¹ Wa bibyo, mushleye byenye mukikiwe bitangi yolu ya binywa bya Kelesitu, twebapaswe obaa na owecha obikelaa tushibiye eyaka mishingikya mitema kya onekeya uhumana mikelo kyenye kishitee na imani ndaa Abeca, ² Namboo mishingi kya ukikiwa ya ushundwa, na obabela maboom ucholwa wababu, naopata biholo bya milombo. ³ tweeta bibi nambo Abeca kwetaka. ⁴ Wenene tushiba nahe baya balechilwe ohololo atangi, batandile epawa ya ekolu, naoetwa obaa alebu na itema, ⁵ baya batondile saa wabinywa bya Abeca wa omuu mengo wechwa, ⁶ Namboo bekwa bishiwechekana ukiwela eyaka onokeya wateema. hahoo bakiiweche eyaka mwana kwa Abeca nyendo shibile nafsio mwabo, bemeeta ubaa etuu uya dhihaka halakala. ⁷ Wenene etete elee ookala mbula nyendo na nyendo na nyendo yolu kyake, na obataa inanyi kobenjwu wabaya baitiile ikilo indaa etetee, haopokela balaka uhuma wa Abeca. ⁸ Nambo ya huma mikwa na mangungu okatwaa naobaa aleboo na olainiwa na mwisho kwake otelwa ndaa ebolu. ⁹ Babenjwa namboo tuleomona ibya tenene bitu bya bibenju okelelela, nabile naolelela. ¹⁰ Wenene Abeca kushi dalimu atakakebeleche kilo kwenyu, na bikuma bya meleebaete ochina liake, wabibyo molee batumi kile bahaha ata leno mule ubatumikila. ¹¹ Nabaswe tutaka komwechi kwenyu kamonye oetaa biya biya, ataa isula waowecha. ¹² Tushi otaka mobee wawivu, yulo mobee balamii babaya wazirithio ololela na imani naohemba. ¹³ Wenene Abeca, komelee Ibrahimu ololela, yolu ya bibyo kushibele mulu oheta ke mine kwelapile, kwelape indaa nafsi mweke, ¹⁴ kwekane, "wakweli niowaa, naneongecha lubato obee okelelela". ¹⁵ Wandela kekee, Abrahamu kupokele eya kulesambelwe anyuma aohembaa. ¹⁶ Wenene batu olapaa kee imolu oheta boo naisula ya ushindana osee wabinywa iyolapa, waokitabowa. ¹⁷ Indaa binywa biya Abeca, kabenjile obaa ;onya hulala waokelelela warithi na ohemba bikanywa byake bishii okyaase, kwepeye elapo awingi; ¹⁸ kobeye bibyo bituu bishii okaluwa, ndaa bibyo Abeca kushikana lulimi, tuhewee obembelechwa tulebasenebe obiwata matumaini bya bileobewa mbele kyetu. ¹⁹ Twenaoma oo naye nanga wa itema natalala, oomaa, ikingele ata indaa mwa paziya, ²⁰ Kukingele yesu yolu kyetu ipanbichi kwetu, obaa ebole mmataa ataa milombo nahe owanana wa Melkisedeki.