² Gubushile bawalubaga njwii na misiha gitatu. ³ Bitundu byage bibele miyoo uki njwii, na ngamia uki chitatu, na ng'ombe uki limwechi, na punda sambi chitano, na batu ba mndu beengi abisa; bibyo gugo mtu gubele anyemu abisa uhima batu bose ma mlugulu. ⁴ Na baana bage babele hugya uya na unywa mnda ndu gya kila gumwechi gwabo wa lusugu lwage; nabo babele hutuma na ugita kachi chabo chitatu yulu bachwe uya na unywa hamwechi nabo. ⁵ Biino habele, ha mamo msugu ma uya na unywa wabo hamabele mahuwilila, Ayubu gubele huhila lutangi wa bali na ubahahacha, hanyuma gubyuwile halwelo umayaya, na utangila lutangi lwa uchigya ulamana na lubalo lwabo bose byababele; bululi Ayubu guganine, Hange baana banyi bagila buubi, na umsebulula Abetcha mnda mitima gyabo. Noo byelibele hugila Ayubu masugu mose. ⁶ Habele lusugu lumwchi babo baana ba Abetcha bagile ulimonya boo bene u mbele wa MLUME, Ihingili nayo igile hawingi habo. ⁷ MLUME gum'budiche Ihingili, Ulihuhuma uhi? Haho Ihingili gumgaile MLUME, na ugana, Nahuma ugya nachunguluwa- chugnuluwa mmibaloo, na ugya nagyata ubo nubo mnda ibaloo. ⁸ Hanyuma MLUME gum'budiche Ihingili, Wi wii! Wamlingamina gugo mgichi gwanyi Ayubu? Bululi hashi ata mtu gumwechi guli nahi gee mnda ibaloo, mtu m'bwilile na gwa kiine, guli humnyemya Abetcha na ulihengya na buubi. ⁹ Haho Ihingili gumgaile MLUME, na ugana, wi wii! gugo Ayubu gulihumnyemya MLUME bunene? ¹⁰ Gogwe usamchunguluwa na iutu ngubi chose, hamwechi na ndu gyage, na bitundu byose byeli nabyo? Migilo gya maboo mage wagihalila mihaa, nabiya byage byabula mnda sii. ¹¹ Biino golola uboo obe hano, uude bibyo byose byine byeli nabyo, nage gwiusebulula u mbele wa meeso mobe. ¹² MLUME gumsambile Ihingili, Loola, byose byeli nabyo bili mnda uosha obe; ata bibyo ushigolole uboo obe hegulu hage gee mine. Haho Ihingile guhumine u mbele wa yenyi ya MLUME. ¹³ Bigiliya lusugu lumwechi babo bawalubaga na misiha gyage hababele huya na unywa divai mnda ndu gya mmulwabo, ¹⁴ gwa mmichi gummyile Ayubu na umsambila, Chicho ng'ombe chibele hulima, na punda chibele hulishiwa hoka nacho; ¹⁵ haho Baseba babalwa bita, bachiguhile bagile nacho; ehe, babahagile babo bagichi wa bwigi bwa ahilu, nene buchima nahogonowa, nene ka uuchwila na mwano. ¹⁶ Gugo gwilibele hudogoma, hachwile na gunge,na ugana, Aahya Abetcha asalile uhuma hegulu na uchigya miyoo, na baya bagichi, na ubachimya; nene buchima nahogonowa, nene ka uuchwila na mwano. ¹⁷ Gugo gwilibele hudogoma, hachwile na gunge, na ugana, Bakaldayo baita migoma gitatu, bagwilile ngamia, bagile nacho, ehe, babahagile baya bagichi, wa bwigi bwa ahilu; nene buchina bwanyi nahogonowa, nene ka uuchwila na mwano. ¹⁸ Gugo gubele gwili hudogoma, gunge guchwile, naugana, Bawalubaga bobe namisiha gyobe babele huya na unywa divai mnda ndu gya mmulwabo; ¹⁹ haho, loola, mnaga gwa uoma nuhuma luubi lwa mlwanaganywa, nugihula gigyo ndu u masunga mage mose mana, nagyo nubagwila babo bawalubaga na misiha, nabo baawa; nene buchima bwanyi nahogonowa, nene ka uuchwila na mwano. ²⁰ Haho Ayubu gugimene, na ugula ichibabo yage, hanyuma gubegile mswe gwage, na uugwa hasi, na ugwa lubulu-bulu uli Abetcha. ²¹ guganine, Nene nihumine mnda Mwa mago nili buchi, nene nigiwila uya byoka biya buchi; MLUME guhanene, na MLUME gwaguha; china lya MLUME na litonywe. ²² Ha bibyo bihisho byose Ayubu gushigilile buubi, na gushimlangile Abetcha wa buhugi.