¹ Yusufu gumgwilile sage umeeso, nuumlilila, gummele yambi. ² Yusufu gubagishile bagichi bage bagundahi bamshinye sage buganga yulu gashibole. Bagundahi bamshininye Isilaeli buganga. ³ Masugu mage maumi mana moo nuhwa, bululi bibyo noo masugu ma ushinyiwa buganga. Bamisili bamlilile masugu maumi njwii. ⁴ Masugu ma umlilila hamahwile, Yusufu gubasambila batu ba ndu gya Falao, guganine, Nambo nimona misa u meeso menyu, ibumbu ino mwadogome u matu ma Falao, mwagane, Tata gundahiche, guganine, ⁵ Nene nisili hoka na uwa, wanjiye mnda sinda lyanyi lyandilidabile mnda sii gya Bakanaani. Bino ibumbu ino undeye nagye hano umchiya tata,nene nigiwila, ⁶ Falao guganine, Ubegya, umchiya sobe, nahi byeliulahile. ⁷ Haho Yusufu gugile umchiya sage, na bacha bose ba Falao bagile hamwechi nage, miungu gya mndu mwage, na miungu gyose gya ibaloo ya Bamisili. ⁸ Na ndu gyose gya Yusufu, na bashiwabo, na ndu gya sage; bashigile baana babo na miyoo gyabo, na ng'ombe chabo, mnd ibaloo ya Gosheni. ⁹ Hanyuma bagile hamwechi nage bachinine Falasi, na tubilibili; babele ihichi yata abisa. ¹⁰ Bahiile ndaa na mgongo gwa Atadi, guli m'bwala mwa Yoldani. Balilile ubo malilo mata, manyemu abisa. Guitile lilo lya sage masugu njwii. ¹¹ Na baya bene babele bashame mgiya sii, baya Bakanaani, habamonine lilo mnda mgongo gwa Atadi, baganine, Lino lilo lya Bamisili mmata wa bibyo iya ihana ya haya igishilwe Abel-Misili, yine ili m'bwala mwa Yoldani. ¹² Baana bage bamgilile nahi byelibalagile; ¹³ wa yulu baana bage bamshlile ndaa na Kanaani, nabo bamchiile mnda mgumbo bwa lubala lwa Makpela, luli umbele wa Mamle, lweligulile Iblahimu hamwechi na lubala lwa Efloni Mmiti, habe ihana yage ya uchiila babu. ¹⁴ Yusufu gugiwile Misili gee na bashiwabo, na bose bene bagile hamwechi nage umchiya sage, hanyuma na umchiya sage. ¹⁵ Bashiwabo na Yusufu habamonine ugana sabo gwahuwa, baganine, Hange Yusufu gwituonywa; nage gwitugiwidicha buube bwa tumgilile. ¹⁶ Bahilile batu uli Yusufu, ugana, Sobe, guuhele alago hambele ha uwa wage,guganine, ¹⁷ Msambilwe Yusufu bino; Nilihuusaba ubaleelele bashiwenyu buube bwabo, bululi baugilile bisone; bino tulihuusaba utuleelele buube bwa bacha ba Abetcha a sobe. Yusufu gulilile helibele hudogoma nabo. ¹⁸ Bashiwabo bagile iyaka weli, bamgwilile umagulu, baganine, Loola, beswe tuli bacha bobe. ¹⁹ Yusufu gubaganine, Mushimone booba, wi wii! Nene nili ha ihana ya Abetcha? ²⁰ Winene benywe munabgile bisone, mndi haho Abetcha anangile uba bisoga, bululi uhogonona mmoga gwata nahi byaguli lino. ²¹ Hano bino mushimone booba nene nimlisha benywe na baana benyu. Gubahungiche, na udogoma nabowa talala. ²² Yusufu gushamine mnda Misili, gee na mndu gya sage. Yusufu gushamine myaa sambi na umi. ²³ Yusufu gumonine baana ba Eflaimu na wibushi ya butatu; na baana ba Makili, mwana gwa Manase, babushilwe u machwi ma Yusufu. ²⁴ Yusuifu gusambile bashiwabo, nene nisili huwa, bibyo Abetcha ii mchwila hashi adugwa, gwimmunya mmino ibaloo, nuumyicha iya ibaloo yelibalahile Iblahimu, na Isaka, na Yakobo. ²⁵ Yusufu gubalahiche baana ba Isilaeli, guganine, Hashi adugwa Abetcha imchwilila bwenywe, na benywe mwiswala mauda manyi na umahyicha uya. ²⁶ haho Yusufu nuuwa, gwina myaa sambi na umi; bamshininye buganga bam'biile mnda sandugu uya Misili.