¹ Ha mwechi gwa Nisani (Alengule); mwaa gwa maumi mabili ma oolo Altashasta, na divai libiwe u mbele wage, niwashile liya duvai, nimmele oolo. Nene haho nishibele mnyogwe yulu ya oolo mengo mo mose. ² Haho oolo gusambile, Yulu yai yenyi yobe ili na manyongotela, na gogwe ushi msumwa? Ino iyii, ishisuba manyongotela na mtima? Haho nimwene booba abisa. ³ Nimsambile oolo, Oolo nagabe na mwego milumbu; bululi bwai yengi yanyi ishibe na manyongotela, umwene mbuga, gyine gili ihana ya tubuli twa bamatata, gili gishame mauwa, na michango gyage gyachigiwa na aahya? ⁴ Haho oolo gusambile, Uli hutaga ii yolihubenja uusaba? Haho nisabile Abetcha a ha gulu. ⁵ Nimsambile oolo, Oolo nambo gwimona bisoga, na uba nene, mgichi gobe, nahewa iuko u meeso mobeibumbu ino upile ndaa na Yuda, nagigile mbuga gya tubuli twa bamatata, nagigubae. ⁶ Oolo gumbudiche, ( na mma oolo gubele hibamba hage), Lwendo lobe lubi lwa masugu manga?Na gogwe wigiwila mengo nai? Bibyo oolo gumonine bisoga uupila; na nene nimsambile mengo. ⁷ Iyaka nimsambileoolo, Oolo nambo gwimona bisoga, na nahewe mikanda gwa baata ba mabuga bene bali m'bwala mwa Luudi, yulu baandeya nahite ndaa na uhuya Yuda; ⁸ nahewe na mkanda wa Asafu, mine gulihuusa isowa ya oolo, yulu gape miti gya makomba moyo maulongya biikwa bya michango gya mgumbo gwa ndu, na yulu ya bibambacha bya mbuga; na yulu ya giya ndu gyandigingila nene. Nage oolo gupele, nahi bibele uboo wa misa wa Abetcha anyi byaubele hegulu hanyi. ⁹ Haho nihiile uli baata ba mabuga ba m'bwala mwa Luudi, nibahele giya mikanda gya oolo. Nage oolo gubele mmile bilume pambwa mgoma gwage na bachinyi ba falasi hamwechi nanyi. ¹⁰ Ata Sanbalati, Mholoni, na Tobia, mgichi gwage, Mmamoni, habahuliche gigyo myano, gibachigiliche abisa, bululi guli huchwa mtu ubawatilicha baana ba Isilaeli. ¹¹ Bibyo nihiile Yelusalemu, nishamine uya mengo ma masugu matatu. ¹² Hanyuma nichuwile m'busugu, nene na batu bacho hamwechi nanyi; na nishisambile mtu ino inywa yelibiile Abetcha anyi mnda mwanyi, nayiite yulu ya Yelusalemu; na hashibele ata nyama hamwechi nanyi, nambo nyama giya ka gyandibele mgichine ¹³ Nitobowe hambuga m'busugu, u ndila gya mchango gwa wibetabeta, nigile u ndila ishima ya ndowa na mchango gwa chaala; nilolila bibambacha bya Yelusalemu, byine bibele bibelebu; na michango gyage gyagichigiwe na aahya. ¹⁴ Hanyuma nigililile ndaa na u mchango gwa umisula, na ichiba ya oolo; bibyo hashibele na ihana yuuhita giya nyama gyandibele mgichine. ¹⁵ Hanyuma nichinine m'busugu mibamba mwa ihongelela, nilolile ubambacha; hanyuma nigiwile unyuma, nigingile u mchango gwa ibetabeta, nigiwile bibyo. ¹⁶ na baata ba ihwilo bashimanine wandigile, byandigilile; na nishi nabasambila Bayahudi, ata babibuli, ata bauulu, na ata bagichi ba ihwilo, na ata bange batu bene babele hugila gugo mgilo. ¹⁷ Hanyuma nibasambile, Mulihumona guno mshaminyi gwa bulema gwatuli nago, bili Yelusalemu byagili mauwa, na michango gyage gichigiwe na aahya; biino! Na tugubae iyaka bibambacha bya Yelusalemu, yulu tushigiluchiwe iyaka. ¹⁸ Nibasambile mwano gwa uboo wa Abetcha anyi byaubele usoga hegulu hanyi; iyaka na binywa bya oolo byelisambile. Nabo baganine, biino! tugimane na tugubae. Haho babiile maboo mabo uoma yulu ya mgilo gugo gusoga. ¹⁹ Haya habahuliche Asnbalati Mholoni, na Tobia, mgichi gwage, Mmamoni, na Geshemu, Mmalabu (Sauda-Alabian), batuseile, batunenune, baganine, Iyinywa nai ino yamulihugila? Wi wii! Benywe mwibenga yulu ya oolo? ²⁰ Haho nibagaile, nibasambile, Abetcha a ha gulu, gee gwituwatilicha; wa bibyo beswe, bagichi bage, twigimana na ugubaa; na benywe mushi na lubalo, ata kiine ata uengelecha, yulu ya Yelusalemu.