¹ Luhanga lubi lwage lwa mbuga gya mashi! Wagilula na bihisho bya lulimi na bya ubicha; matega mashihuma. ² Mdodo gwa bihulo, mdodo gwa bichigi bya tubili-bili bilihuita kindo; na falasi chili uchunguluwa-chunguluwa, na tubili-bili twa bita bwine tuli huguluwa . ³ Mchinyi gwa falasi gabechina, na ahilu alihugema-gema, na sumo lili lugema-gema; na beengi noo bawile, na mtala gwa bitumba; bitumba bishi na isula; balihuhyatala u bitumba byabo. ⁴ Wa yulu ya lusengu lwingi lwa giya sengu gibenju, guya mmachi gwa bihisho bya bugabo, gulihugula mioga wa lusengu lwage, na bibushi byabatu wa bugabu bwage ⁵ Loola nene nili hegulu hobe, gwagana Mlume gwa bilume pambwa, nene niununa malenda ma yenyi yobe; na nene nibamonya mioga buchi bobe, na maolo mmee gobe. ⁶ Na nene niuha buchafu bwa uonywa hegulu hobe, uwita ube mdogu, Na nene niuwita ube itu ya ulolwana na unenunwa. ⁷ Na habibi,bose bene biulola biusina, bigana, Ninawi wadoga; ii nanyi gwiumwena keene? Nuengele uhi bahungya ? ⁸ Wii! gogwe uli m'benju uhima No-amoni, gubiilwe hawingi ha ngudi, luchungulwilwe na madi; ugana nyimbo gyage gibele bahali, bahali libele ibambacha yage. ⁹ Kushi na Misli babele uoma wage, namo mabele mashi na lugumba; Putu na ba Libia babele bawatilicha bage. ¹⁰ Ata bibyo guguhilwe koo, gugile u buchaa; baana bage ba tulenge basachiwe u madila mamata mose; batu bage bene beli na malango babiilwe usobolwa , na bata ba mbuga bahambilwe na tumangila. ¹¹ Iyaka wiolwa, wibiswa, iyaka wienga bubisamino yulu ya tumangu tobe. ¹² Businino bobe bose bubi nahi tini gwine gyine biguma byabitangi ugela; bibedigila byigwila mmanwa a mine gulihuya. ¹³ Loola batu bobe bene beli mnda mobe ii baachana ; malimbwa ma sii gyobe mali hululu abisa u meso ma tumangu tobe; ahyaa achigya byiki byago . ¹⁴ Taha madi mabe tayali yulu buchungulua iutu, Ubiye uoma uu ng'umba chobe chose; Ugingile m'bitete, uswage biswaswa, Ubiye uoma ubuchigicho bwa biliki. ¹⁵ Uli ahyaa iuchigya ; Ahilu iugedele koo; Iumina nahi mwana gwa njige byesuya; Ubeliita uba beengi nahi baana ba njige . ¹⁶ Wabaita badagulanya uba beengi uhima tumbala-mbala twa gulu; baana ba njiga hudogya; hanyuma noo uguluwa hegulu na uligila. ¹⁷ Batu bobe bachwichwe sala ii nahi njige, na baulu bobe ba bita bali nahi bihicha bya panji, basuusala m'tumabala masugu ma peho, na chuba libetoboa chisugulua na uligila lwabo, na ihana yine yabali ishihumanyia. Balochi babo balala tulo, Ee oolo lya Ashulu; batu bobe bene bali na bunyemu balitucha; batu bobe bamwagiya hegulu ha koono, na hashi mtu gubasumbicha. ¹⁹ Lase lyobe lishi huhungulwa; lase lyobe ii lyata abisa; Bose bihulicha mwano gobe bihula kwasayulu yobe; Bululi ii nanyi mine gugilile bubi bwage ushibele hegulu hage abisa?