¹ Hahi gugo Musa gubele huusa ihichi ya Yethlo sage buo, ibuli ya Bamediani; gugolwele ihichi koo mlwanaganywa, guhiile ndaa na ulono lwa abetcha, ndaa na Holebu. ² Malaika ma MLUME mamtobwele, mnda lulindi lwa aahya ene alamine wiilindi ya mti; gulingamine, na mndi! Iya ilindi ilamine aahya, nayo ilindi ishishilile. ³ Musa guganine, NIgaluwa hano, naamone mano malo ma mtima ma maata, yulu ino ilindi ishihishila. ⁴ MLUME helimonone ugana gwagaluwa yulu galole, Abetcha gumgitile uhuma mnda iya ilindi, guganine, Musa! Musa! Gugaile, Nene nili hano. ⁵ Nage guganine, Ushishenyi hano; chula mikalabanda gyobe u magulu mobe; bululi ihana ino yawagimana iyi ibaloo ya uhaha. ⁶ Iyaka guganine, Nene nili Abetcha a sobe, Abetcha a Iblahimu, Abetcha a Isaka, Abetcha a Yakobo. Musa gubisile yenyi yage; bululi gisinine umloola abetcha. ⁷ MLUME guganine, chigilwe namona asusu a batu banyi bene bali Misili, na nene nahulicha liilo lyabo yulu ya bubagimena babo; bululi nigidi masusu mabo; ⁸ nene nasala bululi nabahogonone na maboo ma Bamisili, nabahunye uhuma mnda giya sii, baagye m sii gya gisiga, gyaata; sii gyagigiluchu mabele na bui; iyihana ya Bakanaani, na Bahiti, na Baamoli, na Bapelizi, na Bahivi, na Bayebusi. ⁹ Bino, loola, liilo lya baana ba Isilaeli lyapyiila; iyaka namona aya asusu ine ali hubasusula Bamisili. ¹⁰ Mndi bino, niutumauli Falao, bululi wabahunye babobatu banyi, babobaanaba Isilaeli m sii gya Misili. ¹¹ Musa gumsambile Abetcha, Nene nili nanyi, yulu nagye wa Falao, nabahunye baana ba Isilaeli uhuma sii gya Misili? ¹² Abetcha gumganine, Hashi adugwa nene nibi hamwechi nobe; na ihwicho ya ugana nuutuma noo ino; mengo molihwa ubahunya batu mnda sii gya Misili, mwimtangila Abetcha u luno loono. ¹³ Mus gumsambile Abetcha, Loola, handihiya u baana ba Isilaeli, naubasambile, Abetcha a bamasenyu; nabo babembucha china lyage nanyi? Nabasambile wi? ¹⁴ Abetcha asambile Musa, NENE NILIHO MINE GULIHO; guganine, bibyo noo byolibasambila baana ba Isilaeli; NENE NILIHO noo gwatuma wamli. ¹⁵ Abetcha amsambile Musa iyaka, Loola, Basambile baana ba Isilaelibino binywa, MLUME, Abetcha a bamasenyu, Abetcha a Iblhimu, Abetcha a Isaka,Abetcha a Yakobo, gwatuma wamli; lino noo china lyanyi ndaa na milumbu, nalyo noo kengelecho gyanyi u bibushi byose. ¹⁶ Ugye ubasumbicha baulu bose ba Isilaeli hamwechi, wabasambile, MLUME, Abetcha a bamasenyu, Abetcha a Iblahimu, Abetcha a Isaka, Abetcha a Yakobo, guutobwele, gusambile, Chigilwe namchwilila, iyaka namona bwamulihugililwa ubo Misili; ¹⁷ Na nene nagana, Nimmunywa uhuma mnda asusu a Misili na umgingicha mnda sii gya Mkanaani, na Mmiti, na Mmamoni, na Mpelizi, na Mhivi, na Myebusi, sii gya gigiluchu mabele na bui. ¹⁸ Nabo biuhuliha liidi lyobe; na gogwe wiigya, gogwe na baulu ba Isilaeli wa oolo lya Misili, na umsambila, MLUME, Abetcha a Baeblania, gwasambana netu; bino hano tulihuusaba, utuhe luhusa tugye lwendo lwa masugu matatu mlwanaganywa, yulu tumtangile MLUME lutangi, Abetcha etu. ¹⁹ Nene nigidu ugana lilyo oolo lya Misili lishibaha luhusa mugye, nangu, ata wa uboo wa uoma. ²⁰ Nene nigolola uboo wanyi, na ugihula Misili wa bisaga byanyi byose, byine byandiita weli, haho hanyuma noo helimma luhusa mugye. ²¹ Nene nimma mube na iubu u meeso ma Bamisili; na ata mengo ma mwigya, mushigya maboo hululu. ²² Hahi kila mmachana gwisaba uli m'binji nage, na wa guya mine gwelihushama nage mndu, bitundu bya lufeza, nabitundu bya nolo, na magubo; nabenywe mwabachwiye bawalubaga, nabawamisiha gyenyu; benywe mwiwata kole Bamisili.