¹ Hanyuma MLUME gumsambie Musa, Bada bibao byopi bya mawe mlingilisho gwa biya bya bitangi; nene nigola hegulu ha bibyo bibao biya binywa nahi biya bibele hegulu ha biya bya bitangi, biya byolibelile. ² Gigwe wabe tayali halwelo, na halwelo wasele u loono lwa Sinai, gogwe waiminye ichuli-chuli yobeya mwego wandi uya u songo gya loono. ³ Gashisele mtu gegese hamwechi nobe, nagashimoneye mtu gegese hoka nalulo loono; ata miyoo na ng'ombe chishilishiwe hoka na lulo loono. ⁴ Musa gubadile bibao byopi bya mawe mlingilisho gwa biya bya bitangi; na Musa guchuwile lwelo u mayaya, nage gugile u loono lwa Sinai, nahi biya bimsambie MLUME, gubiguhile biya bibao byopi mmaboo mage nugya nabyo. ⁵ MLUME gusalile mliya timba, gugimene nage hamwechi uya, gulisambile china lyage. ⁶ MLUME guhitile hambele hage, gulisambile, MLUME, MLUME, Abetcha abwingi bwa misa, gwa yano, gushi gwa sungu chiingi, gwa bwiingi bwa misa na winene; ⁷ guya gubamonena misa batu oko oki, guya gwa uleelela usona na uluba na buubi; na gushigum'balila mtu usona bululi gusha ata na abachi; guya gusugiwidicha baana usona wa bamasabo, na baana ba baana babo nabo, ndaa naibushi ya butatu ata na ya buna. ⁸ Musa gugilile abilo, guginyiye mswe gwage ndaa na hasi, guginamine. ⁹ Guganine, Uba bino nahuhewa keene u mbele obe, MLUME, nilihuusama, MLUME, ugye hawingi hetu, bululi ii batu bene bali na maoshi magumu; uleelele usona wetu na buubi bwetu, utuguhe tube pyana chobe. ¹⁰ MLUME guganine, Loola, naita malagano; u mbele wa batu banyi bose nigila bisaga, wa biya byine bishinagiliya mnda ibaloo yose, na ata u mmoga gogose; na batu bose bene bolimshame hawingi habo bimona mgilo gwa MLUME, bululi iyinywa ya umonya booba yandiugila. ¹¹ Lingamina ino inywa yanduhusambila lino; loola, u mbele obe nammunya Mmamili, na Mkanaani, na Mmiti, na Mpelezi, na Mhivi, na Myebusi. ¹² Uliuse ichuli-chuli yobe ya mwego, ushichwe uita malagano na bashami ba giya sii gyolihugya wagili, lishibe gochi hawingi hobe. ¹³ Bibyo wibela butambikilo bwabo, na noga-noga bihanda byabo, na ugeda-geda miishi gyabo gya maashela byabo. ¹⁴ Bululi ushutambikila ange abetcha, bululi MLUME,guya mine china lyage ii gwina buwa, iya Abetcha a buwa. ¹⁵ Ushichwe uita malagano na bashami ba ibaloo, batu bashigye uita lusengu na tubetcha twabo, nautambikila lutangi tubetcha twabo; mtu gumwechi gabeugita, ugyuya lutangi lwage. ¹⁶ Ubegigonda misiya gyabo, nagyo misiha gyabo gibegya uita lusengu na tubetcha twabo, bashibabule bawalubaga benyu bagye uita lusengu na tubetcha twabo. ¹⁷ Ushiliitile tubetcha twa usumbuluya. ¹⁸ Lulo luugu lwa mikati gishi gya gibiwe mshimi wigilongya. Wiya mikati gishi gya gibiwe mshimi mengo ma masugu njwii, nahi byandilagile, wa mengo ma malagane mnda mwechi gwa Abibu; (mwechi gwa butatu) bululi noo gulihunmine nago Misili mwechi gwa Abibu. ¹⁹ Yoyose yine yisula gumo ibi yanyi nene; na nyama chobe chose cha milume, babuswa batangi ba ng'ombe na miyoo. ²⁰ Na babuswa batangi ba punda bihogononywa na mwaana mmoo; iyaka, nambo ushuhubenja uhugonona, haho noo holiginoga ooshi, giya punda. Bubele bose bwa batu mwibahogonona. Na hashi mine gwichwa wandi maboo hululu. ²¹ Wigilamgilo masugu mtuba, bibyo lusugu lwa njwii wilihocha; mengo ma ulima mabala, na mengo ma usola namo, wilitucha. ²² Na gogwe wiwilicha lusugu lwa ulihocha lwa mayinga, nalo mlwa mtomwe gwa uesa ngano, ii lusugu lwa ulitucha lwa uongola bibya isula ya mwaa. ²³ Nyendo chitatu kila mwaa batu ba balumyana bigimana u mbele wa MLUME ABETCHA, Abetcha a Isilaeli. ²⁴ Bululi nigitela hambuga mioga gya batu mbele gyobe, na utamba bisula byobe; na hashi mtu gegese mine gwigibenja sii gyobe, hahoholigya ugimana u mbele gya MLUME Abetcha obenyendo chitatu kila mwaa. ²⁵ Ushitambikile maashi ma lutangi lwanyi hamwechi na mkati gwagubiwa mshimi; na ata luya lutangi lwa pasaka lushishigwa uhiya lwelo. ²⁶ Biliwa byose bya bitangi bya mtomwe bya sii gyobe wibichisha na ubibiya mnda ndu gya MLUME Abetcha obe. Ushibiche mwana mmoo mine gwili u mabele ma mnage. ²⁷ MLUME gumsambile Musa, Gola bino bunywa; bululi naita malagano nobe, na hamwechi na Isilaeli, wa udogoma bino binywa. ²⁸ Nage gubele uya hamwechi na MLUME mengo ma masugu maumi mana busugu na chuba; gushilile iliwa,na gushinywine maadi. Nage gugolile u biya bibao, biya binywa bya malagano, ao alago umi. ²⁹ haho habele, Musa helisalile uhuma u loono lwa Sinai, na biya bibao bibili bya ubangisiya bibele mmaboo ma Musa, haya helisalile u loono, Musa gushimanine ugana ibambi ya yenyiyage igengede wa yulu gudogomine na Abetcha. ³⁰ Haho Haluni na baana bose ba Isilaeli habammonine Musa, loola, ibambi ya yenyi yage ilihugengeda; nabo bamwene booba umshenena. ³¹ Musa gubagishile; Haluni na baulu ba bose ba sumbilo bagiwile weli; Musa gudogome nabo. ³² Hanyuma baana bose ba Isilaeli bashenine; gubasambile bunywa byose byine bimsambile MLUME u loono lwa Sinai. ³³ Na hahwile Musa udogoma nabo, gubiile isanjwa u yenyi yage. ³⁴ Bibyo mishaminyi gya Musa gibele helibele hugingila uli MLUME udogoma nage, gubele huchula iya isanjwa ndaa na byelitobowa; gutobowile na ubasambila baana ba Isilaeli binywa byose byelisambilwe. ³⁵ Baaba na Isilaeli bamonine yenyi ya Musaugana ibambi ya yenyi ya Musa ilihugema; nage Musa gubele hubiya iya isanjwa hegulu ha yenyi yage iyaka, ndaa na byebele hugingila udogoma na MLUME.