¹ Haho hanyuma ha uuwa wage Musa, mgichi gwa Mlume, Mlume gumsambile Yoshua, mwaana gwa Nuni,mgichi gwa Musa, guganine, ² Musa mgichi gwanyi guwile; bino hano, gimana dabuwa luno luudi Yolodani; gogwe na batu bano bose, mwagye ndaa na sii gyandibaha baana ba Isiaeli. ³ Bihana byo byose byine byigyatila maasa na magulu menyu, namma benywe, nahi byandimlahile pa Musa. ⁴ Utula guno mgala na luno loono, Lebanoni, ndaa na luudi luya lwa lwata, luudi lwa Flati, sii gyose gya Bahiti, iyaka ndaa na bahali lyata luubi lwa usala wa chuba, haho noo habi lugumba lwenyu. ⁵ Hashibi mtu mine gwigimna u mbele obe masugu mobe mose ma mwego gobe; nahi byandibele na Musa, noo byandibi hamwechi nobe; nishiuhungwila na nishi ulecha. ⁶ Ube na uoma na mtima gwa gunyemu, bululi m gogwe noo wibahyanya bano batu sii gino gyandibalhile pa bamasbo ugana nibaha. ⁷ Ube na uoma ka na mtima gwa gunyemu gwiingi, ulingamine ugila wa ulamana na m'bindo gose gweliusambie Musa mgichi gwanyi; nangu uleya, ugya uboo wa ulume aowa uachi, wagililwe abisa ose oligya. ⁸ Itabo ino ya m'bindo ishihume mnda anywa obe, bino wabehulanga mchuba na busugu, waoshe ulingamina ugila ulamana na binywa byose byine bigolilwe mmo; bululi noo byigililwa ndila gyobe, hanyuma byolihamaa abisa. ⁹ Wi wii! Gushi nene niusambile? Ube na uoma na mtima gwa gunyemu; ushimone booba na ushididibuwe; bululi Mlume, Abetcha obe, guli hamwechi nobe o ose wine oligya. ¹⁰ haho Yoshua gusambile baata ba mabuga na ba batu, guganine, ¹¹ Hiswe hawingi ha bitula, mwabasambele babo batu, mwagane, Iswe lumima biliwa; bululi hanyuma ha masugu matatu mwidabuwa luno luudi Yolodani, yulu ya ugingila na uguhyilila sii gyelimma Mlume, Abetcha enyu, mwaoshe ugihyilila. ¹² Iyaka Yoshua gubasambile Baleubeni, na Bagadi, na baya isunyi ya ilongo ya Manase, guganine, ¹³ Iengelechiwe iya inywa imsambile Musa mgichi gwa Mlume, guganine, Mlume, Abetcha enyu, gwamma benywe ulitucha, nage gwimma gino sii. ¹⁴ Baachi benyu, na baaba benyu, nabisuganya byenyu, byishama mnda sii gimmele Mus m'bwala mwa Yolidani; alakini benywe mwidabuwa hambele ha bashiwenu, mubi malichwiye tuome twentu, batu bose bene bali na uoma, na mitima ginyemu, yulu mwabawatiliche; ¹⁵ ata Mlume byine byihwa ubaha bashiwenyu ulitucha, nahi byelimmele na benywe, nabo bahewe ugihyilila sii gyelibaha Mlume, Abetcha enyu; haho noo hamwigiwilila sii gya buolo bwenyu ugihylila, gyine Musa mgichi gwa Mlume gyemmele m'bwala mwa Yolodani luubi lusuchuwa chuba. ¹⁶ Bamgaile Yoshua, baganine, Bibyo byose byolitusambile twibigila, na ihananyoyose yine yolitutuma twigya. ¹⁷ Nahi biya byatummuliche Musa u bikoko byose, noo byatwiuhulicha na gogwe; Mlume, Abetcha obe, na aabe hamwechi nobe ka, nahi byelibele hamwechi na Mus. ¹⁸ Mtu ge gese mine gwibenga alago obe, gashihuliche binywa byobe u bikoko byose byolimsambila, gwihagwa. Ube na uoma na mtima gwa gunyemu, iyo ka.