¹ Haho Sedekia gubele na myaa maumi mopi na gumwechi helitulile uhyilila; nage guhyilile myaa umi na gumwechi uya Yelusalemu; na china lya mnage gugishilwe Hamutali,msiha gwa Yelemia gwa Libna. ² Nage gugilile bisone u meeso ma MLUME, byoka biya nahi bigilile Yehoyakimu. ³ Bululi waibalo ua sungu cha MLUME, bibyo bihisho bigiliye mnda Yelusalemu na mnda Yuda, naubahunya bashi iyaka umbele wa yenyi yage,nage Sedekia gum'bengile oolo lya Babeli. ⁴ Hsibele mwaa gwa yahabula gwa uhyilila wage, ha mwechi gwa umi, lusugu lwa umi lwa gugo mwechi, Nebukadleza, oolo lya babelei, guchwile, gee na basolokoto bage bose, ulwa Yelusalemu, gugubali bitula yulu yage, nabo babiile mihamba yulu ya Yelusalemu ngubi chose. ⁵ Bibyo bigyo mbuga gichungulwilwe ndaa na mwaa gwa umi na gumwechi gwa Sedekia oolo lya ba Yuda. ⁶ Haho mwechi gwa buna, lusugu lwa yahabula lwa gugo mwechi, ndala gibulile abisa mnda mbuga, na hashibele iyaka na biliwa u batu ba giya sii. ⁷ Ubambacha ya mbuga ibundulwe, batu bose ba bita boo nusina, bahumine mmbuga m'busugu, ha mchango gwine gubele hawingi ha biya bibambacha byopi, hoka na hilubala hya oolo; (bibyo Bakaldayo babele bachungulubu mbuga ngubi chose;) basinine lwabo mndila gya Alaba. ⁸ Ata bibyo basolokoto ba Bakaldayo bamlamine oolo, bam'bwatile Sedekia mnda sii gya ibandabanda ya Yeliko, na basolokoto bage bose babele bamwagiye na umshiga. ⁹ Nabo noo um'bwata oolo, bammilile wa oolo lya Babeli, gubele uya Libla, mnda sii gya Hamathi, nage guhanene uonona yulu yage. ¹⁰ Haho noooolo lya Babeli nuuhaga baana ba Sedekia u mbele wa meeso mage; iyaka guhagile bauulu bose ba Yuda uya Libla. ¹¹ Gum'belile Sedekia meeso; iyaka oolo lya Babeli gummambile tumangila, gummilile ndaa na Babeli, gum'biile mnda bulogo ndaa na lusugu lwa uuwa wage. ¹² Bibyo ha mwechi gwa butano, lusugu lwa umi lwa mwechi, gugo noo mwaa gwa umi na yahabula gwa oolo lya Babeli; Nabuzaladani, mmata gwa basolokoto mlochi, gubele hugimana u mbele wa oolo lya Babeli, gugingile Yelusalemu. ¹³ Guchigiche ndu gya MLUME, na ndu gya oolo na madu mose ma Yelusalemu, ehe, ndu gyogyose gya gyata gichigichiwe wa aahya. ¹⁴ na basolokoto bose ba Bakaldayo, bene babele hamwechi na huya mmata wa basolokota gwa balochi, babundule bibambacha byose bya Yelusalemu ngubi chose. ¹⁵ Haho Nebuzaladani, mmata gwa basolokoto balochi, gubaguhile bahambwa banwe bene babeli bambuchu, na mihona gya batu bene bashigilwe mnda mbuga, na baya bene bam'bengile na umsina oolo lya Babeli, na mihona gya bagichi ba migilo gya mengo maacho. ¹⁶ haho Nebuzaladani, mmata gwa basolokoto balochi, gubaleile batu baya bene babele bambuchu uhima abisa yulu babe buusa mizabibu na balimi. ¹⁷ Nabihanda gya lusuu bya ndu gya MLUME, matao ma bahali ma lusuu mabele mnda ndu gya MLUME, Bakaldayo babibelile bihindi bihindi, baswalile lusuu lwagyo loose ndaa na Babeli. ¹⁸ Nacho ngeso, na kasu, na mano, na bilego, na mibali, na bitundu byose bya lusuu byababele hugilila, babiswalile byose. ¹⁹ Nabyo bisengo, na gyuula bya ugodela mto, ,a bilego, na ngeso, na bugiilo bwa aswenge, namibali, byutela yaanga ya aswenge,byine bibele bya nolo hawingi ha nolo, na byine bibele bya lufeza hawingi ha lufeza, mmata gwa basolokoto balochi gubiswalile byose uya Babeli. ²⁰ Bihanda byopi bahali limwechi, na ng'ombe umi na chopi cha lusuu chine chibele hasi hamatao mage, biya byine oolo Sulemani gubilongiche yulu ya ndu gya MLUME; lusuu lulo lose lushinaoshiwa ulingililwa bululi lubele lwiingi abisa. ²¹ Na bibyo bihanda ulahawage ihanda imwechi ubele medele chitatu na bihindi maumi mtuba. na bunyishi medele chibili na bihindi maumi mana bubele bugichungulubu; na bwata bwage bubele nahi santimedele inana; nayo ibele ya hululu mnda mwayo. ²² Nayi ibele na mswe gwa lusuu hegulu hayo; naulaha wa mswe gumwechi ubele wa medele gimwechi; habele na utola wa bwiilana bihanda mti hegulu ha gugo mswe ngubi chose; byose bibele bya lusuu; nayo ihanda ya bubili ibele na ulitogola nahi uya, na buhanda mti. ²³ Habele bihanda mti maumi yahabula na mtuba u chiya ngubi chage; bihanda mti; byose bibele hegulu ha bwila bibele sambi ngubi chose. ²⁴ Nage mmata gwa basolokoto balochi, gumguhile Selaya, ibuli ya yaata, na Sefania, ibuli ya bubili, na baya balochi batatu mchango; ²⁵ na mnda mbuga guguhile guya gushibagya ubaachana gumwechi mine gubele hugimena batu ba bita; na batu njwii bene babele huimona yenyi ya oolo, bene bamoneye mnda mbuga; na mgochi gwa ilume pambwa ya basolokoto, gubele hugola batuu ba giya sii, bene bamoneye mnda mbuga. ²⁶ Na Nebuzaladani, mmata gwa basolokoto balochi, gubaguhile, gubahyiche wa oolo lya Babeli uya Libla. ²⁷ Nage oolo lya Babeli gubahulile na ubahaga uya Libla mnda sii gya Hamathi. Bibyo noo biwaswilwe Yuda ugya u bucha, guhumiwe mnda sii gyage. ²⁸ Babo batu noo Nebukadleza beliwashile kole; ha mwaa gwa njwii, Bayahudi oki chitatu na maumi mopi na batatu; ²⁹ ha mwaa gwa umi na inana gwa Nebukadleza gubawashile uhuma Yelusalemu batu sambi inana na maumi inanana babili; ³⁰ ha mwaa gwa maumi mopi na gitatu gya Nebukadleza, Nebuzaladani, mmata gwa basolokoto ba balochi, gubawashile kole batu ba Bayahudi batusambi njwii na maumi mana na batano; usumbicha babo batu bose hamwechi ii batu oki china na sambi mtuba. ³¹ Na hagulibele mwaa gwa maumi matatu na njwii gwa ubululwa wage Yehoyakini, oolo lya ba Yuda, ha mwechi gwa umi na gibili, lusugu lwa maumi mopi na gitano ma mwechi, Evil-melodaki, oolo lya Babeli, ha mwaa gwage gwa gutangi gwa uhyilila wage, gumginune mswe gwage Yehoyakini, oolo lya ba Yuda, nummunya m'bologo. ³² Gudogomine nage binywa bya bisoga, gubiile isubayage hegulu ha bisuba bya maoolo mene mabele hamwechi nage uya Babeli. ³³ Nage guchulile bichwalaganywa byage bya m'bulogo, gulile iliwa u meeso mage masugu mose ma mwego gwage. ³⁴ Na itanga yage ya biliwa, gubele huhewa itanga ya biliwa masugu mose na oolo lya Babeli; masugu mose guhelwe itanga ua biliwa ndaa na ata bweliwile, masugu mose ma mwego gwage.