¹ MLUME gumgishileMusa, na udogoma nage uhuma mnda bushamino bwa busambeno, gumsambile, ² Dogoma na baana ba Isilaeli, ubasambile, Mtu gwa wenyu mine gwimtangila MLUME lutangi, mwitangila lutangi lwa nyama chusugwa, cha ng'ombe na cha miyoo. ³ Lutangi lwage ugana m lutangi lwauchigya lwa ng'ombe, gwihana ng'ombe gya mlume gya giwilile; gwihyicha ha mchango gwa hemalya busambeno yulu bagitabichiwe u mbele wa MLUME. ⁴ Hanyuma gwibiya uboo wage hegulu ha mswe gwa lulo lutangi lwa uchigya; nalu lwigitabichiwa yulu yage, bululi bwiita usambanya yulu yage. ⁵ Nage gwigishinja giya ng'ombe u mbele wa MLUME; hanyuma baana ba Haluni, babo ba bibuli, bihyicha hoka mamo mashi, bihungolola mashi magyo mibamba mwa butambikilo byinebuli ha mchango gwa hema lya busambeno. ⁶ Hanyuma gwibaga lutangi lwa uchigya naugeda bihindi byage. ⁷ Hanyuma baana ba Haluni, bibiya aahya hegulu ha butambikilo, na na ulimba kunyi hegulu ha aahya, ⁸ hanyuma baana ba Haluni, ba bibuli, bibilimba biya bihindi bya nyama, mswe wagyo na mauta magyo hegulu ha kunyi chine chili hegulu ha aahya ene ali hegulu ha butambikilo; ⁹ ila mila gyagyo na bigima byagyo, gwibigoga na maadi; na gugo ibuli gwibichigya byose hegulu ha butambikilo yulu bibe lutangi lwa uchigya, lutangi lwa ushenya wa ndila gyaahya, lwa bushio bwa ubenjiwa na MLUME. ¹⁰ Nalutangi lwage nambo mlwa uhuma mnda ihichi, uba ya miyoo, ao uba ya mabuchi, uba lutangi lwa uchigya; gwihana mlume gwa guwilile. ¹¹ Nage gwigishinja haya ha luubi lwa butambikilo lwauboo wa uachi u mbele wa MLUME; na baana ba Haluni, babo ba bibuli, bihongolola mashi hegulu ha butambikilo ngubi chose. ¹² Hanyuma gwigeda bihindi byage, hamwechi na mswe gwagyo, na mauta magyo; hanyuma gwibilimba biya bihindi hegulu ha kunyi chine chili hegulu ha aahya ene ali hegulu ha butambikilo; ¹³ ila mila gyagyo na bigombo byagyo, gwibigoga na maadi; na gugo ibuli gwibishenya byose na ubichigya hegulu ha butambikilo; lutangi lwa uchigiwa wa ndila gya aahya, lwa bushio bwa ubenjiwa na MLUME. ¹⁴ Na lutangi lwage lwine lweli mtangila MLUME uba lutangi lwa uchigya, uba iyu tunonyi, Haho helilusha lutangi lwage uba diba ao uba byaana bya akundulu, ¹⁵ Hanyuma ibuli gwishenya hoka na butambikilo, nage gwishinja mswe, na uachigya waahya hegulu ha butambikilo; na mashi maomihongolowa mibamba mwa butambikilo; ¹⁶ Hanyuma gwihunya gingi lwao, hamwechi na mila gyao, na utele hibamba ha butambikilo luubi lwa mlugulu, hene hasutelwa mto; ¹⁷ hanyuma gwiagadula hamwechi na bihwahwa byao, ila gashiagadule bibaa bibili; hanyuma ibuli gwiachigya hegulu ha butambikilo, hegulu ha kunyi chine chili hegulu ha aahya; m lutangi lwa uchigya, lutangi lwa ushenya wa ndila gya aahya, bushio bwa ubanjiwa na MLUME.