¹ Ino noo inywa yelimonine Isaya mwaana gwa Amozi mnda mwano gwa Yuda na Yelusalemu. ² Na habi masugu ma isula, loono lwa ndu gya MLUME lwibiwa lugimanyu hegulu ha koono, nalo lwiginunywa hegulu ha tuoono; na mioga gyose gyilugila bihichi bihichi. ³ Na mioga giingi gyiga na ugana, Chuwe, tugye uloono lwa MLUME mndu gya Abetcha a Yakobo, nage gwitugigya madila mage, na beswe twigya mnda mahitilo mage bululi mnda Sayuni mwihuma m'bindo, na inywa ya MLUME yihuma Yelusalemu. ⁴ Nage gwiita uonona mnda mioga giingi, gwibaambila batu ba mioga giingi, nabo busula tuhilu twabo uba kasu, na masumo mabo uba bidabo; mmoga gushiginuna ahilu hegulu ha gunge mmoga, na bashiligigya bita iyaka ata. ⁵ Benywe ba ndu gya Isilaeli, chuwe, tugye mnda lwenge lwa MLUME. ⁶ Bululi gogwe wabashiga batu bobe, ndu gya Isilaeli, wa ibalo bali bagiluchu mishaminyi gya batu ba mlugulu, nabo basuta luti nahi Bafilisti, na basuhana maboo na baana ba bagenyi. ⁷ Iyaka sii gyabo giligigiluchu bumona na nolo, na hashi isula ya bitundu byabo; iyana sii byabo giligigiluchu na falasi, na hashi isula ya tubilibili twabo. ⁸ Iyaka sii gyabo gili gigiluchu na miishi; basutambikila migilo gya maboo mabo, bitu bigililwe wa minywe gyabo boo bene. ⁹ Mtu alema gusuginama, na mtu mmata gusuliginuna; wa bibyo ushi baleelele, ¹⁰ ugingile nda mmao; ulibise mmihwili umbele wa udanja wa MLUME umbele wa ugengeda wa boolu bwage. ¹¹ Meesoma mtu mene magininywe misachiwa hasi; na mtu gwa buhulihuli bwiginamiwa, Nage MLUME, gee buchima bwage, gwitonywa lulo lusugu. ¹² Bululi habi lusugu lwa MLUME gwa basolokoto gubi hegulu ha batu bose bene bali na buhulihuli na bulimona, na hegulu ha byose bili biliginune, nabyo byisachiwa hasi. ¹³ Nahegulu hamiamba gyose gya Lebanoni gili gilahu na giginyubu, na hegulu ha mialoni gyose gya Bashani. ¹⁴ na hegulu ha koono cha chilahu chose, na hegulu ha tuoono tose twine twatuginubu; ¹⁵ na hegulu ha minala gyose gyagiginyubu, na hegulu ha ibambacha yina mgumbo; ¹⁶ na hegulu ha maato mose ma Talshishi, na hegulu ha taswila lyose lyine lisubenjiwa. ¹⁷ na ulitona wa mtu gwiugimanya, na buhulihuli bwa batu bwisachiwa; nage MLUME, gee bwage, gwiginunywa lulo lusugu. ¹⁸ Nagyo miishi gyichimina abisa. ¹⁹ Na batu bigingila mnda miao gya mawe, na mnda bina bya m'bitete, na umbele wa usinywa wa MLUME na ugengeda wa buoolo bwage, heligimana yulu gadanje ibaloo yose. ²⁰ Lulo lusugu mtu gegese gwigitele koo miishi gyage gya bumona, na miishi gyage gya nono, gyabalongiche yulu ya ugitambikila, wa fuko na achuguchugu. ²¹ yulu agingile mnda miao gya mawe,na mnda mitanji gya mawe magaduile, umbelewa usinywa wa MLUME na ugengeda wa buoolo bwage, heligimana na udanja sii abisa. ²² Mlewe mtu mine luhuda lwage luli mnda mahundu ma mihyembe gyage, Bululi gusulangilwa wi uba iyatu?