¹ Haleluya. Mtonywe MLUME bululi ii msoga, Yulu yano yage iya MILUMBU. ² Isilaeli na gadogome hano, Ugana yano yage iya milumbu. ³ Mchango gwa Halunu na badogome hano, Ugana yano yage iya milumbu. ⁴ Baya bali humnywemya MLUME na badogome hano, Ugana yano yage iya milumbu. ⁵ Mnda asusu anyi nigitile MLUME; MLUME gungaile na gumbiile hiihana. ⁶ MLUME guli lubi lwanyi,nishimona booba; Mtu gwingita ii? ⁷ MLUME guli luubi lwanyi,m'bwatilicha gwanyi, Wa bibyo nibamona bene bali hukonywa baiswa.. ⁸ M'bisoga umsinina MLUME. Uhima ubaudagila batu. ⁹ M'bisoga umsinina MLUME. Uhima ubaudagila bahela. ¹⁰ Mioga gyose ginyunguluwile; Wa china lya MLUME nibachingile koo. ¹¹ Banyunguluwile, ehe, banyunguluwile; Wa china lya MLUME nibachingile koo. ¹² Banyunguluwile nahi nduwi, Bachimine nahi ahyaa a umigwa; Wa china lya MLUME nibachingile koo. ¹³ Unungile abisa yulu nagwe; Bibyo MLUME gumbwatiliche. ¹⁴ MLUME ii uoma wanyi na lwimbo lwanyi, Nage gusili uhogonona wanyi. ¹⁵ Lidi lya saso na uhogonona Lili m'bitula bya bene bali na kiine; Uboo ulume wa MLUME uli hugila byata. ¹⁶ Uboo ulume wa MLUME utoninywe; Uboo ulume wa MLUME ulihugila byata. ¹⁷ Nishiwa nibi poo, Nene nilisamba bigilanywa bya MLUME. ¹⁸ MLUME gwapugumbila abisa, Bibyo gusandecha nawe. ¹⁹ Mbugulilwe michangogya kiine, Nigingila na umtona MLUME. ²⁰ Mchango guno ii gwa MLUME, Bene bina kiine noo bigugingila. ²¹ Niuha buswachi yulu wangaa, Na Gogwe usili uhogonona wanyi. ²² Liwe lihanyiwe na bagubai Lisili liwe liulu lya ubiya usungaa. ²³ Ino inywa yahuma wa MLUME, Naya ii bigagicha u meso metu. ²⁴ Chuba lino noo lyeliitile MLUME, Twiliseelela na ulimonena saso. ²⁵ Ee MLUME, utuhogonone, tuutendelela; Ee MLUME, utuhe bibya, tuutendelela. ²⁶ Na gahalwe mihaa guya gwichwa wa china lya MLUME; Twabahala mihaa utula mnda gya MLUME. ²⁷ MLUME noo Abetcha, Nage noogutuhele lwenge. Hambwe lutangi wa migichi Habamba ha butambikilo. ²⁸ Noo Gogwe Abetcha anyi, nene niuha buswachi. ²⁹ Mmewe MLUME buswachi bululi imsoga, Yulu yano yage iya milumbu.