¹ Bahiile mbuata mwa ihichi msi gya Bageresi ² Hehuile usala m'bwato, hoka haya gusambene na mtu gulihuhuma usinda, gulina miha. ³ Bushamo bwake ubele uya umanda; na hashibele mtu gwa umosha umamba iyaka ata wa tumangil; ⁴ Bululi gubele huhambwa nyendo chingi uhambwa wa ndemo na tumangila, na ugedageda tuya tumangila na ubela bela ndemo, na hashibele na mtu gummosha wa uoma. ⁵ Masugu mose, busugu na chuba, guli umasinda na ukono, gwina mdodo na uligeda geda na mawee. ⁶ Na hemonine Yesu wa koo gumgilile wa abilo na ukinamina. ⁷ gukabile wa lidi lyata ninobe ee Yesu Mwana gwa Abetcha ali hekulu? Nilihusambila wa china lya Abetcha ushikambile. ⁸ Yulu gumsambile, gogwe mma mmume gugu mtu. ⁹ Gupudiche china lyobe wii nanyi, gugaile china ni Legioni yulu beengi ¹⁰ Gumtongelele gashimmile hambuga ha iya ibaloo. ¹¹ Na haya ha loono habele ihichi yata ya ngulube chili hulishiwa. ¹² Miha gyose gimtongelele giganine utuhile mngulube, tuchingile. ¹³ Gubakitabiche. Giya miha bahumine, noo ugingila mchiya ngulube, na iya ihichi yose iundumwine uu m'bega chigingile mmichiba, chibele uki chopii, chiwile chose mmichiba. ¹⁴ Bauchi bacho basinine, balisambile mwano mmbuka na mmabala. Batu bagile umona bigiliye. ¹⁵ Bamgilile Yesu, bamonine guya gwa miha, guli mshame, mchwale ngubo, gwina lwenyi lwake, nage noo gubele na miha. Bamonine booba. ¹⁶ Na baya beene bamonine babasambile ii bihisho bigiliye uli mtu gwa miha na mwano gwa ngulube. ¹⁷ Batulile umtongelela gahume u n'gumba chabo. ¹⁸ Gee helibele huchina bwato, guye gubele na miha gumsambile gagye nage; ¹⁹ Yesu kushigitabuwe, gumsambile, ugye obe undu gyobe ubatu ba wenyu, ubasambile byine bihisho byugilila Mlume, na byeli uleelele. ²⁰ Gugile na utula ulisamba mwano uya Dekapoli, ii bihishi no byata byeli ugilile Yesu, batu bose bagagilwe. ²¹ Na helihwile udabua, ugiwila mbwala mbuya bwato, basumbile sumbilo; nage gubele uumpega gwa ichiba ²² Ho nuuchwa gumwe mtu mkichi gwa ihwilo, china lyake Yairo; helimonine, gumwilile umagulu mage. Gumlile abisa gumganine, ,siha gwanyi gwa mchomcho guli alibu na uwa; nihusaba uchwe, umbiile uboo obe, gamone gabe na mwego. ²⁴ Gugile hamwechi nage sumbilo lyata limlamine, na bamminine hinine. ²⁵ Na gumwe mmachana gubele na isumi ya mashi miaa umi na gyopi. ²⁶ na ususua abisa na mmaboo ma bakilaha beengi, gugilahwe na bumona bwingi na bitu biingi byebele nabyo, gushihonine, bigililile uba bibee. ²⁷ helihuliche mwano gwa Yesu, gugingile mnda mwa sumbilo nyuma gya mgongo, guudiche mchwalo gwage. ²⁸ uyu guganine, Nabeuda mchwalo gwake ka, nihona. ²⁹ Hoka haya mashi mage noo uama, gulimanine mnda m'biili gwage gwahona iya isima. ³⁰ Haho Yesu guganine mmichulichuli ya mwego uoma wammuma, gugalwile mmihichi guganine, Mnanyi gwahuda umchwalo gwanyi? ³¹ Bagigiwa bage bamsambile, wiwii! ulihuna sumbilo lili huudana udana, na gogwe ulihuguna nanyi guuda? ³² Gulolile ngubi chose bululi gomone ii nanyi guhishiche iya ihisho. ³³ Na guya mmachana gumwene booba na undama, gumanine byeli gilile, guchwile ugwa mmachwi na umsambila kiine chose. ³⁴ Gumsambile, Msiha, uwasha obe wuhonya, uligile wa talala, ube poo, ushibe na usumwa iyaka. ³⁵ Haho hilebele hugana, uchwile batu uhuma wa guya mmosobu gwa ihwilo, baganine, Msiha gobe kwahuhwa uwa; yulu yai umdegya mgigya? ³⁶ Bibyo Yesu, helihuliche iya inywa hudokomwa, kumsambile mmata gwa ihwilo, nangu udidiwa uwashe ka. ³⁷ Gushisambile mtu galamane nage, gobe Pedelo, na Yohana mshiwabo Yakobo. ³⁸ Bahiile mndu gya mmosobu gwa ihwilo, gumonine alugi, na batu huliliaa, na lilo lyata. ³⁹ Hehwile ugingila, gubasambile, yulu yai alugi na ulila? Mmwalubaka gusawa kwalala ka. ⁴⁰ Bamseile abisa. Nage helichwile ubatobola hambuka bose, gumguhile sage na guwa mmwalubaka na mnage, baya bene bali hamwechi nage, gugingile muli guya mmwalubaga. ⁴¹ Gumpwatile uboo mmwalubaga, gumsambile, Talitha umi; noo ugana, Msiha, nuusambila ginyuwa. ⁴² Hoka haya gugimeneguya msiha, gee nuukya; yulu gusibele inyundu ya miaa umi kyopu. Bagagilwe wa bigagicho byata. ⁴³ Gubasambile abisa mtu gashimane guya mwano, guganine gahewe iliwa.