¹ Na batu bose basumbile nahi mtu gomwechi mnda lagala lya lyina libele umbele wa mchango gwa maadi; Mamsambile Ezla, mgochi guhyiche itabo ya Musa, MLUME byelisambile Isilaeli. ² Nage Ezla, ibuli, guhyiche m'bindo u mbele wa sumbilo, lya malumyana na baachan, na bose bene baoshiche uhulicha na umana, lusugu lwa lutangi lwa mwechi gwa njwii. ³ Gusungule mmo umbele wa lagala lili hulolela luubi lwa mchango gwa maadi, utula umayaya ndaa na mkunyia meeno umbele wa babo malumyana na baachana, na baya bene bamanine; na matu m,anbatu bose bahuliche lusungulo lwa itabo ya Musa. ⁴ Nage Ezla, ibuli gugimene hegulu ha ahala a mti, abalongiche yulu ya iyo ibalo; nanhoka nage hagimene Matithia na Shema, na Anaya, na Ulia, na Hilkia, na Maaseya, uboo wage wa ulume; na wa uachi, Pedaya, na Misbaeli, na Malkiya, na Hashumu, na Hashbadani, na Zakalia, na Meshulamu. ⁵ Ezla guiunune itabo u meeso ma batu bose; ( bululi bugele hegulu ha batu bose); na haho heliiunune, batu bose bagimene; ⁶ Ezla gumtonine MLUME. Abetcha Mmata. Na batu bose bagitabwile, Bibe bibyo, Bibe bibyo, wa hamwechi na uginuna maboo mabo; hanyuma baginyiye miswe gyabo, bamtonine MLUME wa lubulubulu. ⁷ Iyaka Yeshua, na Bani, na Shelebia, na Yamini, na Akubu, na Shabethai, na Hodai, na Maaseya, na Kelita, na Azalia, na Yozabadi, na Hanania, na Pelaya, nabo ii Balawi, babamaninye batu m'bindo; nabatu bagineme ha bihana byabo. ⁸ Nabo basingule mnda itabo, mnda m'bindo gwa Abetcha, wa liidi lya ulitongelela; balisambile mana mage, na byabamanine byine bisungulwe. ⁹ Nage Nehemia, gubele mmata gwa mbuga, na Ezla ibuli, mgochi, na Balawi bene babele hugigya batu, babasambile batu bose, Luno lusugu m luhaha wa MLUME, Abetcha enyu; mushibiye malilo na mushilile. Bululi batu bose balilile, habahuliche binywa bya m'bindo. ¹⁰ Hanyuma gubasambile, Giwe lwenyu, muye bya binonyu, na unywa bya saa, iyaka mummilile guya gushi na atu; bululi luno lusugu m luhaha wa MLUME GWETU; na mushichigililwe; bululi saso lya MLUME noo uoma wenyu. ¹¹ Haho Balawi babasadiche mitima batu bose, baganine, Shamwe pii, bululi luno lusugu m luhaha; na mushichigililwe. ¹² Na batu bose bagile uya na unywa, na ubahilila batu bimwe, na uita saso liingi, wa ibalo babele bamane binywa biya byabasambilwe. ¹³ Na lusugu lwa mabili bahele ba milongo gya bamatata ba batu bose, na bibuli na Balawi, balisumbiche uli Ezla, mgochi, yulu bahuliche binywa bya m'bindo. ¹⁴ Bamonine ugana winene m'bigolwe mnda m'bindo, nahi MLUME gyelidogomine wa uboo wa Musa, ugana baaba ba Isilaeli bashame mnda bibanda-holi, ha lusugu lwa ulitucha lwa mwechi gwa njwii; ¹⁵ na ugana balisambe na uta mtambila mnda mabuga mabo mose, na mnda Yelusalemu, ugana giwe u loono naugeda matabi ma mizeituni na matabi ma mizeituni-gya m'bisowa, na matabi ma mmadasi, na matabi ma asugwe, na matabi ma miti ya gyata, yulu ya uita bibanda-holi, nahi byabigolilwe. ¹⁶ Bibyo batu bose bagile, balushiche, balilongeche bibanda-holi, kila mtu hegulu ha butato bwa ndu gyage, na ulagala lyage na mnda lagala lya ndu gya Abetcha, na ulagala lya mchango gwa Eflaimu. ¹⁷ Na sumbilo lyose lya batu, bene bagiwile uhuma mnda sii gya ubululwa wabo, balongoche bibanda-holi, bashamine mnda bibanda-holi byabo; bululi utula lusugu lwa Yoshua mwaanagwa Nuni, ndaa na luya lusugu, baana ba Isilaeli bashigilile bibyo, Ho nuuba na saso lyaata abisa. ¹⁸ Iyaka lusugu hanyuma ha lusugu, utula lusugu lwa lutangi ndaa nalusugu lwa isula, gusungule mnda itabo ya m'bindo gwa Abetcha. Baitile lusugu lwa ulitucha mengo ma masugu njwii; na lusugu lwa inana habele na sumbilo lya chigilwe, nahi byaliganinywe.