¹ Haho bamwe baulu ba Isilaeli banjwilile na ushama hambele hanyi. ² Bibyo inywa ya MLUME injwilile,ugana, ³ Mwana gwa mtu, bano batu baguha tuwe lugulu twabo na utubiya mnda mitima gyabo, nabo babiya byulihyatala bya usona wabo u mbele wa byenyi byabo. Wi wii! Mkiine gyanyi nabuchiwe nabo wiinya yo yose? ⁴ Biino dogoma nabo, wabasambile, Mlume ABETCHA gwagana bino; Mtu gegese gwa ndu gya Isilaeli mine gwiguha tuwe lugulu twage na utubiya mnda mtima gwage, na ubiya byulihyatala bya usona u mbele wa yenyi yage, na umgila mbuwa; nene MLUME, nimgaa ulamana na bwingi bwa miishi gyage; ⁵ yulu nabawate batu ba ndu gya Isilaeli mnda mitima gyabo boo bene, bululi blibagula nanyi yulu ya tuwe lugulu twabo. ⁶ Bululi bya bibyo ubasambile ndu gya Isilaeli, Mlume ABETCHA gwagana bino; Giwilwe benywe, mwagaluwe na utuleya tuwe lugulu twenyu; mwagalule byenyi byenyu ulola byuchigilicha byenu byose. ⁷ Bululi mtu gegese gwa ndu gya Isilaeli, ata gwa bagenyi benebali bashame mnda Isilaeli, gwamlibagule nanyi, na utuguha tuwe lugulu twage na utubiya mnda mtima gwage, na wiibiya yulihyata ya usona wage umbele wa yenyi yage, hanyuma na umgila mbuwa, na umbucha inywa yulu ya ichuli-chulu yage ya mwego; nne MLUME nimgaa,nene mine. ⁸ nene niomya yenyi yenyi yulu ya gugo mtu, naumgila uba bibagicha, na uba bisaga na mihingu, na nene nimmanya, gashibe hawingi ha batu banyi; benywe mwimana ugana nene noo MLUME. ⁹ Na mbuwa gabebichiwa, na udogoma inywa, nene MLUME, nam'bicha gigyo mbuwa, nene niugolola uboo wanyi hegulu hage, na ummaga, gashibe hawingiha batu banyi Isilaeli. ¹⁰ Nabo giguha usona wabo; usonawa mbuwa ubi nahi usona wa guya mine gulihumgila ubucha inywa. ¹¹ yulundu gya Isilaeli gishichimine ugya koo nanyi, yulu bashilibiye abachi iyaka yulu ya usona wabo ose; bululi babe batu banyi, na nene nabe Abetcha abo, Mlume ABETCHA gwagana. ¹² Inywa ya MLUME injwilile, ugana, ¹³ Mwana gwa mtu, sii hagyiita buubi na umenga, wa uluba, nabegolola uboo wanyi weli, naubela maudagilo ma iliwa yage, na ugihilila ndala, na ubahila koo batu na nyama. ¹⁴ binangwa batu bano batatu, Noa, na Daniele, na Ayubu, bisubamo mnda mwagyo, babalihogonona bichuli-chuli yabo ya mwego ka wa kiine gyabo, Mlume ABETCHA gwagana. ¹⁵ Nabehisha byiila mnda giya sii, babegidogya nagyo uba mauwa, mtu gegese gashioshe uhita mnda mwagyo, wa ibalo ya biya byiila; ¹⁶ inangwa banabamo baya batu batatu mgiya mbuga, nambo nene nili na mwego, Mlume ABETCHA gwagana, bashihogonowa bawalubaga na bawamisiha; boo buchima kaa noo bihogonowa, biya giya sii gyishigala mauwa. ¹⁷ Nambo nabehila ahilu mnda giya sii, na ugana, ahilu, hita mnda giya sii, na ata nibachinga koo batu na nyama; ¹⁸ inangwa bisuba mo baya batu batatu mnda mbuga, nambo nene byandi na mwego, Mlume ABETCHA gwagana, bashihogonowa baana na misiha; ila boo buchima ka noo bihogonowa. ¹⁹ Nambo nabehila bisumi mnd giya sii, na uchigililwa yulu yagyo, wa maashi; yulu ya ubachinga koo batu na nyama. ²⁰ inangwa bisuba moo Noa, na Daniele, na Ayubu, nambo nene byandi na mwego, mlume ABETCHA gwagana, bashihogonowa baana na misiha; bilihogonona bichuli-chuli byabo bya mwego boo bene kaa wa kiine gyabo. ²¹ Bululi Mlume ABETCHA gwagana bino; Wi wii! Wihima abisa handihila uonona wanyi una wine uli wabuhuchi abisa hegulu ha Yelusaleu, noo, ahilu, na ndala, na byiila bya buhuchi, na bisumi, nabachinge koo batu a nyama? ²² Biino, loola, hishigala mihona benebiguhwa hambuga, baana na misiha; loola, bimchwila benywe, na benywe mwimona madila mabo na bigilanywa byabo; benywe mwihungiwa wa yulu ya mwano gwa usona wandileshile hegulu ha Yelusalemu, ehe, yulu ya mwano gwa bihisho byandileshile hegulu hage. ²³ Nabo bimmungya benywe, hamwimona madila mabo na bigilanywa byabo; benywe mwimanaugana nishigilile hene hashi na ibalo bihisho byose byine byandigilile, Mlume ABETCHA gwagana.