1 Iyaka Elihu gugililile na ugana, 2 Pembe hacho nanene niusambila; Bululi nilina binywa wa yulu ya Abetcha. 3 Nichwisha lwengu lwanyi uhuma koo, Nene nimma M'bumbi gwanyi kiine. 4 Nambo ugana binywa byanyi ibya lulimi; Guya guwilile mnda malango guli hamwechi nobe. 5 Loola, Abetcha ali nauoma na ashi hum'bedula mtu ge gese; Guli na uosha yulu ya uoma wa umana. 6 Gusuusa mwego gwa basone; Na gusubaha bene bali hususulwa kiine gyabo. 7 Gee gushibabahuminya meeso mage bene bali na kiine; Na ata hamwechi na moolo gusubabiya U bisuba bya buoolo milumbu, nabo basuginunywa. 8 Boo babehambwa wa tumangila, Babeguhwa wa migochi gya asusu; 9 Haho gusubamonya bigilanywa byabo, na buubi bwabo, ugana bagila wa butundu. 10 Gee gusubugula maatu mabo, bahuliche mihano, Na ubalaga bagiwile na uleya usona wabo. 11 Nambo babehulicha na umgilila, Bihisha masugu mabo mnda ugililwa, Na myaa gyabo mnda saso. 12 Nambo bashihulicha, bichima wa ahilu; Nabo biiwa hashi ata lwengu. 13 Bibyo baya bashi humnyemya Abetcha mnda mitima gyabo bali hulibiila sungu Bashi hulilila mbatilicho mengo mesubahamba. 14 Boo basuwa bili bawalubaga, Na mwego gwabo gusuchima hawingi ha baabi. 15 Gee gusummonya guya gususuwe wa ndila gya asusu age, Na ubulula maatu mabo yulu ya umonenywa. 16 Ehe, gee gwabaogolwela uhume mnda asusu Ndaa na wihana yine ili yaata, yine ishi na asusu; Na yine ibiilwe u mesa mobe yabagilula mauta. 17 Ata bibyo wagilula uonona wa basone; Uonona wa kiine ushi uwashiche. 18 Biino uliuse, chishichwe sungu chishiubule na uite bwenja; Na ushigitabiche bwata bwa uhogononywa u uude. 19 Wi wii! Bitundu byobe byuwilila, na ushibe mnda asusu, Ao uosha ose wa uoma obe? 20 Ushibe na itima yulu ya busugu, mengo masugechwa batu ha bihana byabo. 21 Liuse, ushiulochi usona; Bululi wausobola ubo uhima asusu. 22 Loola, Abetcha asugila bya tenene wa uosha wage; Mnanyi gusugigya nahi gee? 23 Mnanyi gumlagile ndila gyage? Ao mnanyi gunaosha udogoma, Gogwe wagila byine bishi bya kiine? 24 Engelecha uginuna mgilo gwage, Gwine gugimbile batu. 25 Bato bose bagulola; Batu bali hugulingamina wa koo. 26 Loola, Abetcha iyaata, beswe tushimgidi; Lubalolwa myaa gyage lushi huengwa. 27 Bululi gee gusubula hegulu matata ma maadi, Hamasugeseya u mbula uhuma wimundi mundi yage; 28 Maya mene mali huhuma u matumba malihunya Na usamwina batu ma meengi. 29 Ehe, mtu gunamana na uganjwa wa matimba, Miukulo gya bushamo bwage? 30 Loola, gee, gusuganda ugema wage, umchunguluwe; Nage gusuunina mabenga ma bahali. 31 Bululi gusuonona mioga gya batu wa mano madila; Gusuhana iliwa wa madanga 32 Gee gusuwila maboo mage wa ahenyu henyu; Na ulaga itoto yolita. 33 Lwindo lwage lusuhana mwano gwage, Gusulama na sungu chage yulu ya usona