Mbukwilo 101
1
Uleelela na uonona nibigimba, Ee MLUME, niugimbila ng'imbo.
2
Nigiloli ndila gya gigolobu; Wichwa wanyi mengo nai? Nigya wa ugolowa wa mtima Mnda nduu gyanyi.
3
Nishibiya umbelewa mesio manyi Inywa ya usona. Mgilo gwabo bagila biibi nagionywa, Gishihulichana nanyi.
4
Mtima gwa usona gwihuma wandi, Ili isone nishiimana.
5
Gwimchinga m'binji nage wa subisagulu, Hugo nimdogya. Mine gwina meso ma buhulihuli na mtima gwa ulimona, Gugu nishihulichana nage.
6
Meso manyi mibalola batu babawashe mnda ibaloo, Guya gulihugya mnda ndila gya giwilile, Gugo noo gwingilila.
7
Gushishama mnda nduu gyanyi mtu guya gulihugila gya buyanja. Gulihudogoma lulimi gushishama Umbele wa meso manyi.
8
Lwelo ndaa na lwelo nibadogya babii bose ba ibaloo. Nibabagula bose balihugila bisone Na mbuga gya MLUME.