¹ Batu basugana, Mtu gabemleya mmachage, na guya mmachana gabegya, gee nuba mmachi gwa gunge, wi wii! Guya mlumyage gunamgiwicha iyaka? Wi wii! Gigyo see gishibi gisonyu? Bibyo gogwe wagila bihisho bya lusengu na bugenda bobe; gogwe, wii! Wingiwilila nene? Gwagana MLUME. ² Ginuna meeso mobe, waloole masongo ma koono, wamone; ili ihi ihana yine yabasalala nobe? Mibamba ndila ushamine yulu ubahembe, nahi biya Mwalabu mnda lwanaganywa; na gogwe wabiya sii usona yulu ya lusengu lobe na buubi bobe. ³ Wa bululi bwa bibyo hashibi na imundi-mundi, na hashibi na mbula gya lunyange; na ata bibyo ubele na ibala ya susengu u yenyi yobe, uhanyinye umona abule. ⁴ Wi wii! utula mano mengo ushindilila, Ee Tata, gogwe uli alombwe a buwalubaga bwanyi? ⁵ W wii! Gubi na sungu ndaa na milumbu? Gubinacho ndaa na isula? Loola, wagana bibyo, bino wagile bihisho biibe, walama ndila gyobe gogwe mine. ⁶ Iyaka, MLUME gusambile ha masugu ma oolo Yosia, Wi wii! Umonine bigilile Isilaeli miine gulihubenga? Gwasele hegulu ha koono chose cha chilahu, gugilile uya bihisho bya lusengu, iyaka, hasi ha mti gogose gwine guli na byaanyi bya bibisi. ⁷ Nene nagana hanyuma ha gee uhwa ugila bibyo byose, Gwingiwilila nene, ata bibyo gusagiwila; na kachage, Yuda gwina bushimbi, gumonine bibyo. ⁸ Nene nimonine, mengo mandimmonone namleya Isilaeli mine gulim'benge, nimmele mkanda gwa uleyana yulu ya masei, kachage, Yuda guya guli na bushimbi, gushimonine booba; haho gee nage gugile ugila bihisho bya lusengu. ⁹ Nabyo nuba, Wa yulu gubele mmuhu wa ugila lusengu, sii gyose gyo nuusona, nage gugilile masei na mawe na miti. ¹⁰ Na hamwechi na bibyo byose kachage, Yuda mine gwina bushimbi, gushi nangiwilila nene wa mtimagwage gose, bino ii wa lububa umeeso, MLUME gwagana. ¹¹ MLUME, gusambile , Isilaeli gulu hubanga guluhulimonya ugana gwina kiine uhima Yuda mine gwina bushimbi. ¹² Uugye ulisambe bino binywa ugya luubi lwa oboo wa uachi, wagane, Giwila, Ee Isilaeli mine gulu hubenga, MLUME gwagana; nishiulingamine wa sungu; bululi nene ni gwa uleelela, MLUME gwagana, nishibi na sungu ndaa na milumbu. ¹³ Libeche yulu ya buubi bobe ka; ugana wam'benga MLUME, Abetcha obe, ma ndila mobe masili meengi ubagila bagenyi hasi ha kila mti bwine gwina byanyi byabibisi, na mushibanyemye lidi lyanyi, MLUME gwagana. ¹⁴ Giwilwe, benywe baana bene bali na lubengo, gwagana MLUME, bululi nene nili mlumyenyu; nene niguha mtu gumwechi gwa mbuga gimechi, na babili ba ibushi imwechi, nene nibahyicha ndaa na Sayuni; ¹⁵ nene nimma baushi basubenja mtima gwanyi, bene bimlisha wa malango na wa umana. ¹⁶ Bibi hanyuma, hamwibulana uba beengi mnda gigyo sii, MLUME gwagana, maya masugu bashigana iyaka, Lindo lya malagano ma MLUME; na mushibilanga mnda mitima gyenyu; na bashiliengelecha, na bashigya ata, na bishigiliyaa iyaka bibyo. ¹⁷ Maya mengo bigigita Yelusalemu iti ya buoolo ya MLUME; na mioga gyose gyisumbila ubo Yelusalemu, bululi bwa chIna lya MLUME; na bashigyata itaka mnda ugumagala wa maoshi mabo mabii. ¹⁸ Maya masugu ndu gya Yuda gyigya hamwechi na ndu gya Isilaeli, nabo bichwa hamwechi, uhuma sii gya lubi lwa uboo uachi , ndaa na sii giya gyandihele bamasenyu gibe buhyana bwabo. ¹⁹ Haho nene niganine, Niosha wi uubiya hamwechi na baana, na uuha sii gisuunjwa, buhyana bosoga bwa ba mioga? Nene niganine, Mwingita, Senyu, na mushigaluwa na uleya uundama. ²⁰ Chigilwe nahi biya mmachana byesushiga mlumyage wa buhulihuli, noo byamungilile nene wa buhulihuli, Ee ndu gya Isilaeli, MLUME gwagana. ²¹ Liidi lili huhulichiwa mpala koono, ii ulila wabo na usaba wabo baana ba Isilaeli; bululi bagobeya ndila byabo, bamgibilila MLUME Abetcha abo. ²² Giwilwe, benywe baana ba ubenga, nene nihonya ubenga wenyu. Loola, twahuchwa oli, bululi gogwe uli MLUME, Abetcha etu. ²³ Ii winene, uwatilicha ushihuita atu ulihulolelwa uhuma ukoono; sunbilo lyine nili na ihulo hegulu ha koono; ii chigilwe, uhogononywa wa Isilaeli uli wa MLUME, Abetcha etu. ²⁴ Mndi itu ya abule yaya mgilo gwa bamasenyu utula u buwalubaga bwenyu; bihichi byabo bya miyoo na ng'ombe, bawalubaga babo na bawamisiha gyabo. ²⁵ Na tulale wa abule etu, abule etu atuunine; bululi twam;benga MLUME, Abetcha etu, beswe na bamasetu, utula ubuwalubaga bwetu ndaa na lino; na tushinyeminye liidi lya MLUME, Abetcha etu.