¹ Yakobo gushamine mnda sii giya gyilienene sage sii gya Bakanaani. ² Bino noo bibushi bya Yakobo. Yusufu hasilibele na myaa umi na njwii gya ubuswa, gubele huusa myoo hamwechi na bashiwabo; nage gubele mmwalubaga hamwechi na baana ba Bilha, na baana ba Zilpa, baachi ba sage. Yusufu gummyiche sage mwano gwabo gubii. ³ Haho Isilaeli gubenjiche Yusufu uhima baana bage bose, yulu ii mwaana gwa buulu bwage, gumshonene kanju lilahu. Bashiwabo bamonine ugana sabo guli hum'benja gee uhima bashiwabo bose, bammonywine, na bashioshiche udogoma nage wa talala. ⁵ Yusufu guloshile malo, gubalangulile mo, mndi boo nuusili ugililila uumonywa; ⁶ yusufu gubasambile, Ibumbu ino, hulichiwe mano malo mandalota. ⁷ Loolwe, beswe tuba huhamba mikanda ulubala, mndi! mkanda gwangi gwa chuwa na ugya ugimana mbalamwa, noo ulola, mikanda gyenyu gyachunguluwa nauginama umbele wa mkanda gwanyi. ⁸ Bashiwabo bamsambile, Wi wii! Chigilwe gogwe wituhyilila beswe? na gogwe ubi hegulu hetu beswe? Bagililile ummonywa yulu ya malo mage, na yulu ya binywa byage. ⁹ Gulishile iyaka mange malo, gubasambile bashiwabo, guganine, Lingaminywe, nalota iyaka mange malo; na loola, chuna na mwechi na tumbalambala umi na amwechi tunginamine. ¹⁰ Gumsambile sabe, na bashiwabo; sage gumambile na gumsambile, mmalo nai mano mawalota? Wi wii!Nene na mnobe na bashiwenyu twichwa uuginamina ndaa na hasi? ¹¹ Basiwabo bammonene buwa; haho sage gubiile iya inywa mnda mtima gwage. ¹² Bashiwabo bagile uusa miyoo gya sabouya Shekemu. ¹³ Isilaeli gumsambile Yusufu, Wi wii! ati bashiwenyu balihuusa miyoo uya Shekemu? Chuno, nutume wabali. Gumsambile, Nene guno. ¹⁴ Isilaeli gumsambile, Ugye, umone, nambo bashiwenyu bali poo, na ihichi yabo nambo ili bisoga, wachupa mwano, Haho gummilile uhuma haya ha ibetabeta ya Hebloni, gee nuhiya Shekemu. ¹⁵ Gumwe mtu gumlamine gubele huchunguluwa-chunguluwa mluya lubala; guya mtu gum'budiche, guganine, Ulihuenga ii? ¹⁶ Yusufu guganine, Nilihubaenga bashiwetu; ibumbu ino usambile wabali huusila. ¹⁷ Guya mtu guganine, Bahuma hano, bululi nabahulicha balihugana, Tugye Dothani. Hahao Yusufu gubalamine bashiwabo na ubabanga Dothani. ¹⁸ Bammonine wa koo, na gushibele nabahyila, bahungile mmungo yulu yage bammage. ¹⁹ Badogomyane boo wa boo, Loola, guya mlume gwa malo gulihuchwa. ²⁰ Bino, tubegya, tummagena tumtele mmimwe ina ya mloba, na beswe twigana, nyama gya buhuchi noo gyamya; noo twamone byiwilila malo mage. ²¹ Leubeni guhuliche na umogonona mnda maboo mabo, guganine, Tushimmage. ²² Leubeni gubasambile Mushigeshi mashi; mtelwe mnda ina ya mloba yine ili mlubugu, na mushimmude; yulu gaoshe ummogonona mnda maboo mabo, gamgiwiche uli sage. ²³ Haho Yusufu helihyile uli bashiwabo, bamchulile Ysufu kanjo lyage, kanjo liya lya lilahu lyelichwalile, ²⁴ bamguhile na uutela mnda iya ina ya mloba, na iyo ina ya mloba ibele hululu, mushi madi. ²⁵ Nabo bashamine hasi uya iliwa; baginunine meeso mabo bamonine mlongo gwa Baishimaeli balihuchwa uhuma Gileadi na ngamiya chabo, balibaswale buswenge na [zeri] butongo buhisu busuhocha nolo huhuma wahya, na malashi, balihugya nabyo ndaa na Misili ²⁶ Yuda gubasambile bashiwabo, Yulu ya ibalo nai tummage mshiwetu na umabisa mashi mage? ²⁷ Bino, tumguche uli bano Baishimaeli, na ata maboo metu mashimgilile biibe, bululi gee ii mshiwetu, na mashi metu. Bashiwabo na Yuda bagitabuwe. ²⁸ Bamidiani budagulanya bahitile; haho boo nuumunya Yusufu mnda ina ya mloba nuusecha, boo nuumgucha Yusufu u Baishimaeli wa bihindi bya bomona maumi mopi; nabo bamguhile Yusufu ndaa na Misili. ²⁹ Leubeni gugiwile wiiya ina ya mloba, mndi! yusufu gushimo mnda iya ina ya mloba, gugulile bichwalaganywa byage. ³⁰ Gugiwile uli bashiwabo, guganine, Mwaana gushimo mmina, nene nagye uhi? ³¹ Baguhile kanjo lya Yusufu , bashinjiche mwaana gwa mbuchi, na uchunda kanjo mnda mashi ma mwana mbuchi, ³² Bagile nalyo liya kanjo lilahu, bammele lyo sabo, baganine, Twalimona lili; hano, usungula lino kanjo nambo ii lwa mwanobe, hange lishilyo. ³³ Gulisungulile, guganine, Noo kanjo lya mwananyi, nyama gya buhuchi gyamya; hashi ata adugwa gwahagwa. ³⁴ Yakobo gugulile bichwlaganywa byage, guchwalile maduda mlubunda, na umlilila mwanage masugu meengi. ³⁵ Banabage bose na misiha gyage gyose bagile ummocha mtima, haho gee guhanyinye utolelechiwa, guganine, Nangu! Nimsalila mwananyi, niluhusumwa na mtima yulu yage, ndaa na usinda,Sage gumlilile. ³⁶ Nabo Bamidiani bamgudiche uya Misili, wa Potifa, ilume pambwa wa Falao, mmusobu gwa bita.