¹ Hanyuma bino noo bibaloo byine baana ba Isilaeli byabasapile mnda sii gya Kanaani, biya byine Eleazali ibuli na Yoshua mwaana gwa Nuni, na bagimaninyi ba madu ma bamatata ba bilongo bya Isilaeli, byababagabulile. ² wa ulamana na lulo luti lwa buhyana bwabo, byoka biya nahi Mlume byeliganine uhitila uboo wa Musa, wa yulu ya biya bilongo yahabula, na iyaisunyi ya ilongo. ³ Bululi Musa gubele gwahuhwa ubaha buhyana biya bilongo bibili na isunyi, m bwa bubili bwa Yolodani; alakini gushibahele Balawi buhyana bo bose hawingi habo. ⁴ Bululi baana ba Yusufu babele bilongo byopi, Manase na Eflaimu; nabo bashibahele Balawi ibaa mnda gigyo sii, alakinibabahele mabuga ma ushama, hamwechi na mabala magyo yulu ya ulishicha nyama chabo cha usugwa, na wa yulu ya minanyi gyabo. ⁵ Byoka biya Mlume gumsambile Musa, babo baana ba Isilaeli baite bibyo, nabo bagabulile giya sii. ⁶ Mamo mengo baana ba Yuda bamshenene Yoshua uya Gigali; na Kalebu, mwaanagwa Yefune, gugo Mkenezi, gumsambile, Gogwe ugidi iya inywa Mlume yelisambile Musa, gugo mtu gwa Abetcha, yulu ya mwano gwanyi, nayulu ya mwano gobe gogwe, haya hatubele Kadesh-balnea. ⁷ Nene nibele mtu gwa myaa maumi mana gya ubuswa, haya Musa mgichi gwa Mlume helitumine nagye Kadesh-balnea yulu ya udinda gigyo sii; nene nimlushishe mwano iyaka, nahi byabibele mnda mtima gwanyi. ⁸ Alakini baya bashiwetu bene baselile ugya hamwechi nanyi badidibule mitima gya batu; alakini nene nimlamine Mlume, Abetcha anyi, wa uwilila. ⁹ Hanyuma Musa gundhile pa lulo lusugu, guganine, Chigilwe gigyo gyine gyagyatila magulu mobe gibi m buhyana bobe gogwe, na wa baana bobe milumbu, bululi gogwe umlamine Mlume, Abetcha obe, wa uwilila. ¹⁰ Hano bino, lingamina, gee Mlume gwambiya na mwego, nahi byeliganine, myaa gino maumi mana na gitano, utula mamo mengo Mlume helimsambile Musa iyo inywa, mengo Isilaeli haibele hugyata mgala; na bino loola, bino lino nisili na myaa maumi inana na gitano gyanyi gya ubuswa. ¹¹ Ata bino nene nina uoma wanyi lino nahi byandibele masugu maya Musa melitumine; nahi bibele uoma wanyi maya mengo, na uoma wanyi noo byauli hano, wa bita na wa utobowa hambuga na wa ugingila mnda. ¹² Bino hano upe luno loono, lwine Mlume gulisambile mwano gwalo luya lusugu; bululi gogwe uhuliche luya lusugu nahi Baanaki byababele uya, na mabuga byamabele maata na mina migumbo; inangwa bibyo gee Mlume gubi hamwechi nanyi, nene nibachinga baahume hambuga, nahi Mlume byeliganine. ¹³ Yoshua gummalile mihaa, gee numma Kalebu, mwaana gwa Yefune, Hebloni uba buhyana bwage. ¹⁴ Wa bibyo Hebloni uba buhyana bwa Kalebu, mwaana gwa Yefune, Mkenizi, ndaa na lino; wa ibalo gumlamine Mlume, Abetcha a Isilaeli, wa uwilila. ¹⁵ Wa bibyochine lya Hebloni haya hatangi lubele hugiswa Kiliath-alba; Guya Albagubele m mtu mmata uhima beenage bose u baana ba Baanaki. Gigyo nagyo nuuba talala, bita byo nuusunga.