¹ Mlume gudogomine na Musa mnda u gwa Sinai, mnda itula ya busambeno, lusugu lwa lutangi lwa mwechi gwa bubili, hanyuma ha uhuma wabo mnda sii gya Misili, gumsamile, ² Iswe lubalo lwa sumbilo lyoselya baana ba Isilaeli, ulamana na bilongo byabo, na madu ma bamasabo, nahi lubalo lwa machina byaluli, mlumyana ge gese mtu wa mtu; ³ Utula gwa myaa maumi mabili, nauhima, bose bene banaosha ugya u bita gwa Mmisilaeli; gogwe na Haluni mwibabala wa ulamana na basolokoto babo. ⁴ Iyaka mlumyana gumwechi gwa ibushi yo yose gubi hamwechi nenyu; ge gese gumwechi mine guli nombwe gya ndu gya bamasage. ⁵ Na machina ma babo balumyana bene bigimana hamwechi nenyu noo mano; Gwa Leubeni; Elisuli mwana gwa Shedeuli. ⁶ Gwa Simeoni; Shelumieli mwana gwa Suli-shadai. ⁷ Gwa Yuda; Nashoni mwana gwa Aminadabu. ⁸ Gwa Isakali; Nethaneli mwana gwa Suali. ⁹ Gwa Zabuloni; Eliabu mwana gwa Heloni. ¹⁰ Hawingi ha baana ba Yusufu; gwa Eflaimu, Elishama mwana gwa Amihudi; na gwa Manase; Gamalieli mwana gwa Pedasuli. ¹¹ Gwa Benyamini; Abidani mwanagwa Gideoni. ¹² Gwa Dani; Ahiezali mwana gwa Amishadai. ¹³ Gwa Asheli; Pagieli mwana gwa Okilani. ¹⁴ Gwa Gadi; Eliashibu mwana gwa Deueli. ¹⁵ Gwa Naftali; Ahila mwana gwa Enani. ¹⁶ Babo noo bene bagitilwe ba sumbilo, baulu ba ibushi ya bamasabo; nabo noo tulombwe twa baya mauki ma Isilaeli. ¹⁷ Haho Musa na Haluni babaguhila baya batu ba balumyana bene bagolilwe machina mabo; ¹⁸ nabo basumbiche sumbilo ligima, lusugu lwa lutangi lwa mwechi gwa bubili, nabo bamoninye bibushi byabo wa ulamana na bilongo byabo, wa madu ma bamasabo, nahi lubalu lwa machina mabo, mtu wa mtu. ¹⁹ Nahi biya Mlume byelimlagile Musa, noo byelibabalile uya mnda mgala gwa Sinali. ²⁰ Na baana ba Leubeni, m'buswa gwa mtangi gwa Isilaeli, bibushi byabo wa ulamana na bilingo byabo, na madu ma bamasabo, nahi lubalo lwa machina, mtu watu, mtu ge gese utula myaa gwa ubuswa maumi mabili na uhima, bose bene baoshiche ugya u bita; ²¹ bene babalilwe wibushi ya Leubeni babele batu maumi mana na mtuba uki na sambi chitano (46,500). ²² Na baana ba Simeoni, bibushi byabo, wa ulamana na bilongo byabo, na madu ma bamasabo, baya bene babalilwe nahi lubalo lwa machina mabo, mtu wa mtu, mlumyanage gese utula myaa maumi mabili na uhima gya ubuswa, bose bene babalilwe banaosha ugya u bita; ²³ bene babalilwe wibushi ya Simeoni babele batu maubi matano na yahabula uki na sambi chitatu (59,300). ²⁴ Na baana ba Gadi, wa ulamana na bibushi byabo, bilongo byabo, na madu ma bamasabo, nahi lubalo lwa machina, utula myaa maumi mabili na uhima, bose bene baoshiche ugya u bita; ²⁵ bene babalilwe wilongo ya Gadi, babele batu maumi mana na batano uki ma sambi mtuba na maumi matano (45,650). ²⁶ Na baana ba Yuda, bibushi byabo, naulamana na bilongo byabo, na madu ma bamasabo, nahi lubalo lwa machina, utula myaa maumi mabili na uhima, bose bene baoshiche ugya u bita; ²⁷ bene babalilwe wiilongo ya Yuda, babele batu maumi njwi na bana uki na sambi mtuba (74,600). ²⁸ Na baana ba Isakali, bibushi byabo ulamana na bilongo byabo, na madu ma bamasabo, na lubalo lwa machina, utula myaa maumi mopi na uhima, bose bene baoshiche ugya u bita; ²⁹ bene babalilwe wilongo ya Isakali babele batu maumi matano uki na sambi china (54,400). ³⁰ Na baana ba Zabuloni, bibushi byabo, wa ulamana na bilongo byabo, na madu ma bamasabo, nahi lubalo lwa machina, utula myaa maumi mabili na uhima, bose bene baoshche ugya u bita; ³¹ bene babalilwe babele batu maumi matano na njwii uki na sambi china (57,400). ³² Na baana ba Yusufu, noo uganabaana ba Eflaimu, bibusho byabo wa ulamana na bilongo byabo, na madu ma bamasabo, wa lubalo lwa machina, utula myaa maumi mabili na uhima, bose bene baoshiche ugya u bita, ³³ bene babalilwe wilongo ya Eflaimu, babele batu maumi mana uki na sambi chitano (40,500). ³⁴ Na baana ba Manase, bibushi byabo, wa ulamana na bilongo byabo, na madu ma bamasabo, nahi lubalo lwa machina, utula myaa maumi mopi nauhima, bose bene baoshiche ugya u bita; ³⁵ bene babalilwe wilongo ya Manase, babele batu maumi matatu na babili uki na sambi chopi (32,200). ³⁶ Na baana ba Benyamini, bibushi byabo, wa ulamana na bilongo byabo, na madu ma bamasabo, nahi lubalo lwa machina, utula myaa maumi mabili na uhima, bose bene baoshiche ugya u bita; ³⁷ bene babalilwe wilongo ya Benyamini, babele batu maumi matatu na batano uki na sambi china (35,400). ³⁸ Na baana ba Dani, bibushi byabo, wa ulamana na bilongo byabo, na madu ma bamasabo, wa lubalo lwa machina, utula myaa maumi mabili na uhima, bose bene baoshiche ugya u bita; ³⁹ bene babalilwe wilongo ya Dani, babele batu maumi mtuba nababili uki na sambi njwii (62,700). ⁴⁰ Na baana ba Asheli, bibushi byabo, wa ulamana na bilongo byabo, na madu ma bamasabo, nahi lubalu lwa machina, utula myaa maumi mopi na uhima, bose bene baoshiche ugya u bita; ⁴¹ baya bene babalilwe wilongo ya Asheli, babele batu maumi mana na gumwechi uki na sambi chitano (41,500) ⁴² Na baana ba Naftali, bibushi byabo, wa ulamana na bilongo byabo, na madu ma bamasabo, wa lubalo lwa machina, utula myaa maumi mopi na uhima, bose bene baoshiche ugya u bita; ⁴³ baya bene babalilwe wilongo ya Naftali, babele batu maumi matano na batatu uki na sambi china (53,400). ⁴⁴ Babo noo bene babalilwe, ugana Musa na Haluni na baulu ba Isilaeli batu umi na babili bene bababalile; babele ge gese wa yulu ya madu ma bamasage. ⁴⁵ Haho baya bose bene babalilwe u baana ba Isilaeli wa ulamana na madu ma bamasabo utula myaa maumi mabili na uhima; bose bene baoshiche ugya u bita ba Baisilaeli; ⁴⁶ babo bose bene babalilwe babele m balumyana sambi mtuba na batatu uki na sambi chitano na maumi matano (603,550). ⁴⁷ Alakini Balawi wa ulamana na bibushi bya bamasabo bashibalilwe hamwechi na babo batu. ⁴⁸ Bululi Mlume gudogomine na Musa na umsambila, ⁴⁹ Iyo ibushi ya Lawi ka ushiibachi, na ushibiya lubalo lwabo hamwechi na baana ba Isilaeli; ⁵⁰ Alakini ubabiye Balawi baabe wihana ya bushamo bwa mangisiyo, na yulu ya bibya byabo byose, na hegulu ha bitundu byabo byose; boo noo babi huswala bubo bushamo, na bibya byabo byose; bibugilila, na ugimiya bitulabyabo ubuchugnuluwa bushamo ngubi chose. ⁵¹ Iyaka haya hene habihugya bushamo hambele, Balawi noo babi hubusacha; iyaka haya hene habwigimiwa bushamo, Balawi noo bibugimiya; na mgenyi mne gwishena gwihagwa. ⁵² Na baana ba Isilaeli bigimiya bitula byabo, mtu ge gese na ihana yage, mtu ge gese haya hene heli gaabe na bendela lyage, nahi bili basolokoto babo byabali. ⁵³ Alakini Balawi bigimiya bitula byabo ubuchunguluwa bushamo bwa mangisiyo ngubi chose, yulu hashibe na buhuchi bwanyi yulu ya sumbilo lya baana ba Isilaeli; hanyuma Balawi biusa na ulingamina bushamo bwa mangisiyo. ⁵⁴ Noo byabagilile baana ba Isilaeli; Nahi byose byine bilagilwe Misa na Mlume, bibyo noo byabagilile.