¹ Mwano gwa Nehemia, mwaana gwa Hakalia. Hasibele ha mwechi gwa Kisleu (Imbi luudi) mwaa gwa maumi mopi handubele Shushani ngomeni, ² Hanani, gumwe gwa bashiwetu, gunjwilike, gee na bange abtu bahumine Yuda; nene nibabudiche mwano gwa Bayahudi bene bahonine, baya batu ba ubululwa bene bashigele; na mwano gwa Yelusalemu. ³ Basambile, batu ba ubululwa, bene bashigele uya mnda guya mkoba, bali mnda asusu eengi na ugiluchiwa; iyaka ibambacha ya Yelusalemu yabelwa, na michango gyage gyachigiwa na aahya. ⁴ Haho handihuliche bibyo binywa, nishamine, nililile, nibele na malilo masugu wa masugu; hanyuma nihambile, nisabile u mbele wa Abetcha a ha gulu; ⁵ niganine, Nuutendelella, Ee MLUME, Abetcha a ha gulu, Abetcha a aata, mine gulihusinywa, mine gusuwilicha malagano mage na uleelela wage uli baya bene balihummunda na uwasha alago age; ⁶ tega litu lyobe, meeso mobe maabuluwe, waoshe uhulicha usaba wa mgichi gobe, wandihusaba umbela obe mano mengo, mchuba na m'busugu, yulu ya baaba ba Isilaeli, bagichi bobe; haho handihulibecha yulu ya buubi bwa baana na Isilaeli, bwatugululi oli; ehe, nene na ndu gya tata twagila buubi. ⁷ Twagila bisone bwiingi oli, na tushibawashe alago, na m'bindo, na ata uonona, ulimsambile Musa mgichi gobe. ⁸ Nuusaba, uiengeleche inywa iya yolisambile Musa, mgichi gobe, uganine, M'beluba, nimsambalacha hawingi ha mioga. ⁹ nambo m'bengiwilila nene na uwasha alago anyi na uagila, bato bobe bene bachingilwe inangwa bali u luubi lwa isula ya gulu, ata bibyo nibasumbicha uhuma ubo, na ubahwiicha ndaa na ihana iya yandisobole yuluya ulibiya china lyanyi haho. ¹⁰ Biino, babo batu m'bagichi bobe na batu bobe, bolihogonone wa uosha obe wiingi, na wa uboo obe wa uoma. ¹¹ Ee MLUME, ibumbu ino, utege litu lyobe, uuhuliche usaba wa mgichi gobe, na usaba wa bagichi bobe, bene balihubenja unyemya china lyobe; nihuusaba abisa; na umonye yano yobe, mgichi gobe, lino, umonye uleelela obe umbele wa guno mtu, (Bululi nibele gunywisha oolo).