¹ Mushuolwe uita miishi gyo gyose, na mushiligyimiine mmishi gwa ubada, ata gwa liwe, ata ihanda ya mmishi gwa liwe lyo lyose lya litogolwe mnda sii gyenyu yulu ya ulitambikila; yulu nene noo Mlume, Abetcha enyu. ² Muuse Sabato chanyi, na uhanyemya hahaha hanyi; nene noo Mlume. ³ Nambo m'begyata mnda alago anyi, na umausa malagano manyi, na umagila; ⁴ haho noo handinyesha mabula menyu ha mengo mage, na sii gyibuta biliwa byage, namti gya mmabala gyiiha biguma byage. ⁵ Iyaka uhula biliwa byenyu wigililila ndaa na mengo ma usola zabibu, na usola zabibu wigililila ndaa na mengo ma uuna mbuto; benywe mwiiya biliwa na ugyuta, na ushama mnda sii gyenyu wa kolongecho. ⁶ Nene nimma tall mnda sii, iyaka mwilala na hashibi mine gwimdidibula; nene nichisungya nyama cha buhuchi mnda sii gyenyu, na ailu ashihita mnda sii gyenyu. ⁷ Na benywe mwichinga tumangu twenyu, nabo bigwa u mbele wenyu wa ahilu. ⁸ Batu ba wenyu bichinga batu sambi, na batu sambi ba wenyu bibachinga batu uki umi; na tumangu twenyu twigwa u mbele wenyu wa ahilu ⁹ Na nene nilosha yenyi yanyi wamli, na umma bubushi bwiingi, na umlibiwa; na nene nigimiya alagano anyi hamwechi nenyu. ¹⁰ Benywe mwiiya mbuto gyaala gyine gyamubiila masugu meengi, iyaka biya byaala mwibihunya, yulu mwabiye bya bihya. ¹¹ Nene nibiya bushamo bwanyi hawingi henyu; na luhuda lwanyi lushimmonywa. ¹² Na nene nigyata hawingihenyu, na nene nibi Aetcha enyu, na benywe mubi batu banyi. ¹³ Nene noo Mlume, Abetcha enyu, gumlushiche muhume mnda sii gya Misili, yulu mushibe baacha babo; nene ninooga mti gwa uhamba maoshi menyu, nimgyasha mugyate bisoga. ¹⁴ Alakini nambo mushipulicha, iyaka nambo mushibenja ugila malagano mamo mose; ¹⁵ benywe mubeusa alago anyi, na luhuda lwenyu lubeonywa uonona wanyi, iyaka nambo mushibenja ugila alagano anyi; ¹⁶ na nene nimgila ino ikoko; nichwisha hegulu henyu udidibula, usumwa ya yaali na ihupu, byine byidogya meeso menyu, na ugonja luhuda; na benywe mwiuna matete menyu bunene, bululi tumangu twenyu twibiya. ¹⁷ Na nene nihugulula yenyi yanyi wamli, na benywe mwihulwa u mbele wa tumangu twenyu; baya bene bali huumonywa bihyilila hegulu henyu; na benywe mwisina mengo hashi mine guli humchinga. ¹⁸ Iyaka hanyuma ha bibyo nambo mushihubenja uhulicha, haho noo handimmonona nyendo njwii yuluya buubi bwenyu. ¹⁹ Nene ninoga anene a uosha wenyu; nene niita gulu lyenyu lyiguma nahi igele, na sii gyenyu uguma nahi mmubo; ²⁰ na uoma wenyu mwiugila bunene; bululi sii gyenyu gishibuta biliwa byage, na miti gyenyu gishiha biguma byage. ²¹ Nambo benywe mwigyata binda biswa na nene, na mshihubenja upulicha; nichwisha bihuli nyendo njwii hegulu henyu, nahi bili buubi bwenyu byabuli. ²² Na nene nichwisha byiila bya buhuchi hawingi henyu, byine byimsapa baana benyu, na ugugichwa nyamachenyu cha usugwa, naumungula mube bacho wa lubalo lwenyu; na madilamenyu mabi mauwa ka. ²³ Iyaka nambo mushihubenja ugiwichiwa wanyi luhya nanyi wa bino bikoko, bibyo mulihugililia ushama pinda piswa nanyi; haho na nene nigililila ushama pinda piswa nenyu; ²⁴ nene nimmula, ehe, nene, nyendo njwii yulu ya buubi bwenyu. ²⁵ Nene nilusha ahilu hegulu henyu, ane igiwidicha buubi wa buubi yulu ya alagano anyi; benywe mwisumbichiwa mnda mabuga menyu; nene nilisha bisumi hawingi henyu; na benywe mwibiwa m maboo ma tumangu twenyu. ²⁶ Haya handibela maudagilo menyu ma mkati, baachana umi bichela mikati mnda ibulu imwechi, nabo bimma mikati gyenyu iyaka wa ulingilila wa lulingo; benywe mwiiya na mushigyuta. ²⁷ Iyaka ubi hanyuma ha bibyo byose nambo mushihubenja upulicha, na mulihugyata ka wa pinda piswa na nene; ²⁸ haho na nene nigya wa ugyata pinda piswa nenyu wa uchigililwa wanyi; nene nimmonona nyendo njwii yulu ya buubi bwenyu. ²⁹ Benywe mwiiya nyama cha mibili gya bawalubaga benyu, na nyama cha mibili gya bawa misiha benyu mwichiya. ³⁰ Nene niidogya ihana yenyu ya iginyubu, na ugyisha miishi gyenyu gya chuba, nene nitela bitumba byenyu hegulu ha bitumba bya miishi gyenyu; na luhuda lwanyi lwimmonywa. ³¹ Na nene niita mabuga menyu uba bibunduguchu, nabihana byenyu bya bihaha uba mauwa; na nishihulicha mahembwe ma malashi menyuma mabenju. ³² Nene nigibiya gigyo sii uba mauwa; na tumangu twenyu twine twisha ubo twigigagilwa. ³³ Na benywe nimsala-sala hawingi ha mioga, nene nihulula ahilu unyuma wenyu; na sii gyenyu gibi m mauwa, na mabuga menyu uba bibunduguchu. ³⁴ Haho noo sii hagiseelela Sabato chagyo, mengo magibi mauwa, na benywe hamubi mnda sii gya tumangu twenyu; haho sii gyilihocha, na useelela Sabato chagyo. ³⁵ Mengo mo mose hagibi mauwa, gyilihocha; noo ubo ulihocha wagishibele nao mengo ma Sabato chenyu, haya hamubele bashame mnda gigyo sii. ³⁶ Iyaka babo ba wenyu bene bishigala, nibabiya booba mnda mitima gyabo, wa biya bibaloo bya tumangu twabo; na liidi lya yaanyi hayigululwa yibasinya; nabo bisina, nahi mtu byesusina ahilu; nabo biigwa haho hene hashi mtu mine gulihubachinga. ³⁷ Bano bigwilana boo bene wa boo bene, nahi u mbele wa ahilu, haya hene hashi guchingana; namushibi nauoma wa ugimana u mbele wa tumangu twenyu. ³⁸ Na benywe mwidigwa hawingi ha mioga, na sii gya tumangu twenyu gyimmina. ³⁹ Na batu ba wenyu bene bishigala bihunguwa uoma wabo yuluya usona wabo, mnda bibyo bibaloo bya tumangu twenyu; iyaka bihunguwa uoma yulu ya usona wa bamasabo, hamwechi nabo. ⁴⁰ Nabo bilibecha usona wabo, na usona wa bamasabo, wa lubengo lwabo lwababengile yulu yanyi, iyaka ugana ibalo bagililila uba pinda piswa nanyi, ⁴¹ na nene nigililila ugya pinda piswa wabali, naubabiya mnda sii gya tumangu twabo; alakini haho, nambo mitima gyabo gishi gya gigibe kumbi gibelisacha, nabo ugitabicha uononywa wa usona wabo; ⁴² bibyo niengelecha alagano anyi hamwechi na Yakobo, iyaka alagano anyi hamwechi na Isaka, iyaka alagano anyi hamwechi na Iblahimu niaengelecha; nene nigiengelecha giya sii. ⁴³ Sii nagyo gyishigwa nabo, nagyo gyiseelela yulu ya Sabato gyagyo, hagibi mauwa basahubaho; nabo bigitabicha uononywa wa usona wabo; wa ibalo, ehe, m wa ibalo bauhanya uonona wanyi, na luhuda lwabo lwaonywa alago anyi. ⁴⁴ Alakini hamwechi na bibyo byose, hene hababi mnda sii gya tumangu twabo, nene, nishibatela, na nishibaonywa, nabachimye abisa, na unoga alagano anyi hamwechi nabo; bululi nene noo Mlume, Abetcha abo. ⁴⁵ alakini wa yulu yabo niaengelecha alagano anyi na bamasabo, andibalushiche uhuma mnda sii gya Misiliu mbelewa meeso ma mioga, yulu ya ugana naabe Abetcha abo; nene noo Mlume. ⁴⁶ Ano noo alago na uonona na m'bindo, Mlume elibiile hawingi hage gee na baana na Isilaeli u luya loono lwa Sinai uhitila uboo wa Musa.