¹ Yakobo gugishile baana bage, guganine, Sumbilwe, yulu namsambile byimoneya wa mli masugu ma isula. ² Sumbilwe, hulichiwe, benywe baana ba Yakobo, Mumulichiwe Isilaeli, senyu. ³ Leubeni, uli bubele bwanyi, Uoma wanyi, na mtomwe gwa uoma wanyi. Wabahima babge wa buosobu na wa uoma. ⁴ Waitowa lugumba nahi madi, bino, ushibe na buosobu, Bululi uichinine ingo ya sobe, Uibiile bunyenye; guichinine ingo yanyi. ⁵ Simeoni na Lawi ii babuswa; Tuhilu twabo ii maputu ma buhulihuli. ⁶ Ichuli-chuli yanyi ya mwego, ushigingile mnda lubisagulu lwabo, Ugengeda wanyi ushi hulichane na sumbilo lyabo, Bululi yulu ya bichigililwa byabo bahagile mtu, Na yulu ya paa chabo bagedile mmi gwa ng'ombe; ⁷ Bichigililwa byabo bilogwe, bululi bibele biingi, Na sungu chabo, bululi chishibele na misa. Nibagabula hawungi ha Yakobo, Nibasala hawungi ha Isilaeli. ⁸ Yuda, bashiwenyu biutona, Uboo obe ubi umaoshi ma tumangu tobe. Baana ba sobe biuginamina. ⁹ Yuda m mwana-tambwe, Uhuma ubuhibi, mwananyi, wasila; Guginamine nulilacha nahi tambwe, Na nahi tambwe gya ota; mnanyi gunaosha ugibyula? ¹⁰ Lubango lwa buoolo bushihuma wa Yuda, Na gugeda milandu hawingi ha magulu mage, Ndaa na byichwa Gee, mine gwihyilila, Guya mine mioga gyimnyemya. ¹¹ Gwihamba punda gyage u mti gwa mzabibu, Na mwana-punda gwage u mti gwa mzabibu gusoga, Gufulule bichwalaganywa byage m'byunywa, Na bisanjwa byage nda mashi ma zabibu. ¹² Meeso mage mabi magachichu yulu ya byuochana, Na meno mage mabi mahaha yulu ya mabele. ¹³ Zabuloni gwishama wibega na habudabwilo, Nage gubi nahi m'bege gwa uhambila maato, Na lugumba lwage lubi mibamba mwa Sidoni. ¹⁴ Isakali ii punda gyuoma, Gilihulilacha hawungi ha liha lya miyoo; ¹⁵ Gumonine ihana ya ulitudicha, uba habenju, Na sii, uba gili gisoga, Guchinjiche umbe lyage liswale michigo, Gee nuba mgichi gwa migilo gigumu. ¹⁶ Dani gwionona batu bage, Nahi gumwe gwa mmoga gwa Isilaeli; ¹⁷ Dani gubi ambalambala a mndila, Nahi kunga mndila, Gisuchiga tushindagulu twa falasi, Ata mine gwichina gwigwa agale. ¹⁸ Uhogonona obe nauhemba, Ee MLUME. ¹⁹ Gadi, bilume pambwa byimchunguluwa, Haho nage gwibachunguluwa ndaa na utushindagulu. ²⁰ Asheli, iliwa yage ibi inunyu, Nage gwihana mmaso gya buoolo. ²¹ Naftali ii kulungu gwagisulwe; Gulihulusha binywa bya bisoga. ²² Yusufu ii mtu gucho gucho guli huhaa, Mti gucho gucho gulihuhaa hoka na msula gwa madi, Matabi mage maganda na wibambacha. ²³ Bashi ba migwi bamgilile bisone. Bamtelile, bamchigiliche. ²⁴ Bibyo buta bwage bushamine masugu mose, Maboo mage mabele na uoma, Wa maboo ma Dambe gwa Uoma gwaYakobo; Wa chinalya mmushi, gee liwe lya Isilaeli, ²⁵ Ehe, wa Abetcha a sobe ene iuwatilicha; Wa mihaa gya hegulu ha gulu. Mihaa gya mabenga mene mali malahu ugya hasi, Mihaa gya mabele, na gya magumo. ²⁶ Mihaa gya sobe, Gyahima mihaa gya koono cha ala. Butu bilihuunjwa bya tuono twa milumbu; Na bishame hegulu ha mswe gwa Yusufu, Hegulu ha lubumbo lwa mswe gwage guya guli mmata hawingi ha bashiwabo . ²⁷ Benjamini ii mlunga guli husambula sambula, halwelo gwiya buhibi, Na igolo gwigaba kole. ²⁸ Gigyo gyse noo mioga gya Isilaeli umi na gyopi. Na bibyo noo bibasambile sabo, na ubahalila mihaa; gumwechi gumwechi wa mihaa gyage gubahalile mihaa. ²⁹ Gubasambile, ugana, Nene nagya usumbichiwa hamwechi na batu banyi; mwanjiye hamwechi na bamatata, mnda mgumbo gyine guli mlubaja lwa Efloni, Mmiti; ³⁰ mnda guya mgumbo gulimo mlubalalwa Makpela, gulu umbele wa Mamlemnda sii gya Bakanaani, lwelugulile Iblahimu hamwechi na lubala wa Eloni Mmiti, habe ihana yage ya uchiila. ³¹ Mya mwabachiile Iblahimu, na Sala mmachage; mmo bachiile Isaka na Lebeka mmachage; na nene mmo nichiile Leya; ³² lubala lwa mgumbolulimo lugulilwe u baana ba Hethi. ³³ Haho Yakobo helihwile ubalaga baana bage, gubungile magulu mage wiingo, gee nuuwa, gusumbichiwe hamwechi na batu bage.