¹ Utula wa Mwano gwa Yesu Kilishoto Mwana gwa Abetcha. ² Nahi byabikolilwe na ibuli Isaya, Loola nahila mmilwa gwanyi hambele ha yenyi yobe. Gwiseba ndila gyobe. ³ Lidi lya mtu gulihuta mbila milungu, Seba ndila gya Mlume mugolole mahililo mage. ⁴ Yohana kumoneye gulihuchunda mlungu, na uta mbila gya uchunda wa ulibecha uli huchwisha uleelelwa wa bubii. ⁵ Bamkilile sii kyose gya Bayahudi, na bose ba Yelusalemu bachundilwe ii mludi Yordani, balibediche yulu ya bubii. ⁶ na Yohana gubele huchwala ebambi ya ngamia na mchingo gwa ebambi mlubunda mwage, na uyaa njige na bui bwa mgala. ⁷ Utambila na ugana, kwichwa hanyuma hanyi kwina uoma wiingi uli nene, ata nene nishilingye ugimana na usula migochi gya mikalabanda gyage ⁸ Nene nibachundile wa madi, gee gwimchunda wa Mtima kuhaha. ⁹ Maya masuku, Yesu guchwile uhuma Nazaleti gya Galilaya, Guchundile na Yordani. ¹⁰ Helidabwile mmadi gumonine gulu ubugua mtima nahi akundulu usala hukulu hage. ¹¹ na lidi uhuma hekulu, Gogwe noo Mwananyi, mmunjwa gwanyi, gwandihubenja. ¹² Hoka haho Mtima gummilile mgaka. ¹³ Gushamine mlungu masugu maumi mana, yulu gatonjwe na Ihingili; nage gubele hamwechi na nyama cha mgala, na malaika babele humkilila. ¹⁴ Ata hanyuma ha Yohana uhambwa, Yesu nuugya Galilaya, kutela mtambila gwa Mwano gubenju gwa Abetcha. ¹⁵ guganine, Mengo mawilila, na buolo bwa Abetcha wahuhia, libechiwe, na uwasha Yesu. ¹⁶ Nage hebele huhita mibamba mwa ichiba ya Galilaya, gummonine Simoni na Andele mshiwabo bali hutela maila mmiichiba; yulu babele basengi. ¹⁷ Yesu gubasambile chuwe mundame, nene niimmita uba besengi ba batu. ¹⁸ Nabo nuushiga maila mabo, boo nuumlama. ¹⁹ Kukililile hambele, gee nuumona Yakobo gwa Zebedayo, na Yohana mshiwabo, nabo babele m'bwato, bali hulua maila mabo. ²⁰ Haho nuubakita, bamshikile sabo Zebedayo m'bwato hamwechi na batu ba busulu, bagila na uumlama. ²¹ Bagile ndila gya Kapelenaumu, na lusugu lwa ulihosha gugingile mmihwilo, na ugigia. ²² Bagagilwe na lugigio lwage; bululi gubele hugigya nahi mtu gwa isuba, nangu nahi bagochi ²³ Na mmihwilo yabo mubele mtu msumwa gwa miha, gugaibile wa lidi, ²⁴ guganine, tuli nobe ii, Yesu gwa Nazareti? wiwii wachwa utuhaga? ²⁵ Nuumana wiinanyi, Mmaha gwa Abetcha. Yesu gummambile, guganine, hamba anywa, ummume. ²⁶ Guya mmaa guntile bimbalaga, gulilile wa lidi lyata, goo noo ummuma. ²⁷ Bagagilwe bose, na babuchene, baganine, ii yii ino? Ii bumana buhya! Yulu wa uoma wage guluhusambila miha nagyo gilihumulicha. ²⁸ Mwano gwake gugililile bihana byose na sii gyose na mibamba mwa Galilaya. ²⁹ Na habatoboile mmihwilo, bahiile mndu gya Simoni, na Andele hamwechi na Yakobo na Yohana ³⁰ Na mnake buo na Simoni, mnage na mmachage, gubele mmitanda, msumwa gwa ihupu; boo noo uuma mwano gwage. ³¹ Gumshenene, gumginune wa ubwata uboo, ihupi inumine na gubagilile. ³² Hamahiile mengo ma igolo, na lyahuhwa uchinda, babele hummilila bose bene bashibele huosha na basumwa ba miha. ³³ Na mbuga gyose giongolane u mchango. ³⁴ Ge nuhonya beengi babele na bisumi, guhunye miha gingi, gushiliile miha gidogome yulu gimmanine ³⁵ Haluelo pee guchuile nuugya ihana ishibele batu, nusuba ubo ³⁶ Simoni na beenage bamlamine. ³⁷ Nabo habammonine bamsambile, batu bose balihuengo ³⁸ Gubasambile tugye inge ihans, u tunge tu mabuga tuine tuli hooka nagye ulisamba mwano noo; nichwilile iyo. ³⁹ Gugile nalisamba uu bihwilo byabo mmibaloo ya Bagalilaya na uhonya miha. ⁴⁰ Mtu gwa bushondo gumchilile na umtongelela na umpungila machwi, na umsambila, wahubenja upahashe. ⁴¹ Nage gumonene kene, na ugolola uboo wage, gee nuumuda, nauganina nabenja uhahale. ⁴² Wa abilo bushondo bwake bummine ge noo uhahachiwa. ⁴³ Gumaninye wa uoma na uumunya ⁴⁴ Gumsambile, lola, usisambile mtu inywa yoyose, ugie lobe, ugia ulimonya u bibuli, uhane lutangi nahi bidogomine Musa yulu ya uhahachiwa obe ibe ya umonea. ⁴⁵ Ge nutula uta mitambila na ulisamba iya inywa, ata Yesu gushioshiche iyaka wa hululu mmbuka; gushamine hambuka ha mbuga hashibele batu, bamgilile uhuma bihana bingi.