¹ Inywa ya MLUME ichwilile Yelemia, mbuwa, yulu ya mwano gwa mioga. ² Yulu ya mwano gwa Misili; mwano gwa basolokoto ba Falao Neko,oolo lya Misili, benebabeli hoka na luudi Flati uya Kalkemishi, haya Nebukadleza oolo lya Babeli, helilwile nabo mwaa gwa buna gwa Yehoyakimu, mwaana gwa Yosia, oolo lya ba Yuda. ³ Mulilongeche yuula ya ubandula na ngabo, mwashene yulu ya ulwa bita nabo. ⁴ Mwagande hegulu ha falasi; mushine, benywe bashinyi ba falasi; gimanywe na tukusukusu twenyu, mwaoole na kololo masumo menyu; chwalwe bigela bya bita u byali ili naho ngabo. ⁵ Nabimona bibyo yulu ya ibalo nai? Bamona iduba, bagiwila nyuma; bilume pambwa byabo byanogeya-nogeya; basina abilo abisa, bashihulyebwila unyuma; iduba ili ngubi chose; MLUME gwagana. ⁶ Mtu gwa mmuhu gashisine, na ata ilume pambwa gashihogonowe; luubi lwa uboo wa uahi hoka na luudi Flati balihytala na uugwa. ⁷ Mnanyi guno gulihuliginuna nahi luudi Nile, lwine maadi mage mali huligulula nahi ngudi? ⁸ Misili gwaliginuna nahi luudi Nile, Na maadi mage mali huligulula nahi ngudi; Gwagana, Niliginuna, nihulila sii; Nidogya mbuga na bose bene bali bashame mnda mwagyo. ⁹ Biino! Chinywe, chenywe falasi; Hingwe abilo, twenywe tubilibili twa bita; Bilume pambwa nabyo bitobowe hambuga Kushi na Putu, basulwa na ngabo; Nabo Baludi, basulwa na buta na ubunaa. ¹⁰ Bululi lulo noo lusugu lwaMLUME, MLUME gwa basolokoto, Lusugu lwa ugiwidicha buubi wa buubi, yulu gaaligiwidiche buubi hegulu ha tumangu twage; Nao ahili iiya na ugyuta, Iinywa mashi mabo ndaa na umashiga; Bululi Mlume, MLUME gwa bilume pambwa, gwina lutangi lwage mnda sii gya luubi lwauboo wa uachi hokana luudu Flati. ¹¹ China ugya Gileadi, waguhe isumbe, Ee msiha, inyundu ya Misili; ulihulongya maganga meengi bunene ka; ushihuhona ata. ¹² Miogagyahulicha mwano gwa abule obe, na ibaloo yose yagilula lilo lyobe; bululi ilume pambwa yalihyatala uli ilume pambwa nage, bagwaa bose babili hamwechi. ¹³ Ino inywa noo MLUMEyelimsambile Yelimia, mbuwa, ulisamba biya byine Nebukadleza ooli lya Babeli, byelichwa na ugilwa sii gya misili. ¹⁴ Lisambwe guno mwano mnda Misili, mwadogome uya Migdoli, na ulisamba uya Nofu, na Tahpanesi; ganywe, Gimana, ulibiye tayali bululi ahuuya ngubi chobe chose. ¹⁵ Bululi bwai bilume pambwa byobe byaguha nauhilwa koo? Basagimana bululi MLUME gwabachinga. ¹⁶ Gwabahyitacha beengi, ehe, bagwilene boo wa boo; baganine, Biino! Na tugimane, tugiwile u batu betu, ndaa na ugiya sii gyatubutilwe, twaasine ahilu ene alihutuchunguluwa. ¹⁷ Balilile ubo, Falao, oolo lya Misili, ii lwindo kaa lwa bunene, mengo melibiilwe gwanaleya mahite. ¹⁸ Nambo nene byandi na mwego, MLUME, guya china lyage noo MLUME gwa basolokoto, chigilwe gyage, nahi Taboli hegulu ha loono, na nahi Kalmeli hokanabahali, bibyo noo byelichwa. ¹⁹ Ee msiha gwagushame mnda Misili, Ulibiye tayali abisa ugya lobe nahi mmambwa; Bululi Nofu gibi mauwa, Gyichigiwa gishiahamwe na mtu. ²⁰ Misili ii m'bambagubenju abisa, ata bibyo udoga wahuchwa, Wahuchwa uhuma luubi lwa uboo wa uachi. ²¹ Na batu bagebene bachwilwa, bene bali hawingi hage, Bali naho baanaba ng'ombe bashama umalisho; Bululi boo nabo bagiwila unyuma, Basina bose hamwechi, bashigimene; Bululi lusugu lwabo lwa asusu abo lwabachwila, Mengo ma ususulwa wabo mahuhiya. ²² Liidi lyage lili nahi lya ndowa, hagisuchwa wa abilo, Bigichwila na matemo, nahi balihushaba kinyi. ²³ Bitema miitu gwage, MLUME gwagana, inangwa gushi nabuhitilo; Bululi ii beengi uhima njige, bashinabalwa. ²⁴ Msiha gwa Misili gwabambiwa mme; Gwibiwa mnda maboo ma batu ma luubi lwa uboo uachi. ²⁵ MLUME, gwa bilume pambwa, Abetcha a Isilaeli, gwagana bino, Loolwe nimmonona Amoni, naNo,na Falao, na Misili, hamwechi na miishi gyage, na maoolo mage, ehe, Falao, na baya bene bali hummudagila. ²⁶ nene nibabiya mnda maboo ma baya bene balihuenga mitima gyabo, na mnda maboo na Nebukadleza, oolo lua Babeli, na mnda maboo ma bagichi bage; na hanyuma nabibyo gwishaminywa na batu, nahi biya masugu maala, MLUME gwagana bibyo. ²⁷ Bibyo gogwe ushimone booba, Ee Yakobo, mgichi gwanyi; na ushidambe mme, Ee Isilaeli; bululi, loola, niuhogonona uhumina koo, naibushi yobe uhuma mnda sii gya ubululwa wabo; na Yakobo gwigiwila, nage gwisengemana na ulitucha,nahashibi mtu gum'biya booba. ²⁸ Nangu uwa booa, Ee Yakobo, mgichi gwanyi, MLUME gwagana; bululi nene nili hamwechi nobe; bululi nibasungya abisa mioga gyose uya wine wandiuchingile, na nishiusungya gogwe abisa; ata bibyo niuguwicha wa uuonona, na nishiuleya bila bihuli.