¹ Luhanga lubi lwanyi! Bululi nene ii nahi hao habahwile usola biguma mengo ma kamo, nahi zabibu chili husolwa hanyuma ha ueswa; hashi iama ya mauwa ma uliwa ; mtimaa gwanyi gulihubenja tini lya litangi. ² Mtu gwa unyemya Abetcha gwahuma, gashimoneye mno minbaloo, iyakahashi mtu gwa kiine u batu; bose balihulibisa yulu gagese mashi; kila mtu gulihuhiba mshiwabi na bwila. ³ Maboo mabo malihuwata bibii balihubigila wa chigilwe, mtummata gasabe ugechwa milomo, mgechi gwa milandu gulisili hoka ugaa; mtummata gulihodogoma bibii bili bigiluchu mnda mtima gwage; bibyo noo byabali hulongya bibyo hamwechi. ⁴ Mtu gya msoga hawingi henyu guli nahi mbigili, na mtu gubisama mmanga mwabo ii m'bii uhima mgumbo gwa yookole; mamo masugu ma baushi bobe, noo lusugu lwa uchwilwa obe, lwahuhiya; haho noo hichwa udidibuwa wabo. ⁵ Mushimbwashe genda, mushim'biile alomwe, maudagolo, uuse michango gya milomo gya anywa obeyulu mmachobe mine gulihulala myaali moba gashimane mwano. ⁶ Bululi mwana gulihumdambya sake mmee, na msiha ugimana na uhimana na mnage; na mmachana gya mginjwe uhimana na mnage buo; amangu a mtu ii mtu gwa mndu mwage gee mine. ⁷ Bino nene nimlolela Mlume ; nimmemba Abetcha gwa uhugononwa wanyi; Abetcha anyi ipulila. ⁸ Nangu useelela yulu yanyi, Ee amangu anyi; handigwa, nigimana iyaka; handishama mnda mdoo, Mlume gubi lwengi lwanyi. ⁹ Nilitolelecha buhuchibwa Mlume, wa yulu mammanya; na halindogomena ugambwa wanyi, na ungitila uononywa; gwipila hambuga u lwenge, na nene nimona kiine gyage. ¹⁰ Haho amangu anyi imona iyo ihisha, na buchi bwim'bwila, gee mine gunganine, Guli uhi Mluma, Abetcha obe? Meso manyi mimlola; bino gwihyililwa nahi biswaswa bya mndila gyagyata. ¹¹ Ii lusugu lwa ugubaabibambacha byobe! Chuba lilyo mpaga ulungwa koo. ¹² Luszugu lulobichwa uhuma Ashulu na mabuga ma Misili, na uhuma Misli mpaga luya ludi, na uhuma bahali lili mpaga bahali lili, na uhuma loono lulu mpaga loono lulu. ¹³ Ata bibyo ibaloo ibi mauwa bululi bwa babo bene bali hushama mo,wa yulu ya bigumabya bigilanywa byabo. ¹⁴ Ubalisha batu bobe wa lubango lobe, ihichiya buhyana bobe, bali bashame boo buchima , mmiisowa hawingi ha Kalmeli; na ubalishe u Bashani na Gileadi, nahi masugu ma aala. ¹⁵ Nahi naya masugu ma uhuma ube msii gya Misili nimmonya bihisho bya bigagi. ¹⁶ Mioga gyimona, na udambya mme uoma waboose; bibiya maboo mobe gegulu hamiswe gyabo, matu mabi mabi na buhuli. ¹⁷ Bilamba ihwili nahi ndowa, nahi misohe gisugandala hegulu ha sii byihuma ha bihana byababele hulibisa, balihudanda; biicha wa Mlume, Abetcha etu, wa booba, nabo bimona booba wa yulu yobe. ¹⁸ M nanyi gulli Abetcha nahi gigwe, mine gulihuleelela buubi, na uleelela buubi bwa batu bage ba buhyana bwage bene bashigele? Gushibashama na sungu chage milumgu, yulu gee gusuleelela uleelela. ¹⁹ Gwigiwila na utuonona; gwihyilila buubi bwetu,; na gogwe wibutela buubi bwabo bose mmabenga ma bahali. ²⁰ Gogwe wibwilichicha Yakobo kiine gyobe , na Ibulaahimu uleelela ube, byolibalahile bamasetu utula masugu ma aala.