ulamana na inywa yobe.
66
Ungigye lwenyi na lwengu, Bululi niwashiche mmano gobe.
67
Hambele nene nishinasusulwa nichimine, Nambo hano nawilicha inywa yobe.
68
Gogwe wi msaoga na mgichi gwa bisoga, Ungugye alago obe.
69
Batu ba buhuluhuli banyinga lulimi, Wa mtima gwanyi gose niwasha mmano gobe.
70
Mitima gyabo bahema nahi manona, Nene naguseelela m'bindo gobe
71
Bibele bibenju wandi nene uba nasusulwa, Naushe uligigya alago obe.
72
M'bindo gwaanywa obe mgubenju wandi, Uhima mauki ma nolo na bumona.
73
Maboo mobe mangitile na uunongya, Uumanye naligigyemmano gobe.
74
Bene bali huunyemya baamone na useelela, Bululi naihemba inywa yobe.
75
Nigidi ugana uonona ube iwa kiine, Ee MLUME, Na wa yulu ya uwilila obe wasusula.
76
Nilihusaba yano yobe ibe wandi mmungyo, Ulamana na ulaga obe wa mgichi gobe.
77
Uleelela obeunjwile nabe na mwego,Bululi m'bindo gobe noo saso wandi.
78
Ba buhulihuli badambe mme, bululi banyinga wa lulimi, Nene nibihulanga mmano gobe.
79
Bene balihunyemya banjwilile, Nabo bimana ubangisiya obe.
80
Mtima gwanyi na gubeguwilile mnda alago obe, Nene nashichwe umona abule.
81
Ichuli-chuli yanyi ya mwego yahola wa yulu ya ubenja uhogonona obe, Nilihuihemba inywa yobe.
82
Meso manyi maima yulu ya uhemba ulaga obe, Handigana mengo nai molipungya?
83
Bululi nisili na mtondo u mii, Nishigibilile alago obe.
84
Masugu ma mgichi gobe mmanga, Mengo nai wibaonona baya balihundama?
85
Bene bina buhuluhuli mandabila biina, Bene bashihulama m'bindo gobe.
86
Malagano mobe mose noo bibyo, Balihundama bunene umbwatiliche.
87
Basibele hoka na ukonona mno mmibaloo, Ata bibyo nishileile mmano gobe.
88
Upe iyaka mwego wa yano yobe, Na nene niwasha ubangisiya wa anywa obe.
89
Ee MLUME, inywa yobe yagimana malindi utula ha gulu ndaa na milumbu.
90
Uwilila obe uli utula ibushi na hanyuma ha ibushi, Uibiile ibaloo nayo yashama.
91
Wa uonona obe byagimana malindi ndaa na milumbu, Bululi bitu byose ii bagichi bobe,
92
Nambo m'bindo boge gishisuba saso lyanyi, Haho nisuba uchimina mnda asusu anyi.
93
Ata milumbu sishigugibilila mmano gobe, Yulu yago wambiya na mwego iyaka.
94
Nene nili gobe, upogonone, Bululi naligigya mmano gobe.
95
Bene bashi na kiine bambisamina yulu banjiminye, Iengelecha ubangisiya obe.
96
Nimonine uwilila ose uba na isula, Mndi ulaga obe iwata abisa.
97
M'bindo gobe nili hugubenja abisa na wa ugagicha, Mndi noo ulanga wanyi chuba lyose.
98
Malagano mobe malihumbiya lwengu uhima tumangu twanyi, Yulu ninamo masugu mose.
99
Ninalo lwenyi uhima bagigya banyi bose, bululi ubangisiwa obe noo wandisulanga.
100
Ninalo lwengu uhima baulu, Iwa yulu nawasha mmano gobe.
101
Nilbagule magulu manyi na madila masone, Bululi nawashi inywa yobe.
102
Nishilibagule na uoinona obe, Yulu Gogwe mine noo ungigiche.
103
Mmano gobe guli saa abisa wandi, Uhima bui mmanywa mwanyi.
104
Wa mmano gobe naliha umana, Noo yulu nilihuonywa kila ndila gya lulimi.
105
Inywa yobe ii yaa ya magulu manyi na ugema wa ndila gyanyi.
106
Nilahile na nene nigila, Uwasha uonona obe na kiine chobe.
107
Nasusulwa abisa; Ee MLUME, umbiya iyaka ma mwego ulamana na inywa yobe.
108
Ee MLUME, ulugae lutangi lwa anywa anyi, Na ungigya uonona obe.
109
Ichuli-chuli yanyi ya mwego ilimo mmaboo manyi masugu mose, Bibyo m'bindo gobe nisagugibilila.
110
Bangila biibe batela gochi, Inangwa bibyo nisagilubila ndila gya mmano gobe.
111
Ubangisiya obe nauita uba buhyana bwa milumbu, Bululi noo saso lya mtima gwanyi.
112
Nagugolwela mtima gwanyi nagile alago obe, Masugu mose ehe, ata milumbu.
113
Batu bulibula-bula nisubaonywa, Bibyo m'bindo gobe nilihugubenja.
114
Noo Gogwe businino bwanyi na ngabo gyanyi, Inywa yobe nilihuihemba.
115
Benywe bangila biibe, humwe wandi, Nawashe malagano ma Abetcha anyi.
116
Ungegamye ulamana na ulaga obe, nabe na mwego, Na ushundechi namadambile mme maudagilo manyi.
117
Umbatiliche na nene nibi poo, Nene nialola alago obe masugu mose.
118
Ubahaninye bose bene balihulubila alago obe, Bululi buyanja bwabo ii lulimi
119
Babii ba ibaloo nabo wabahunya nahi lusimbi, Noo yulu nibandiche ubangisiya obe.
120
M'bili gwanyi guli hudanda wa uunyemya Gogwe, Na nene nilihumona booba uonona obe.
121
Nagila uonona na kiine, Ushindeche mmaboo ma bene bali humonena.
122
Ube guhidicha mgichi gobe, gahewe busoga, Bene bina buhulihuli bashimonene.
123
Meso manyi mali mdoo yulu ya uubenja uhogonona obe, Na ulaga wa kiine byobe.
124
Nahi bili uleelela obe umgilile mgichi gobe, Na alago obe ungigye.
125
Nene nili mgichi gobe, usanbile, Bululi namane ubangisiya obe.
126
Mengo mahuhiya MLUME gagile mgilo; Yulu babela m'bindo gobe.
127
Noo bululi nilihubenja malagano mobe, Uhima nolo cha chihaha,
128
Bululi nagumona mmano gobe gose uba gwa gusoga, Madila mose ma lulimi namaonywa.
129
Ubangisiya obe iwa ugagicha, Noo yulu mtima gwanyi gwawasha,
130
Umanya biny, wa byobe wachisha lwenge, Na umanya ahoso.
131
Niunune anywa anyi na uhemena, Bululi nimabendiche malagano mobe.
132
Ungalwile, undeelele nene, Nahi bibalingye bene balihubenja china lyobe.
133
Ugolwele matamba ma magulu winywa yobe, Usona ushichwe unginywina.
134
Upogonone na uambilwa na batu, Naoshe uwasha mmano gobe.
135
Ulamyine mgichi gobe yenyi yobe, Na ungigya alago obe.
136
Meso manyi malihuhongolowa na ngudi cha madi, Bululi masihuwasha m'bindo gobe.
137
Ee MLUME, Gogwe noo mine na kiine,Na uonona obe ii wa hululu.
138
Ulagine ubangisiya obe wa kiine, Na wa uwilila wiingi.
139
Buwa bwanyi bwapagya,Bululi basusuchi banyi bagibilila binywa byobe.
140
Inywa yobe yahahachiwa abisa,Wa bibyo mgichi bobe gwaiunda.
141
Nene nili mchoo, bambeda, Inangwa nishihugibilika mmano gobe.
142
Kiine gyobe ikiine gya milumbu, Na m'bindo gobe igwinene.
143
Asusu na ulemwa byamanga, Malaganp mobe noo saso lyanyi.
144
Kiine ne ubangisiwa obe iwa milumbu, Umanye na nene nibi na mwego.
145
Mgita wa mtima gwany gose; Ee MLUME, ugitabuwe; Niwasha alago obe.
146
Niugitile Gogwe, upogonone, Na nene niwasha ubangisiya obe.
147
Utula umayaya nisabile bwatilicho, Nibihembile binywa byobe wa maudagilo.
148
Meeso manyi matulile ubuluwa hambele ha busugu uyaa, Yulu ya uengelecha ulaga obe.
149
Ulihuliche lidi lyanyi ulamana na yano yobe, Ee MLUME, umbiye na mwego ulamana na uonona obe.
150
Bahuhiya bene balihundama wa mmonywa, Na bali koo na m'bindo gobe.
151
Ee MLUME, Gogwe Uli hoka, Na malagano mobe mose mmawinene.
Utula aala nimanine ubangisiya obe, Bululi uubile ushame milumbu.
153
Uulole ususulwa wanyi, upogonone, Bululi nishigibilile m'bindo gobe.
154
Undogomene na upogonona, Upe iyaka mwego ulamana na ulaga obe.
155
Uhugonone uli koo na bene bashi na kiine, Bululi bashi baligigye alago obe.
156
Ee MLUME, uleelela obe iwingi, Upe iyaka mwego ulamana na uonona obe.
157
Bebe balihundama noo basusuchi banyi m'bengi, Bibyo nishilibagule na ubangisiya obe.
158
Nibamonine balihugula ubengana nichigililwe, Wa yulu bashibawashe inywa yobe.
159
Ulingamine byandisugubenja mmano gobe, Ee MLUME, upe iyaka mwego ulamana na yano yobe. Wa byose inywa yobe iyawinene,
160
Na uonona obe ose iwa milumbu.
161
Bahele balihunemba bunene, Bino mtima gwanyi guli na iduba ya binywa byobe.
162
Nilihuseelela ulaga obe, Nahi gwapata kole chingi.
163
Nionywine lulimi, lwanjigilicha, M'bindo gobe nagubenja.
164
Nyendo njwii kila chuba nilihutona,Bululi bwa uonona wa kiine gyobe.
165
Bina talala bene balihubenja m'bindo gobe, Na bashi na ya ubalema.
166
Ee MLUME, nilihuuhemba uhogonona ube,Na malagano mobe namagile.
167
Ichuli-chuli yanyi ya mwegi yawasha ubangisiya obe, Na nene naubenja abisa.
168
Nawasha mmano gobe na ubangisiya obe, Bululi madila manyi mose mali umbele wameso mobe.
169
Ee MLUME, lilo lyanyi na liuhyile, Usambile ulamana na inywa yobe,
170
Usaba wanyi nauhiye umbele obe, Uponye ulamana na ulaga obe.
171
Milomo gyanyi na gibe too, Wa yulu wangigya mmana gobe.
172
Lulimi lwanyi na lugimbe ulaga obe, Bululi malagano mobe mose imakiine.
173
Umoo obe na ube alibu umbwatilicha, Bululi nagusobola mmano gobe.
174
Ee MLUME, Nilihuunda mmano gobe, Na m'bindo gobe noo saso lyanyi.
175
Ichuli-chuliyanyi ya mwego na ibe poo, ioshe uutona, Na uonona obe umbwatiliche.
176
Nalugila-lugila nahi mmoo gwa guchiminyu; Ummenge mgichi gobe; Bululi nishigibilile malagano mobe.