¹ Aala a Ahasuelo; nahe gugo Ahasuelo guhyiile utula Sii gya Bahindi ndaa na Kushi, hegulu ha mokoba smbi na maumi mabili na njwii; ² maya masugu oolo Ahasuelo gushamine wisuba yage ya buolo bwage, uya Shushani ngomeni; ³ mwaa gwa butatu gwa uhyilila wage, haya helihyiche biliwa baata bage bose ba mikoba na baya basumgimena oolo u bange batu, baulu ba Baajemi na ba Maamedi, batu bene bali na tubega na bilume pambwa bya mikoba, bagimene umbele wage. ⁴ Gubamoninye bitundu byage bya buolo bwage na unyemiwa wage, na bunyemu bwa buoolo bwage busoga masugu mengi, noo masugu sambi na maumi inana. ⁵ Ndaa na masugu mamo hamawilile, oolo gubaitile biliwa batu bose bene babele uya Shushani ngomenu, baosobu na baana ba tulela, mengo ma masugu njwii, umgumbo gwa lagala lya lubala lwa oolo. ⁶ Habele na mapashia ma ngubo gya bupamba, bwa buhaha na ibule, mamahambe na mgochi gwa alili a asoga a langi lya imanjano u mahundu ma lufeza na bichwalaganywa bya ngelingeli; iyaka na bingoo bibele bya nolo na bya lufeza hgulu ha bitatilo bwa ngelingeli, mawe ma magachichu, na ma mahaha, na ma imanjano, na ma mahisu ⁷ Babanywishiche malwa mnda bisengo mbada cha nolo, na chiya mbada chibele hala hala, na divai bee cha mmoga gwa mmaoolo, ulamana na oolo byesugaa batu wage. unywa ubele nahi gyauganinywe, hashi m'bindo, bululi bibyo noo bilagige oolo u bagichi ba mndu mwage, kila mtu gagile byelihuunda. ⁹ Iyaka Vashiti, mmaoolo, nage guhiile baachana biliwa mnda ndu gya umaoolo gya oolo Ahasuelo. ¹⁰ Haluhiile lusugu lwa njwii, oolo haseelele mtima gwage na divai, gusambile Mehumani, Biztha, Halbona, Bigtha, Abagtha, Zethali, na Kalkasi, baya bagimenyi njwii bene babele hugila u meeso ma oolo Ahasuelo. ¹¹ bamlushe, Vashiti, mmaoolo, umbele wa oolo, gulimchwale sala lya buoolo; yulu ya ummonya u batu na baata ba basolokoto buhungwe bwage, bululi gubele hungwe gwa yenyi. ¹² Haho Vashiti, mmaoolo, guhaninye uchwa u lubila lwa oolo u maboo ma bagimaninyi ba ndu; yulu ya bibyo oolo guchigililwe abisa, na sungu chage chilamine mnda mwage. ¹³ Haho oolo gubasambile baya bene bali na lweengu, bali na lwenyi lwa mengo; bululi noo bibele mishaminyi gya oolo uli bose baele bamane m'bindo na uonone; ¹⁴ na hoka nage babele bashame; Kalshena, Shethali, Admatha, Talshishi, Melesi, Malsena, na Memukani, baya baata ba basolokoto ba Baajemina Maamedi, bene babele humona yenyi ya oolo, na ushama batangi mnda buoolo; gubabudiche, ¹⁵ Tumite wii Vashiti, mmaoolo, wa m'bindo, bululi gusagila nahi byeligishilwe na oolo Ahasuelo wa maboo ma bagimaninyi ba ndu? ¹⁶ Haho Memukani, guganine u mbele wa oolo na baata ba basolokoto, Gugo Vashiti; mmaoolo, gusamlubila oolo ge bushima, mna baata ba basolokoto bose, na batu baose bene bali u giya mikoba gyose gya oolo Ahasuelo. ¹⁷ Bululi ihisho iyo ya mmaoolo yimanyiya na baachana bose, ndaa na balume babo binenunywa u meeso mabo, hayidogomwa ugana oolo Ahasuelo gumgishile Vashiti, mmaoolo, galushiwe u mbele wage, haho gushichwile. ¹⁸ Ata na lino bino, baachi balingwe ba Baajemi na ba Baamedi habahwile uhulicha mwano gwa ihisho ya mmaoolo bibasambila byoka biya maata ba basolokoto bose ba oolo. Bibyo hichwa unenunywa wiingi na uchigililwa bee. ¹⁹ Biino nambo oolo gwimona bisoga, na uchwe wage alago a oolo, nao agolwe mnda m'bindo gwa Baajemina Baamedi gushihanyiwe, ugana Vashiti gashihiye iyaka u meeso ma oolo Ahasuelo; na bu mmaoolo bwage gahewe gunge guli mmochu ummima gee. ²⁰ Biino mtambila gwa oolo heliguta helilisamba mnda buoolo bwage bose, bano bili bwata, baachi bose bibanyemya balume babo, baosubu na tulela. ²¹ Bibyo iyo inywa baibenjiche oolo na baata ba basolokoto; nage oolo gugilile ulamana na inywa ya Memukani. ²² Bululi guhilile mikanda u mikoba gyose gya buoolo, kila mkoba wa mgolo gwage, na kila mmoga wa liidi lyabo, ugana kila mlumyana gahyilile ndu gyage, na uta mtambila gwa guno mwano gwa liidi lya batu bose.