¹ Hanyuma walongye buya bushamo bwabe bwa mapashia umi; umaite ma bichalaganywa bya alili asoga a ushingwa, hamwechi na bunyushi bwa langi lya ibule na manjano na bugachichu, hamwechi na bamalaika; mgilo gwa mtumbi mino. ² Ulaha wage kila pashia ubi maboo maumi mabili nainana, na bwata bwage wa kila pashia ubi maboo mana; mapashiya mose mabi ma lulingo lumwechi. ³ Mapashia matano milungwa hamwechi, lili na lili; na mange mapashia matano milungwa hamwechi, lili na lili. ⁴ Hanyuma wihamba mgochi byundo bya ibule isula luubi lwa isula ya limwe pashia uya u pindo gya mamwe mapashia, byoka biya wiita luubi lwa isula ya liya pashia byalili, wiihana ya bubili. ⁵ Hamba byundo maumi matano u pashia limwechi, na byundo maumi matanou luubi lwa isula ya liya pashia lili ubulungilo bwa bubili; bibyo byundo bibi hulolana. ⁶ Hanyuma wihamba byundo maumi matano bya nolo, na umalunganya mamo mapashia hamwechi wa biya byundo; na bubo bushamo bubi bumwechi. ⁷ Gogwe uite mapashia ma migochi gya mbuchi uba luhupo hegulu ha bubo bushamo; uite mapashia umi na limwechi. ⁸ Ulaha wa kila pashia ubi maboo maumi matatu, ua bwata bwage bubi maboo mana; mamo mapashia umi na limwechi mabi na lulingo lumwechi. ⁹ Hanyuma wilunga mapashia matano koo, na mapashia mtuba koo, na liya pashia lya mtuba wilibunga luubi lwa umbele wa liya hema. ¹⁰ Hamb byundo maumi matano luubi lwa isula ya liya pashia lili wiisulau maya mapashia mene malungwa hamwechi, na byundo maumi matano luubi lwa isula ya liya pashia u liya lya bubili lyine lyalungwa umwechi. ¹¹ Iyaka uhambe byundo maumi matano bya lusuu, na uhambatiya m biya byundo, na usambanya liya heme hamwechi, bululi libe hema limwechi. ¹² Na iya ibaa yishigachu, iya ya uhibila, ya maya mapashia ma hema, iya ibaa ya pashia lya lishigachu, lyihibilwa uya luubi lwa unyuma lwa bushamo. ¹³ Na uya uboo umwechi luubi lumwechi, na uya uboo umwechi wa bubili, ulaha wa mapashia mahema mene mashigele, mihibilwa mlubachu lwa bushamo lulu luubi na lulu luubi yulu ya uwila. ¹⁴ Gogwe uite luhupo lwa liya heme, lwa bibambi bya miyoo gya milume byine bibiilwe langi lya ligachichu, na hegulu hage luhupo lwa mibambi bya (mmoha) . ¹⁵ Gogwe uite chicho mbao cha mti gwa msese uba bushamo, cha chigimanyu. ¹⁶ Kila lubao lubi na ulaha wa maboo umi, na bwata bwage kila lubao lubi na uboo umwechi na ihindi. ¹⁷ Kila lubao lubi na handa, chibi hulungwa lulu na lulu; noo byolichyiita mbao chose cha bushamo. ¹⁸ Hanyuma wchiite chiya mbao cha bushamo, mbao maumi mopi luubi lwa uboo ulume hulola lubi lwa uboo wa ulume. ¹⁹ Na gogwe wabade masongo maumi mana ma lufeza hasi ha chiya mbao maumi mopi, masongo mabili hasi ha lubao lumwechi, uhagatiya mmaya mahanda mage mabili, na masongo mabili hasi ha lunge lubao uhagatiya maya mahanda mage mabili. ²⁰ naubilwa bubili lwa bushamo, luubi lwa uboo uachi mbao maumi mopi. ²¹ Na masingo mage ma lufeza maumi mana; masongo mabili hasi ha lubao lumwechi, na masongo mabili hasi ha lunge lubao. ²² Hanyuma waite mbao mtuba cha luubi lwa unyuma lwa bushamo uloola lubi lwa mlugulu. ²³ Iyaka wiita mbao chibili yulu ya masunga mabili mene mali luubi lwa unyuma. ²⁴ Luubi lwa hasi chibi chibili chibili, bibyo chilungwa luubi lwa hegulu hamwechi masongo macho uhambana chose chibili byachibi; chibi yulu ya maya masunga mabili. ²⁵ Mbao chibi inana, na masongo macho mabi ma lufeza, masongo umi na mtuba; masongo mabili u lubao lumwechi na masongo mabili u lubao lwa bubili. ²⁶ Gogwe waite bihoho bya mti gwa msese; bihoho bitano yulu ya mbao cha lubi lumwechi lwa bushamo. ²⁷ na bihoho bitano wa yulu ya mbao cha lubi lwa bubili lwa busahamo, na bihoho bitano wa yulu ya mbao cha lubi lwa bushamo lwa unyuma uloola mlugulu. ²⁸ Na iyo ihoho ya m'bwingi, ili hawingi ha chicho mbao yigingila utula isula iya na uhuya isula iya inge. ²⁹ Na chicho mbao wichiwila na nolo, na mmubo gwage gwaubiila bibyo bihoho wigiita gya nolo; na biya bihoho wibiwila na nolo. ³⁰ Haho gogwe wigimiya bubo bushamo ulamana na biya byine byawamonywa uloono. ³¹ Gogwe uite pashia lya bunyushi bwa langi lya ibule, na langi lya imanjano, na langi lya ligachichu, na ichalaganywa ya alili ya ishingwe, yiluwiwa na ubiwa bamakelubi, mgilo gwa m'bachi gwa wino; ³² hanyuma walusundiye hegulu u bihanda bina bya mti gwa msese byine bili byuninywe na nolo, byundo byage bibi bya nolo, u masongo ma lufeza mana. ³³ Gogwe wahagalitiye liya pashia hasi ya biya byundo, gogwe wachwishe liya lindo lya ubangisiya na ulibiya mmo unyuma wa pashia; na liya pashiya lyigabula ha haha, na ha ihana ya ihaha abisa. ³⁴ Gogwe wibiya isuba ya yano hegulu ha liya lindo lya ubangisiya mnda mwa ihana iya ya ihaha abisa. ³⁵ Na maya mesa wimabiya hambuga ha pashia, na mti gwa tala uba hoka na mesa lubi lwa usahmo uhugulwila uboo wa ulume; na maya mesa uhugulwila uboo wa uachi noo byolibibiya. ³⁶ Hanyuma wabiye ibi ya mchango gwa Hema, ya bunyushi bwa langi lya ibule, na langi lya manjano, na langi lya ligachichu, na ichalaganywa ya alili isiga yishingwe, mgilo gwa mshonyi gwa ludamba. ³⁷ Gogwe wabiye bihanda bitano bya msese wa iya ibi ya mchango, na ubyunina na nolo; mano chage chubi cha nolo; gogwe wisula masongo ma lusuu matano wa yulu yage.